જિલ્લા પંચાયતથી કલેક્ટર કચેરી સુધી મહિલા નેતૃત્વ: આણંદમાં નારી શક્તિ બની વિકાસની મજબૂત કડી
આંતરરાષ્ટ્રીય મહિલા દિવસના અવસરે આણંદ જિલ્લો વહીવટી ક્ષેત્રે ‘નારી શક્તિ’ના એક અનોખા કેન્દ્ર તરીકે ઉભરી આવ્યો છે. અહીં જિલ્લા પંચાયતથી લઈને કલેક્ટર કચેરી સુધીના મહત્વના હોદ્દાઓ પર મહિલા અધિકારીઓ બિરાજમાન છે. આ અધિકારીઓએ માત્ર હોદ્દાની ગરિમા જ નથી જાળવી, પરંતુ રાજ્ય સરકારની લોકકલ્યાણકારી યોજનાઓને છેવાડાના ગામડાઓ સુધી પહોંચાડવા માટે એક મજબૂત કડી તરીકે કામ કર્યું છે. વહીવટી તંત્રમાં વર્ગ-1 અને વર્ગ-2 ના હોદ્દા પર કાર્યરત આ મહિલાઓ આજે સમગ્ર સમાજ માટે પ્રેરણાનું જીવંત પ્રતીક બની છે.
જિલ્લા વિકાસ અધિકારી દેવાહુતીના નેતૃત્વમાં ગ્રામીણ ઉત્થાન
આણંદ જિલ્લાના ગ્રામ્ય વિકાસના સારથિ તરીકે જિલ્લા વિકાસ અધિકારી (DDO) દેવાહુતી (IAS) એક મક્કમ અને સંવેદનશીલ નેતૃત્વ પૂરું પાડી રહ્યા છે. તેમના માર્ગદર્શન હેઠળ જિલ્લા પંચાયતના તમામ વિભાગો એકસૂત્રતાથી કામ કરી રહ્યા છે, જેના કારણે કુપોષણ મુક્તિ, શિક્ષણ અને આરોગ્ય જેવી પાયાની સુવિધાઓ વધુ સુદ્રઢ બની છે. ખાસ કરીને છેવાડાના માનવીને વિકાસની મુખ્ય ધારામાં જોડવાની તેમની પ્રતિબદ્ધતા અને પારદર્શી વહીવટી શૈલીને કારણે આણંદ જિલ્લા પંચાયત આજે વહીવટી ક્ષેત્રે નવા આયામો સર કરી રહી છે.
વિવિધ સરકારી વિભાગોમાં મહિલા અધિકારીઓનું વર્ચસ્વ
જિલ્લા પંચાયત અને કલેક્ટર કચેરીના વિવિધ વિભાગોમાં મહિલા અધિકારીઓ પોતાનું સામર્થ્ય સાબિત કરી રહ્યા છે. નાયબ કલેક્ટર હેતલબેન ભાલીયા, જિલ્લા પુરવઠા અધિકારી જીજ્ઞા શાહ અને નાયબ ડીડીઓ રૂબી સિંહ રાજપુત જેવા અધિકારીઓ જનતાના પ્રશ્નોના નિકાલ માટે કાર્યરત છે. શિક્ષણ ક્ષેત્રે અર્ચનાબેન પ્રજાપતિ, આરોગ્યમાં ડો. પૂર્વી નાયક અને મહિલા-બાળ વિકાસમાં તેજલબેન ગોસ્વામી જેવા નિષ્ણાતો પાયાના સ્તરે પરિવર્તન લાવી રહ્યા છે. આ ઉપરાંત વન વિભાગ, બાગાયત, મત્સ્યોદ્યોગ અને તિજોરી કચેરી જેવા વિભાગોમાં પણ મહિલાઓ કુશળતાપૂર્વક કાર્યભાર સંભાળી રહી છે.
ફિલ્ડ વર્ક અને સંવેદનશીલ અભિગમ દ્વારા લોકસેવા
આણંદ જિલ્લામાં કાયદો અને વ્યવસ્થા જાળવવામાં ડીવાયએસપી (DySP) રિદ્ધિ ગુપ્તે મહત્વની ભૂમિકા ભજવી રહ્યા છે, તો બીજી તરફ ઇજનેરી અને નગરપાલિકાના વહીવટમાં પણ મહિલાઓ અગ્રેસર છે. આ તમામ મહિલા અધિકારીઓની સૌથી મોટી વિશેષતા એ છે કે તેઓ યોજનાકીય લાભો સાચા લાભાર્થી સુધી પહોંચાડવા માટે અત્યંત સંવેદનશીલ છે. તેમની કામ કરવાની શૈલીમાં માનવીય અભિગમ અને વહીવટી કડકાઈનો અદભૂત સમન્વય જોવા મળે છે. આંતરરાષ્ટ્રીય મહિલા દિવસે ફિલ્ડ પર રહીને લોકકલ્યાણના કામોને વેગ આપતી આ તમામ મહિલા અધિકારીઓની કામગીરી વંદનીય છે.
