ગાઝા તસ્કરી કાંડ: ઇઝરાયેલી સૈનિકો પર હમાસને ફાયદો પહોંચાડવાનો આરોપ, સુરક્ષા તંત્ર સામે ઉઠ્યા સવાલ
ઇઝરાયેલમાં એક એવો કિસ્સો સામે આવ્યો છે જેણે યુદ્ધ સમયની સુરક્ષા વ્યવસ્થા અને સેનાની જવાબદારી પર ગંભીર સવાલો ઉભા કર્યા છે. ગાઝામાં ગેરકાયદેસર તસ્કરીના એક મોટા નેટવર્કનો ખુલાસો થયો છે, જેમાં ઇઝરાયેલી સેનાના સક્રિય સૈનિકો અને રિઝર્વ ફોર્સના જવાનોની સંડોવણી હોવાનો આરોપ લાગ્યો છે.
ઇઝરાયેલના ન્યાય મંત્રાલયના જણાવ્યા અનુસાર, આ નેટવર્ક દ્વારા યુદ્ધ દરમિયાન ગાઝામાં પ્રતિબંધિત અને મોંઘી વસ્તુઓની તસ્કરી કરવામાં આવી હતી, જેનાથી આતંકી સંગઠન હમાસને પરોક્ષ રીતે ફાયદો પહોંચ્યો હોવાની આશંકા છે.
લાખો ડોલરના સામાનની ગેરકાયદે સપ્લાય
સરકારી વકીલોએ જણાવ્યું હતું કે આ કેસમાં આશરે એક ડઝન જેટલા લોકો સામે ગુનો નોંધવામાં આવ્યો છે. આરોપ છે કે આ લોકોએ સિગારેટ, આઇફોન, બેટરી, સંચાર ઉપકરણોના વાયર અને કારના સ્પેરપાર્ટ્સ જેવી વસ્તુઓ ગાઝા પહોંચાડી હતી. પ્રોસિક્યુટર ઓફિસનું કહેવું છે કે આરોપીઓ જાણતા હતા કે આ સામાન હમાસ અથવા તેની સાથે જોડાયેલા લડવૈયાઓ સુધી પહોંચી શકે છે.
યુદ્ધ વચ્ચે કેવી રીતે ચાલતું હતું તસ્કરી નેટવર્ક?
સ્થાનિક મીડિયા રિપોર્ટ્સ મુજબ, ઇઝરાયેલ-ગાઝા સરહદ પર દેખરેખમાં ખામી હોવાને કારણે આ તસ્કરી શક્ય બની હતી. ઇઝરાયેલી અખબાર ‘હાઆરેત્ઝ’ (Haaretz) એ દાવો કર્યો છે કે સક્રિય ડ્યુટી પરના સૈનિકો અને રિઝર્વ જવાનોની અંદરોઅંદરની મિલીભગતથી આ નેટવર્ક લાંબા સમય સુધી ચાલતું રહ્યું હતું. ઉલ્લેખનીય છે કે યુદ્ધ દરમિયાન ગાઝામાં માનવીય સહાય પર પણ કડક નજર રાખવામાં આવે છે.
સીલબંધ ટ્રકો દ્વારા પહોંચાડવામાં આવતો સામાન
એસિસોએટેડ પ્રેસ (AP) ને પ્રાપ્ત થયેલા ગાઝા ચેમ્બર ઓફ કોમર્સના આંતરિક રિપોર્ટ મુજબ, સીલબંધ ઇઝરાયેલી ટ્રકો દ્વારા મોંઘી પ્રોડક્ટ્સ ગાઝા મોકલવામાં આવી રહી હતી. આ ટ્રકો સત્તાવાર ક્રોસિંગ પોઈન્ટ્સને બદલે ઇઝરાયેલમાં હાજર અજ્ઞાત સંપર્કો સાથે તાલમેલ સાધીને સરહદ પાર કરાવવામાં આવતા હતા. અહેવાલમાં દાવો કરવામાં આવ્યો છે કે દરેક ખેપ પર વસૂલવામાં આવતી ગેરકાયદે ફી લાખો ડોલર સુધી પહોંચી શકતી હતી.
ખુફિયા એજન્સીના વડાના ભાઈનું નામ ઉછળ્યું
આ મામલે ત્યારે ગંભીર વળાંક આવ્યો જ્યારે પ્રોસિક્યુટર્સના નિવેદનમાં ઇઝરાયેલની સ્થાનિક ગુપ્તચર એજન્સી શિન બેટ (Shin Bet) ના વડા ડેવિડ જિનીના ભાઈ, બેઝાલેલ જિનીનું નામ સામે આવ્યું. આરોપ છે કે તેમણે કથિત રીતે લાંચ લઈને સિગારેટની તસ્કરીમાં ભૂમિકા ભજવી હતી. જોકે, બેઝાલેલ જિની સામે હજુ સુધી સત્તાવાર આરોપો ઘડવામાં આવ્યા નથી અને તેમના વકીલે તમામ આરોપોને પાયાવિહોણા ગણાવ્યા છે.
મિલકત જપ્તીની માંગ
પ્રોસિક્યુટર ઓફિસે કોર્ટ પાસે આરોપીઓની મિલકતો—જેમાં વાહનો, સ્થાવર મિલકત અને રોકડનો સમાવેશ થાય છે—જપ્ત કરવાની માંગ કરી છે. અધિકારીઓનું કહેવું છે કે ગેરકાયદે નેટવર્કની આર્થિક કરોડરજ્જુ તોડવા માટે આ પગલું જરૂરી છે.
સેના અને સિસ્ટમની વિશ્વસનીયતા પર અસર
આ કેસ એવા સમયે સામે આવ્યો છે જ્યારે ઇઝરાયેલ યુદ્ધની સ્થિતિમાં છે. નિષ્ણાતો માને છે કે જો આરોપો સાબિત થશે, તો તે માત્ર સેનાની આંતરિક દેખરેખ પ્રણાલી પર જ સવાલ નહીં ઉઠાવે, પરંતુ તે પણ દર્શાવશે કે યુદ્ધકાલીન પરિસ્થિતિમાં ભ્રષ્ટાચાર સુરક્ષા માટે કેટલો મોટો ખતરો બની શકે છે.
