શિક્ષણથી આત્મનિર્ભરતા તરફ: કસ્તુરબા ગાંધી બાલિકા વિદ્યાલયમાં ધોરણ 10થી 12 માટે કેરિયર માર્ગદર્શન
અમદાવાદ જિલ્લા મહિલા અને બાળ અધિકારીની કચેરી દ્વારા ‘બેટી બચાવો, બેટી પઢાવો’ યોજના અંતર્ગત બગોદરા સ્થિત કસ્તુરબા ગાંધી બાલિકા વિદ્યાલય (KGBV) ખાતે એક વિશેષ કેરિયર કાઉન્સેલિંગ કાર્યક્રમનું આયોજન કરવામાં આવ્યું હતું. આ કાર્યક્રમનો મુખ્ય હેતુ ધોરણ ૧૦ થી ૧૨ની વિદ્યાર્થીનીઓને અભ્યાસ પૂર્ણ કર્યા બાદ કારકિર્દીના સાચા માર્ગની પસંદગી કરવામાં મદદરૂપ થવાનો અને તેમને આત્મનિર્ભર બનાવવાનો હતો.
વ્યવસાયિક અભ્યાસક્રમો અને કૌશલ્ય વર્ધન પર ભાર
કાર્યક્રમમાં આઈ.ટી.આઈ. (ITI) બાવળા અને અમદાવાદ રોજગાર કચેરીના નિષ્ણાતોએ વિદ્યાર્થીનીઓને ટેક્નિકલ અને નોન-ટેક્નિકલ ક્ષેત્રમાં રહેલી વિપુલ તકો વિશે માહિતગાર કરી હતી. તેમણે સમજાવ્યું હતું કે માત્ર ડિગ્રી જ નહીં, પરંતુ વર્તમાન સમયમાં કૌશલ્ય વર્ધન (Skill Development) કોર્સ દ્વારા પણ ટૂંકા સમયમાં સારી રોજગારી મેળવી શકાય છે. સરકારી અને ખાનગી ક્ષેત્રમાં નોકરીની શક્યતાઓ વિશે પણ વિસ્તૃત ચર્ચા કરવામાં આવી હતી.
મહિલા સશક્તિકરણ અને સરકારી યોજનાઓ
‘સંકલ્પ હબ ફોર એમ્પાવરમેન્ટ ઓફ વિમેન’ ની ટીમ દ્વારા દીકરીઓને મહિલાલક્ષી વિવિધ કલ્યાણકારી યોજનાઓની જાણકારી આપવામાં આવી હતી. આ ટીમ દ્વારા વિદ્યાર્થીનીઓને સ્વાવલંબન માટેના ઉપક્રમો અને સરકાર દ્વારા મળતી આર્થિક તથા શૈક્ષણિક સહાય વિશે માર્ગદર્શન અપાયું હતું. વિદ્યાર્થીનીઓનો આત્મવિશ્વાસ વધારવા માટે વ્યક્તિગત કાઉન્સેલિંગ સેશન પણ યોજાયા હતા, જેમાં દીકરીઓની મૂંઝવણોનું નિરાકરણ લાવવામાં આવ્યું હતું.
સ્પર્ધાત્મક પરીક્ષાઓની તૈયારી માટે માર્ગદર્શન
આજના યુગમાં સરકારી સેવામાં જોડાવા માટે સ્પર્ધાત્મક પરીક્ષાઓનું મહત્વ સમજાવતા નિષ્ણાતોએ પરીક્ષાની તૈયારી માટેની પદ્ધતિઓ અને ટિપ્સ આપી હતી. મક્કમ નિર્ધાર અને ચોક્કસ આયોજન સાથે કેવી રીતે સફળતા મેળવી શકાય તે અંગે દીકરીઓને પ્રોત્સાહિત કરવામાં આવી હતી. આ પ્રસંગે શાળાના વોર્ડન અને સ્ટાફની ઉપસ્થિતિમાં મોટી સંખ્યામાં વિદ્યાર્થીનીઓએ આ માર્ગદર્શનનો લાભ લીધો હતો.
