ખેલાડીઓના દસ્તાવેજોની થશે આકરી તપાસ: બીસીસીઆઈ દ્વારા સ્વતંત્ર એજન્સીની નિમણૂક
ભારતીય ક્રિકેટમાં લાંબા સમયથી ચાલી આવતી અને યુવા તકોને હડપતી ‘ઉંમરની છેતરપિંડી’ (Age Fraud) ની ગંભીર સમસ્યા સામે ભારતીય ક્રિકેટ કંટ્રોલ બોર્ડ (BCCI) એ હવે લાલ આંખ કરી છે. બોર્ડે આ દૂષણને જડમૂળથી ઉખાડી ફેંકવા માટે એક અત્યંત મહત્વપૂર્ણ અને કડક પગલું ભર્યું છે.
તાજેતરના અહેવાલો મુજબ, બીસીસીઆઈએ ખેલાડીઓ દ્વારા રજૂ કરવામાં આવતા ઉંમર સંબંધિત તમામ દસ્તાવેજોની ઊંડાણપૂર્વક અને સ્વતંત્ર તપાસ કરવા માટે એક વિશિષ્ટ એજન્સી સાથે કરાર કર્યો છે. જો આ તપાસ દરમિયાન કોઈપણ ખેલાડીની ઉંમર ખોટી કે બનાવટી સાબિત થશે, તો તેની સામે આકરી કાર્યવાહી અને આજીવન કે લાંબા ગાળાનો પ્રતિબંધ મૂકવાની તૈયારી કરી લેવામાં આવી છે.
ફેમસ ખેલાડીઓ પણ ફસાયા છે આ વિવાદમાં
માત્ર સ્થાનિક સ્તરે જ નહીં, પરંતુ ઉંમરની છેતરપિંડીના કારણે ભૂતકાળમાં પણ ઘણા નામાંકિત ભારતીય ક્રિકેટરોની કારકિર્દી પર દાગ લાગી ચૂક્યો છે. રસિક સલામ, પ્રિન્સ યાદવ, મનજોત કાલરા અને નીતિશ રાણા જેવા જાણીતા ખેલાડીઓ ઉંમર છુપાવવાના કે ખોટા પુરાવા આપવાના વિવાદમાં ફસાયા હતા અને બોર્ડ દ્વારા તેમની સામે પ્રતિબંધ સહિતના શિસ્તભંગના પગલાં લેવામાં આવ્યા હતા.
જૂનિયર સ્તરે યોગ્ય વયના પ્રતિભાશાળી ખેલાડીઓનો હક મારવામાં આવતો હોવાની ફરિયાદો સતત મળ્યા બાદ બોર્ડે આ કડક વલણ અપનાવ્યું છે.
કેવી રીતે કામ કરશે નવી તપાસ પ્રક્રિયા?
BCCI એક એવી અત્યાધુનિક સિસ્ટમ વિકસાવી રહ્યું છે જે સિલેક્શન પ્રોસેસમાં સંપૂર્ણ પારદર્શિતા લાવશે. બોર્ડે જે સ્વતંત્ર એજન્સી સાથે હાથ મિલાવ્યા છે તે માત્ર કાગળો જોઈને નિર્ણય નહીં લે, પરંતુ ઊંડાણપૂર્વક તપાસ કરશે.
આ એજન્સી ખેલાડીઓના જન્મ પ્રમાણપત્ર (Birth Certificate), સરકારી ઓળખપત્રો અને શાળાના મૂળ રેકોર્ડ્સની રૂબરૂ તેમજ ઓનલાઈન ચકાસણી કરશે. એજન્સી ખેલાડી જે શાળામાં ભણ્યો હોય ત્યાં પહોંચીને મૂળ રજિસ્ટર અને શાળાના એડમિશન સમયના દસ્તાવેજો ચકાસશે. તમામ સ્તરેથી લીલી ઝંડી મળ્યા પછી જ ખેલાડીના દસ્તાવેજને માન્ય ગણવામાં આવશે.
ખોટા સાબિત થનાર ખેલાડી સામે શું થશે કાર્યવાહી?
જો તપાસ દરમિયાન કોઈ ખેલાડી ઉંમરની હેરાફેરી કે દસ્તાવેજોમાં ગડબડ કરવાનો દોષી ઠરશે, તો તેના પર તુરંત અસરથી પ્રતિબંધ લગાવી દેવામાં આવશે. આવો ખેલાડી કોઈપણ વય-જૂથ (Under-16, Under-19 વગેરે) કે પોતાના રાજ્યની સીનિયર ટીમ માટે રમી શકશે નહીં.
જોકે, કુદરતી ન્યાયના સિદ્ધાંત મુજબ, બીસીસીઆઈ સજા કરતા પહેલાં સંબંધિત ખેલાડીને ‘કારણ દર્શાવો નોટિસ’ (Show Cause Notice) જારી કરશે. ખેલાડીને પોતાનો પક્ષ રજૂ કરવાની અને નિર્દોષતા સાબિત કરવાની પૂરતી તક આપવામાં આવશે. પરંતુ જો તે સંતોષકારક પુરાવા આપવામાં નિષ્ફળ રહેશે, તો તેની ક્રિકેટ કારકિર્દી જોખમમાં મુકાઈ જશે.
બોર્ડ હવે ખેલાડીઓનું બાયોમેટ્રિક વેરિફિકેશન (Biometric Verification) પણ ફરજિયાત બનાવી રહ્યું છે. જે ખેલાડીઓ આગામી ડોમેસ્ટિક સીઝનમાં પોતાની ટીમ કે રાજ્ય બદલવા માગે છે, તેમણે ૧ સપ્ટેમ્બર સુધીમાં બોર્ડને તમામ જરૂરી માહિતી પૂરી પાડવી પડશે.
Rahul Dravid નો મહત્વનો રોલ: કેમ લેવાયો આ નિર્ણય?
ઉંમરની છેતરપિંડી અટકાવવાથી સૌથી વધુ ફાયદો એવા યુવા ખેલાડીઓને થશે જેઓ વાસ્તવમાં સખત મહેનત કરે છે અને સાચી ઉંમર ધરાવે છે. ઘણીવાર વધારે ઉંમર ધરાવતા ખેલાડીઓ પોતાની ઉંમર ઓછી બતાવીને જુનિયર ટીમમાં સ્થાન મેળવી લેતા હતા, જેનાથી સાચા હકદાર ખેલાડીઓ સિલેક્શનથી વંચિત રહી જતા હતા.
ભારતથી પૂર્વ કેપ્ટન અને પૂર્વ હેડ કોચ રાહુલ દ્રવિડે ભારતીય ક્રિકેટના પાયાને મજબૂત કરવા માટે આ મુદ્દો ભારપૂર્વક ઉઠાવ્યો હતો. દ્રવિડની ભલામણ બાદ જ અંડર-૧૯ વર્લ્ડ કપમાં એક ખેલાડીને માત્ર એક જ વાર રમવાની તક આપવાનો નિયમ અમલમાં આવ્યો હતો.
નિષ્ણાતોના મતે, જ્યારે ખેલાડીની સાચી ઉંમરની જાણકારી હોય ત્યારે જ તેની ફિટનેસ, બોલિંગ લોડ અને ફિઝિકલ ગ્રોથ પર યોગ્ય રીતે કામ કરી શકાય છે. બોર્ડના આ નિર્ણયથી ભારતીય ક્રિકેટનું ભવિષ્ય વધુ સુરક્ષિત અને સુદ્રઢ બનશે.
