એપસ્ટીન વિવાદ પર પ્રથમવાર બોલ્યા બિલ ગેટ્સ, કહ્યું—“તેને મળવું એ મારી સૌથી મોટી ભૂલ હતી”
કુખ્યાત ફાઇનાન્સર જેફરી એપસ્ટીન સાથે જોડાયેલા દસ્તાવેજોના તાજા ખુલાસા બાદ માઈક્રોસોફ્ટના સહ-સ્થાપક બિલ ગેટ્સ આખરે જાહેરમાં સામે આવ્યા છે. ગેટ્સે સ્વીકાર્યું છે કે એપસ્ટીન સાથે મુલાકાત કરવી એ તેમની “ગંભીર ભૂલ” હતી અને આ માટે તેમણે માફી પણ માંગી છે. આ નિવેદન એવા સમયે આવ્યું છે જ્યારે તેમની પૂર્વ પત્ની મેલિન્ડા ફ્રેન્ચ ગેટ્સે આ સમગ્ર મામલાને તેમના લગ્નજીવન માટે અત્યંત પીડાદાયક ગણાવ્યો છે.
“દરેક મુલાકાતનો અફસોસ છે”
એક ટીવી ઇન્ટરવ્યુમાં બિલ ગેટ્સે કહ્યું કે એપસ્ટીન સાથે વિતાવેલી દરેક ક્ષણ તેમને આજે પણ ખટકે છે. તેમણે સ્પષ્ટ શબ્દોમાં કહ્યું કે તે વ્યક્તિ સાથે કોઈપણ પ્રકારનો સંબંધ રાખવો એ તેમની મૂર્ખતા હતી. ગેટ્સે એમ પણ ઉમેર્યું કે તેઓ એપસ્ટીનના ઈરાદાઓ અને તેની માનસિકતાને બરાબર સમજી શક્યા નહોતા.
એપસ્ટીન ફાઇલોમાં કયા આરોપો સામે આવ્યા?
અમેરિકી ન્યાય વિભાગ દ્વારા તાજેતરમાં જાહેર કરાયેલા દસ્તાવેજોમાં એપસ્ટીન સાથે જોડાયેલા અનેક ઈમેઈલ અને નોટ્સનો સમાવેશ થાય છે, જેમાં વિશ્વની અનેક પ્રભાવશાળી હસ્તીઓનો ઉલ્લેખ છે. આ ફાઇલોમાં એક કથિત ડ્રાફ્ટ ઈમેઈલનો પણ ઉલ્લેખ છે, જેમાં એપસ્ટીને દાવો કર્યો હતો કે તે બિલ ગેટ્સના અંગત જીવન સાથે જોડાયેલા કેટલાક સંવેદનશીલ કિસ્સાઓમાં સામેલ હતો. જોકે ગેટ્સે આ આરોપોને સખત રીતે નકારી કાઢ્યા છે. તેમણે કહ્યું કે જે ઈમેઈલનો ઉલ્લેખ કરવામાં આવી રહ્યો છે તે ક્યારેય મોકલવામાં જ આવ્યો નહોતો અને તેમાં લખેલી વાતો તદ્દન ખોટી છે.
ગેટ્સનો પલટવાર: “મને બદનામ કરવાનો પ્રયાસ”
ગેટ્સે કહ્યું કે તેમને સમજાતું નથી કે એપસ્ટીન આ પ્રકારના દાવા શા માટે કરી રહ્યો હતો. તેમનું માનવું છે કે એપસ્ટીન તેમને નિશાન બનાવીને તેમની છબી બગાડવાનો પ્રયાસ કરી રહ્યો હતો. ગેટ્સના પ્રવક્તાએ પણ નિવેદન જારી કરીને કહ્યું કે નવા દસ્તાવેજો દર્શાવે છે કે એપસ્ટીન ગેટ્સ દ્વારા અંતર જાળવવામાં આવતા નારાજ હતો અને તે બદનામ કરવા માટે કોઈપણ હદ સુધી જઈ શકે તેમ હતો.
મેલિન્ડાની વેદના છલકાઈ
આ વિવાદ પર બિલ ગેટ્સની પૂર્વ પત્ની મેલિન્ડા ફ્રેન્ચ ગેટ્સની પ્રતિક્રિયા પણ સામે આવી છે. તેમણે એક રેડિયો ઇન્ટરવ્યુમાં કહ્યું કે આ ફાઇલોના ખુલાસાએ તેમના લગ્નજીવનના સૌથી મુશ્કેલ સમયની યાદો તાજી કરી દીધી છે. મેલિન્ડાએ કહ્યું કે આ તેમના માટે ભાવનાત્મક રીતે અત્યંત કઠિન છે અને જે પ્રશ્નોના જવાબ બાકી છે તે તેમનાથી નહીં પરંતુ તેમના પૂર્વ પતિને પૂછવા જોઈએ. ઉલ્લેખનીય છે કે બિલ અને મેલિન્ડાના છૂટાછેડા 2021માં થયા હતા.
મુલાકાતોને ગણાવ્યો “ખોટો નિર્ણય”
બિલ ગેટ્સે સ્પષ્ટ કર્યું હતું કે:
- તેમણે 2011માં એપસ્ટીન સાથે મુલાકાત ચોક્કસ કરી હતી, પરંતુ તેઓ ક્યારેય એપસ્ટીનના ખાનગી ટાપુ (Private Island) પર ગયા નથી.
- તે સમયે તેમને કહેવામાં આવ્યું હતું કે એપસ્ટીન વૈશ્વિક સ્વાસ્થ્ય પ્રોજેક્ટ્સ માટે અમીર દાતાઓને જોડવામાં મદદ કરી શકે છે.
- હવે પાછળ વળીને જોતા તેમને લાગે છે કે આ સંપૂર્ણપણે ખોટો રસ્તો હતો.
નિષ્ણાતોનું કહેવું છે કે એપસ્ટીન ફાઇલોમાં કોઈનું નામ હોવું એ પોતે જ ગુનાનો પુરાવો નથી, પરંતુ આ દસ્તાવેજોએ એ જરૂર ઉજાગર કર્યું છે કે અનેક પ્રભાવશાળી લોકોએ એપસ્ટીન સાથેના તેમના સંબંધોને કાં તો ઓછા આંક્યા અથવા સંપૂર્ણપણે નકારી કાઢ્યા હતા.
