કંટ્રોલરૂમથી માર્ગદર્શન અને સીસીટીવી દેખરેખ, બોર્ડ પરીક્ષામાં વિદ્યાર્થી સુવિધા માટે જિલ્લા તંત્રની વ્યાપક તૈયારી
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા લેવામાં આવતી ધોરણ-૧૦ અને ૧૨ની પરીક્ષાઓનો આજથી રાજ્યભરમાં પ્રારંભ થયો છે. આ અવસરે આણંદના જિલ્લા કલેક્ટર પ્રવીણ ચૌધરીએ આણંદ હાઈસ્કૂલની મુલાકાત લીધી હતી. તેમણે પરીક્ષા આપવા આવેલા વિદ્યાર્થીઓને ગુલાબનું ફૂલ આપીને પ્રોત્સાહિત કર્યા હતા અને કોઈપણ પ્રકારના ડર વગર શાંત ચિત્તે પેપર લખવા માટે આત્મવિશ્વાસ પૂરો પાડ્યો હતો.
૫૦,૦૦૦થી વધુ વિદ્યાર્થીઓ માટે વહીવટી તંત્રની ખાસ વ્યવસ્થા
આણંદ જિલ્લામાં આ વર્ષે ધોરણ ૧૦ અને ૧૨ના મળીને કુલ ૫૦,૯૬૬ વિદ્યાર્થીઓ પરીક્ષા આપી રહ્યા છે. જિલ્લા વહીવટી તંત્ર દ્વારા તમામ કેન્દ્રો પર વિદ્યાર્થીઓને સુવિધા રહે તેવું સુદ્રઢ આયોજન કરવામાં આવ્યું છે. કલેક્ટરશ્રીએ જણાવ્યું હતું કે પરીક્ષા કેન્દ્રો પર બેઠક વ્યવસ્થા, શુદ્ધ પીવાનું પાણી અને શાંતિપૂર્ણ વાતાવરણ જળવાઈ રહે તે માટે શિક્ષણ વિભાગ અને વહીવટી તંત્ર સતત કાર્યરત છે.
વાલીઓ અને વિદ્યાર્થીઓ માટે હેલ્પલાઈન અને કંટ્રોલરૂમની સુવિધા
પરીક્ષાલક્ષી કોઈપણ મૂંઝવણ કે માર્ગદર્શન માટે જિલ્લા શિક્ષણ અધિકારીની કચેરી ખાતે ખાસ કંટ્રોલરૂમ શરૂ કરવામાં આવ્યો છે. કલેક્ટરશ્રીએ વાલીઓને અનુરોધ કર્યો છે કે જો કોઈ માર્ગદર્શનની જરૂર હોય તો તેઓ કંટ્રોલરૂમ નંબર ૦૨૬૯૨ ૨૬૪૧૫૩ પર સંપર્ક કરી શકે છે. આ સુવિધા પરીક્ષા દરમિયાન વિદ્યાર્થીઓનો માનસિક તણાવ ઓછો કરવામાં મદદરૂપ થશે.
સીસીટીવી અને ચુસ્ત પોલીસ બંદોબસ્ત વચ્ચે પરીક્ષાનું આયોજન
સમગ્ર જિલ્લામાં પરીક્ષાની પારદર્શિતા જળવાઈ રહે તે માટે દરેક કેન્દ્ર પર સીસીટીવી કેમેરા દ્વારા દેખરેખ રાખવામાં આવી રહી છે. આ ઉપરાંત, કોઈપણ અઘટિત ઘટના ન બને તે માટે કેન્દ્રો પર ચુસ્ત પોલીસ બંદોબસ્ત પણ ગોઠવવામાં આવ્યો છે. આ પ્રસંગે જિલ્લા શિક્ષણ અધિકારી ડો. અર્ચનાબેન પ્રજાપતિ સહિત શિક્ષણ વિભાગના ઉચ્ચ અધિકારીઓ અને શિક્ષકો હાજર રહ્યા હતા અને વિદ્યાર્થીઓને ઉજ્જવળ ભવિષ્ય માટે શુભેચ્છાઓ પાઠવી હતી.
