બે બ્લોક, જનસેવા કેન્દ્ર, ઈ-ધરા અને પાર્કિંગ સુવિધા સાથે આણંદમાં તૈયાર થઈ રહ્યું છે અધ્યતન મહેસૂલી ભવન
આણંદ-સોજીત્રા રોડ પર નિર્માણ પામી રહેલા નવા મહેસૂલી ભવનની કામગીરી હાલ પુરજોશમાં ચાલી રહી છે. મહેસૂલ વિભાગના અધિક મુખ્ય સચિવ ડો. જયંતિ એસ. રવિએ આ ભવનની મુલાકાત લઈ નિર્માણ કાર્યની સમીક્ષા કરી હતી. તેમણે ખાસ કરીને દિવ્યાંગ નાગરિકો માટે રાખવામાં આવેલી વિશેષ સુવિધાઓ અને વહીવટી સરળતા માટેના આયોજન અંગે ઝીણવટભરી જાણકારી મેળવી હતી. આ નવું ભવન આધુનિક સરકારી કાર્ય સંસ્કૃતિનું ઉત્તમ ઉદાહરણ બનશે.
વહીવટી સુવિધા અને ભવ્ય બાંધકામ
આણંદના કલેક્ટર પ્રવીણ ચૌધરીએ જણાવ્યું હતું કે, માર્ચ ૨૦૨૬ સુધીમાં તૈયાર થનારા આ ભવનમાં બ્લોક-એ અને બ્લોક-બી એમ બે વિભાગો રહેશે. અહીં પ્રાંત અધિકારીની કચેરી, શહેર અને ગ્રામ્ય મામલતદાર કચેરી, જનસેવા કેન્દ્ર, સીટી સર્વે અને સબ-રજિસ્ટ્રાર કચેરી જેવી મહત્વની કચેરીઓ એક જ છત નીચે આવશે. અંદાજે ૧૭૪ જેટલા અધિકારી-કર્મચારીઓ માટે અહીં બેસવાની અદ્યતન વ્યવસ્થા કરવામાં આવી છે, જેનાથી નાગરિકોના મહેસૂલી કામો ઝડપથી પૂર્ણ થશે.
આધુનિક માળખાગત સુવિધાઓ
માર્ગ અને મકાન વિભાગના કાર્યપાલક ઇજનેર હિતેશ ગઢવીએ માહિતી આપતા જણાવ્યું કે, ૮૭૧૮ ચોરસ મીટર જમીનમાં ફેલાયેલા આ કેમ્પસમાં કુલ ૪૯૭૫ ચોરસ મીટરનું બાંધકામ કરવામાં આવ્યું છે. ભવનમાં ૧૦૦થી વધુ લોકોની ક્ષમતા ધરાવતું જનસેવા કેન્દ્ર, ઈ-ધરા કેન્દ્ર, ત્રણ કોન્ફરન્સ રૂમ અને ૧૩ વ્યક્તિની ક્ષમતા ધરાવતી લિફ્ટની સુવિધા છે. આ ઉપરાંત પર્યાવરણની જાળવણી માટે રેન વોટર હાર્વેસ્ટિંગ સિસ્ટમ અને અદ્યતન ફાયર સેફ્ટી સિસ્ટમ પણ સ્થાપિત કરવામાં આવી છે.
દિવ્યાંગજનો માટે આણંદનું પ્રથમ ‘એક્સેસિબલ’ કેમ્પસ
નવા મહેસૂલી ભવનની સૌથી મોટી વિશેષતા તેની દિવ્યાંગ મૈત્રીપૂર્ણ ડિઝાઇન છે. દિવ્યાંગો માટે અલગ પાર્કિંગ, રેમ્પ, ટેકટાઈલ ફ્લોરિંગ (દ્રષ્ટિહીન વ્યક્તિઓ માટે ખાસ લાદી), બ્રેઈલ સાઈનેજિસ, વ્હીલચેર અને અલગ શૌચાલયની વ્યવસ્થા કરવામાં આવી છે. દરેક માળ પર સ્ત્રી, પુરુષ અને દિવ્યાંગો માટે અલગ ટોયલેટ બ્લોકની સુવિધા ઉપલબ્ધ છે. આણંદ જિલ્લાનું આ પ્રથમ એવું સરકારી કેમ્પસ હશે જ્યાં દિવ્યાંગો માટે સંપૂર્ણ સુવિધાઓનું ધ્યાન રાખવામાં આવ્યું છે.
આ મુલાકાત સમયે મદદનીશ કલેક્ટર હિરેન બારોટ અને અન્ય ઉચ્ચ અધિકારીઓ હાજર રહ્યા હતા. આ ભવન કાર્યરત થવાથી આણંદના નાગરિકોને વહીવટી પ્રક્રિયામાં મોટી રાહત મળશે અને એક જ સ્થળે તમામ મહેસૂલી સેવાઓ ઉપલબ્ધ થશે.
