બારડોલી વિધાનસભાના ૩૩ ગામોમાં ઘન કચરા વ્યવસ્થાપન પ્રણાલીનો પ્રારંભ અને રૂ.૬.૬૭ કરોડના વિકાસકામોનું લોકાર્પણ

પ્રમુખ ભાવિનીબેન પટેલ અને ધારાસભ્ય ઈશ્વરભાઈ પરમારના હસ્તે ઘન કચરા વ્યવસ્થાપન પ્રણાલીનું લોકાર્પણ

સુરત જિલ્લા પંચાયત દ્વારા ગ્રામીણ વિસ્તારોમાં સ્વચ્છતા અને સુવિધાઓ વધારવા માટે એક મોટું અભિયાન શરૂ કરવામાં આવ્યું છે. બારડોલીના ઈસરોલી ખાતેથી ૩૩ ગામોમાં ‘ઘન કચરા વ્યવસ્થાપન પ્રણાલી’નો શુભારંભ કરવામાં આવ્યો હતો. આ પ્રસંગે જિલ્લા પંચાયતના પ્રમુખ શ્રીમતી ભાવિનીબેન પટેલ અને ધારાસભ્ય શ્રી ઈશ્વરભાઈ પરમારના હસ્તે કુલ રૂ. ૬.૬૭ કરોડના વિવિધ વિકાસકામોનું લોકાર્પણ અને ખાતમુહૂર્ત કરવામાં આવ્યું હતું. વહીવટી તંત્ર દ્વારા કચરો એકત્રિત કરવા માટે આધુનિક ઈ-વ્હીકલને લીલી ઝંડી આપી પ્રસ્થાન કરાવવામાં આવ્યું હતું.

છેવાડાના માનવી સુધી સુવિધાઓ પહોંચાડવા જિલ્લા પંચાયત કટિબદ્ધ

કાર્યક્રમ દરમિયાન શ્રીમતી ભાવિનીબેન પટેલે જણાવ્યું હતું કે, જિલ્લા પંચાયત એ વિકાસનું મુખ્ય કેન્દ્ર છે અને અમારો હેતુ દરેક છેવાડાના ગામ સુધી માળખાકીય સુવિધાઓ પહોંચાડવાનો છે. તેમણે “સ્વચ્છતા ત્યાં પ્રભુતા”ના મંત્રને યાદ અપાવતા કહ્યું કે, ગામ અને મહોલ્લાને સ્વચ્છ રાખવા માટે સરકારની સાથે લોકોનો સહકાર પણ જરૂરી છે. આ સાથે તેમણે સરકારી યોજનાઓ જેવી કે આયુષ્માન કાર્ડ, પ્રધાનમંત્રી આવાસ યોજના અને ૧૦૦ ટકા શાળા નામાંકન જેવી બાબતો પર ભાર મૂકી દરેક પરિવારને સુરક્ષિત બનાવવા અનુરોધ કર્યો હતો.

ગ્રામીણ ઈન્ફ્રાસ્ટ્રક્ચર મજબૂત બન્યું: ૫ વર્ષમાં અનેક નવી શાળાઓ અને આંગણવાડીઓ તૈયાર

ધારાસભ્ય શ્રી ઈશ્વરભાઈ પરમારે સુરત જિલ્લામાં થયેલા વિકાસના આંકડા રજૂ કરતા જણાવ્યું કે, છેલ્લા પાંચ વર્ષમાં જિલ્લામાં ૨૩૬ પંચાયત ઘર, ૨૪૨ આંગણવાડી અને આશરે ૬૮ જેટલા આરોગ્ય મંદિરોનું નિર્માણ કરવામાં આવ્યું છે. શિક્ષણ ક્ષેત્રે પણ ૫૦૦થી વધુ શાળાઓમાં નવા ઓરડાઓ બનાવીને પાયાની સુવિધાઓ વધુ મજબૂત કરવામાં આવી છે. આ કામગીરીના પરિણામે ગ્રામીણ વિસ્તારોમાં લોકોના જીવનસ્તરમાં મોટો સુધારો જોવા મળી રહ્યો છે.

સુરતના મોટા વરાછામાં માનવતાને શરમાવતી ઘટના: દિવ્યાંગ વ્યક્તિની કેબિનને તસ્કરોએ બનાવી નિશાન

એકસાથે અનેક ગુનાઓનો ભેદ ઉકેલાયો! ઉત્રાણ પોલીસે કરી વાહન ચોર અને પોક્સો આરોપીની ધરપકડ

જનજાગૃતિ અને સક્રિય મોનિટરિંગથી બદલાશે ગામડા

સ્વચ્છતા અંગે વિશેષ ભાર મૂકતા ધારાસભ્યશ્રીએ ચૂંટાયેલા પ્રતિનિધિઓને સતત મોનિટરિંગ કરવા અપીલ કરી હતી. તેમણે નાગરિકોને જાહેર માર્ગો પર કચરો ન ફેંકવા અને ડસ્ટબિનનો ઉપયોગ કરવાની ટેવ પાડવા વિનંતી કરી હતી. ઈસરોલી ખાતે આયોજિત આ કાર્યક્રમમાં જિલ્લા વિકાસ અધિકારી શિવાની ગોયલ સહિત અનેક પદાધિકારીઓ હાજર રહ્યા હતા. આ નવી પહેલ અને વિકાસકાર્યોથી બારડોલીના ગ્રામ્ય વિસ્તારોમાં આરોગ્ય, શિક્ષણ અને સ્વચ્છતા ક્ષેત્રે નવી ક્રાંતિ આવશે.