પતંગના તહેવારમાં માનવતા જળવાય તે માટે કરૂણા અભિયાન, ૪૮૦થી વધુ સારવાર કેન્દ્રો કાર્યરત
રાજ્ય સરકાર દ્વારા દર વર્ષની જેમ આ વર્ષે પણ ઉત્તરાયણ પર્વ દરમિયાન ઘાયલ પક્ષીઓને બચાવવા માટે કરુણા અભિયાનનું આયોજન કરવામાં આવ્યું છે. વન અને પર્યાવરણ મંત્રી અર્જુન મોઢવાડિયાએ આ અંગે માહિતી આપતા જણાવ્યું કે આગામી ૧૦ થી ૨૦ જાન્યુઆરી ૨૦૨૬ દરમિયાન આ વિશેષ અભિયાન સમગ્ર રાજ્યમાં ચલાવવામાં આવશે. પતંગની દોરીથી ઈજાગ્રસ્ત થતા અબોલ પક્ષીઓને તાત્કાલિક સારવાર આપી શકાય તે હેતુથી આયોજનબદ્ધ રીતે વિવિધ ટીમો તૈયાર કરવામાં આવી છે.
મંત્રી અર્જુન મોઢવાડિયાએ પતંગબાજોને ખાસ અપીલ કરી છે કે પક્ષીઓ સવારે અને સાંજના સમયે ખોરાક માટે વધુ પ્રમાણમાં વિચરતા હોય છે, તેથી આ સમયે પતંગ ન ચગાવવા જોઈએ. આ ઉપરાંત પ્રતિબંધિત ચાઈનીઝ દોરીનો ઉપયોગ ટાળવા પણ તેમણે નાગરિકોને અનુરોધ કર્યો છે. છેલ્લા નવ વર્ષમાં આ કરુણા અભિયાનના સફળ સંચાલનથી અત્યાર સુધીમાં ૧.૧૨ લાખથી વધુ પશુ-પક્ષીઓને રેસ્ક્યુ કરીને નવું જીવન આપવામાં આવ્યું છે.
રાજ્યવ્યાપી સારવાર કેન્દ્રોનું માળખું
કરુણા અભિયાન ૨૦૨૬ ને સફળ બનાવવા માટે રાજ્યભરમાં ૪૫૦ જેટલા કલેક્શન સેન્ટર અને ૮૫ કંટ્રોલરૂમ કાર્યરત કરવામાં આવ્યા છે. પક્ષીઓની સારવાર માટે ૪૮૦થી વધુ કેન્દ્રો તૈયાર છે, જ્યાં ઈજાગ્રસ્ત પક્ષીઓને નિષ્ણાત તબીબોની દેખરેખ હેઠળ રાખવામાં આવશે. આ સેવા યજ્ઞમાં ૭૪૦થી વધુ પશુ ચિકિત્સકો અને અંદાજે ૮,૫૦૦ જેટલા કર્મચારીઓ તેમજ સ્વયંસેવકો દિવસ-રાત પોતાની સેવાઓ આપશે.
હેલ્પલાઈન અને ટેકનિકલ સહાય
ઘાયલ પક્ષીઓની જાણકારી આપવા માટે રાજ્ય સરકારે ૧૯૬૨ હેલ્પલાઈન નંબર જાહેર કર્યો છે. વન રાજ્ય મંત્રી પ્રવીણ માળીએ જણાવ્યું કે લોકો વાઈલ્ડ લાઈફ હેલ્પલાઈન નંબર ૮૩૨૦૦ ૦૨૦૦૦ પર સંપર્ક કરીને પણ મદદ મેળવી શકશે. આ નંબર પર વોટ્સએપ દ્વારા હાઈ મેસેજ કરવાથી નજીકના સારવાર કેન્દ્રની વિગત તુરંત મળી રહેશે. જરૂરિયાતના સમયે કરુણા એમ્બ્યુલન્સ પણ સ્થળ પર પહોંચીને પક્ષીઓના બચાવ કાર્યમાં જોડાશે.
લોકભાગીદારી અને જનજાગૃતિ અભિયાન
આ અભિયાનમાં મહાનગરપાલિકાઓ, નગરપાલિકાઓ અને વિવિધ સ્વયંસેવી સંસ્થાઓનો સહયોગ લેવામાં આવી રહ્યો છે. યુવાનો અને સામાન્ય નાગરિકો પક્ષી બચાવ કાર્યમાં જોડાય તે માટે ઠેર-ઠેર જાગૃતિ કાર્યક્રમો પણ યોજાશે. વહીવટી તંત્ર દ્વારા દરેક તાલુકા કક્ષાએ નોડલ અધિકારીઓની નિમણૂક કરવામાં આવી છે, જેઓ સવારે ૭ થી સાંજે ૬ વાગ્યા સુધી કંટ્રોલરૂમ દ્વારા સમગ્ર કામગીરીનું સીધું નિરીક્ષણ કરશે.
