ગુનેગારો થથરી જશે! ગુજરાત પોલીસે લોન્ચ કરી દેશની સૌથી મોટી AI હેકાથોન, જાણો કેવી રીતે લેવો ભાગ
ગુજરાત રાજ્યની કાયદો અને વ્યવસ્થાની પરિસ્થિતિને વધુ સક્ષમ, સચોટ અને સમયસર ત્વરિત પ્રતિસાદ આપનારી (Proactive) બનાવવાના ઉદ્દેશ્ય સાથે ગુજરાત પોલીસ દ્વારા એક ઐતિહાસિક પહેલ કરવામાં આવી છે. રાજ્યમાં સુરક્ષા અને સજાગતાનું નવું મોડેલ પ્રસ્થાપિત કરવા માટે ‘ગુજરાત પોલીસ ઇનોવેશન ચેલેન્જ ૨૦૨૬’ અંતર્ગત દેશના સૌથી મોટા CCTV ઇન્ટિગ્રેશન અને આર્ટિફિશિયલ ઇન્ટેલિજન્સ (AI)-આધારિત હેકાથોનનું જાહેરાતપૂર્વક આયોજન કરવામાં આવ્યું છે.
આધુનિક યુગમાં વધતા જતાં ગુનાઓ અને જટિલ સુરક્ષા પડકારોને પહોંચી વળવા માટે હવે પરંપરાગત પોલિસિંગ પૂરતું નથી. તેથી જ, વાસ્તવિક પબ્લિક સેફ્ટીના પડકારોને ટેકનોલોજી દ્વારા સોલ્વ કરવા માટે સમગ્ર દેશમાંથી ઈનોવેટર્સ, સ્ટાર્ટઅપ્સ, સ્થાપિત ટેકનોલોજી કંપનીઓ, સોફ્ટવેર ડેવલપર્સ અને સંશોધકોને એક જ મંચ પર લાવવાનો આ નવતર પ્રયાસ છે.
રાજ્યના પોલીસ વડા (DGP) જી. એસ. મલિકના પ્રત્યક્ષ માર્ગદર્શન હેઠળ શરૂ કરાયેલી આ યોજનાનો મુખ્ય ધ્યેય AI આધારિત એડવાન્સ વિડિયો એનાલિટિક્સ વિકસાવીને ગુજરાતને દેશનું સૌથી સુરક્ષિત રાજ્ય બનાવવાનો છે.
૮૦,૦૦૦ થી વધુ CCTV કેમેરા લિંક થશે: એક જ નેટવર્ક પર આખું રાજ્ય
આ હેકાથોનનો સૌથી મોટો અને મહત્વકાંક્ષી લક્ષ્યાંક રાજ્યભરમાં ફેલાયેલા ૮૦,૦૦૦ થી વધુ CCTV કેમેરાઓને એક જ સિંગલ નેટવર્ક પર લિંક કરવાનો છે.
હાલમાં વિવિધ સરકારી વિભાગો, સ્થાનિક સ્વરાજ્યની સંસ્થાઓ અને પોલીસ તંત્ર દ્વારા અલગ-અલગ વેન્ડર્સ, ટેકનોલોજી સોફ્ટવેર, વીડિયો મેનેજમેન્ટ સિસ્ટમ (VMS) પ્લેટફોર્મ્સ અને નેટવર્ક આર્કિટેક્ચર પર કેમેરાઓ ચલાવવામાં આવી રહ્યા છે. આ બધા સિસ્ટમ્સ અલગ હોવાથી ડેટા ટ્રેકિંગ અને તપાસમાં ઘણી વાર વિલંબ થાય છે.
આ હેકાથોન દ્વારા એવા સ્કેલેબલ અને મજબૂત સોફ્ટવેર સોલ્યુશન્સ શોધવામાં આવશે, જે આ તમામ વૈવિધ્યસભર કેમેરા સિસ્ટમ્સને એક છત નીચે લાવી શકે. આનાથી રાજ્યમાં એક અત્યંત ઝડપી, સુરક્ષિત અને અતિ-આધુનિક ‘પબ્લિક સેફ્ટી ઇકોસિસ્ટમ’નું નિર્માણ થશે.
રૂ. ૩૭ લાખના પુરસ્કારો અને દેશમાં પહેલી વાર ‘લાઇવ CCTV ફીડ’ પર કામ કરવાનો અનુભવ
સીસીટીવી ઇન્ટિગ્રેશન અને AI-આધારિત વિડિયો એનાલિટિક્સ ક્ષેત્રે ભારતની આ અત્યાર સુધીની સૌથી મોટી હેકાથોન માનવામાં આવી રહી છે.
-
રૂ. ૩૭ લાખના રોકડ પુરસ્કારો: આ સ્પર્ધામાં શ્રેષ્ઠ અને સૌથી વ્યવહારુ AI સોલ્યુશન્સ રજૂ કરનારી વિજેતા ટીમોને કુલ રૂ. ૩૭ લાખના આકર્ષક રોકડ પુરસ્કારો આપવામાં આવશે.
-
રિયલ-ટાઇમ લાઈવ ટેસ્ટિંગ: આ હેકાથોન માત્ર કાગળ પર કે લેબ પૂરતી મર્યાદિત નહીં રહે. દેશમાં સર્વપ્રથમ વખત સ્પર્ધકોને વાસ્તવિક પરિસ્થિતિમાં કામ કરવાનો અનુભવ આપવા માટે લાઇવ સીસીટીવી કેમેરા ફીડ્સ પૂરી પાડવામાં આવશે.
સ્પર્ધકો દ્વારા તૈયાર કરવામાં આવેલા AI અલ્ગોરિધમ્સનું વાસ્તવિક સમયમાં (Real-time) પરીક્ષણ કરવામાં આવશે, જેથી સોફ્ટવેરની સચોટતા અને ઝડપ ચકાસી શકાય.
શંકાસ્પદ ગતિવિધિઓ અને વાહનોનું ઓટોમેટિક ટ્રેકિંગ
ગુજરાત પોલીસ દ્વારા સ્પર્ધકો સામે કેટલીક જટિલ સિક્યોરિટી ચેલેન્જીસ મુકવામાં આવી છે, જેના માટે AI અલ્ગોરિધમ્સ તૈયાર કરવાના રહેશે:
૧. રિયલ-ટાઇમ એલર્ટ સિસ્ટમ: ભીડમાં શંકાસ્પદ વ્યક્તિઓ, લાવારિસ વસ્તુઓ અથવા અસામાન્ય ગતિવિધિઓ રડારમાં આવતા જ પોલીસ કંટ્રોલ રૂમને તાત્કાલિક એલર્ટ મળવું.
૨. ઓટોમેટિક નંબર પ્લેટ રેકગ્નિશન (ANPR): ગુનાખોરી કે ટ્રાફિક નિયમોના ભંગમાં સંડોવાયેલા વાહનોની નંબર પ્લેટ મેળવીને તેને ટ્રેક કરવી.
૩. વ્હીકલ ટ્રેકિંગ અને ક્રોસ-કેમેરા સર્ચ: કોઈ ચોક્કસ વાહન એક કેમેરાથી બીજા કેમેરાની રેન્જમાં ક્યાં ગયું તે રિયલ-ટાઇમ મેપ કરવું.
૪. વોચલિસ્ટ મેચિંગ: ગુનેગારો અથવા ગુમ થયેલા લોકોની છબીઓને કેમેરા ફીડ સાથે સરખાવીને ક્ષણવારમાં ફેસ-મેચિંગ કરવું.
બે તબક્કામાં યોજાશે સ્પર્ધા: નાના સ્ટાર્ટઅપથી લઈને મોટી કંપનીઓને તક
હેકાથોનની પસંદગી પ્રક્રિયા અત્યંત પારદર્શક અને સ્પર્ધાત્મક રાખવામાં આવી છે. તેને મુખ્યત્વે બે તબક્કામાં (Two Stages) વહેંચવામાં આવી છે:
સ્ટેજ ૧: ઓપન ઇનોવેશન ચેલેન્જ
આ તબક્કામાં દેશભરમાંથી અરજીઓ મંગાવવામાં આવશે. તમામ સ્પર્ધકોને બે મુખ્ય કેટેગરીમાં વર્ગીકૃત કરવામાં આવશે:
-
કેટેગરી-૧: કોલેજના વિદ્યાર્થીઓ, સંશોધકો અને નાના તથા મધ્યમ કક્ષાના સ્ટાર્ટઅપ્સ.
-
કેટેગરી-૨: મોટું રોકાણ ધરાવતા પ્રોફેશનલ સ્ટાર્ટઅપ્સ અને સ્થાપિત આઈટી/ટેકનોલોજી કંપનીઓ.
સ્ટેજ ૨: ગ્રાન્ડ ફિનાલે
સ્ટેજ-૧ માંથી સૌથી શ્રેષ્ઠ પ્રદર્શન કરનારી ટોચની ૬ ટીમોની પસંદગી ફિનાલે માટે કરવામાં આવશે. ફિનાલેમાં આ ટીમોએ ગુજરાત પોલીસના લાઇવ પ્રોડક્શન એન્વાયર્નમેન્ટમાં વાસ્તવિક પોલિસિંગ સિનારિયો (Live Scenario) સાથે પોતે બનાવેલા સોફ્ટવેરનું પ્રત્યક્ષ ડેમોન્સ્ટ્રેશન (Demo) આપવું પડશે.
દેશની પ્રતિષ્ઠિત સંસ્થાઓનું નોલેજ અને ટેકનોલોજી પાર્ટનરશિપ
આ વિશાળ પ્રોજેક્ટને સફળ બનાવવા અને ટેકનિકલ માર્ગદર્શન આપવા માટે દેશની અગ્રણી સંસ્થાઓને સાથે જોડવામાં આવી છે:
-
ટેકનોલોજી પાર્ટનર: i-Hub (ગુજરાત)
-
નોલેજ પાર્ટનર્સ: ડીએ-આઈઆઈસીટી (DA-IICT, ગાંધીનગર) અને નેશનલ ફોરેન્સિક સાયન્સિસ યુનિવર્સિટી (NFSU).
આ સંસ્થાઓના સમર્થનથી સ્પર્ધકોને યોગ્ય ટેકનિકલ મેન્ટરશિપ મળશે અને પોલીસ ડિપાર્ટમેન્ટને વૈજ્ઞાનિક દ્રષ્ટિકોણથી સચોટ સોલ્યુશન્સ પ્રાપ્ત થશે.
રજિસ્ટ્રેશન અને સમયપત્રક
આ હેકાથોનમાં ભાગ લેવા ઈચ્છુક સ્પર્ધકો, સ્ટાર્ટઅપ્સ અને કંપનીઓ માટે તમામ માહિતી, નિયમો, પાત્રતાના માપદંડો અને માર્ગદર્શિકા સત્તાવાર પોર્ટલ [https://sentinel.gujarat.gov.in](https://sentinel.gujarat.gov.in) પર ઉપલબ્ધ કરાવવામાં આવ્યા છે.
આગામી સંભવિત સપ્ટેમ્બર મહિનામાં આ હેકાથોનનો સત્તાવાર પ્રારંભ થશે અને સ્પર્ધકો પોતપોતાના મોડેલ્સ સબમિટ કરી શકશે.
