CEC જ્ઞાનેશ કુમાર સામે 2 કરોડની લાંચના આરોપમાં તપાસને મંજૂરી, કેરળ સરકારે વિજિલન્સ તપાસનો માર્ગ ખોલ્યો
દેશના મુખ્ય ચૂંટણી કમિશનર (CEC) જ્ઞાનેશ કુમાર ફરી એકવાર વિવાદમાં આવ્યા છે. કેરળ સરકારે તેમની સામે લગાવવામાં આવેલા 2 કરોડ રૂપિયાની લાંચના ગંભીર આરોપોની તપાસ કરવા માટે વિજિલન્સ વિભાગને મંજૂરી આપી છે. આ મામલો લગભગ બે દાયકા જૂનો છે અને જ્ઞાનેશ કુમાર જ્યારે કેરળમાં જાહેર બાંધકામ વિભાગ (PWD)ના સચિવ તરીકે ફરજ બજાવતા હતા તે સમયનો છે. સરકારના આ નિર્ણય બાદ રાજકીય અને વહીવટી વર્તુળોમાં ચર્ચા તેજ બની છે.
કેરળના ગૃહમંત્રી રમેશ ચેન્નીથલાએ બુધવારે આ અંગે માહિતી આપતાં જણાવ્યું હતું કે વિજિલન્સ એન્ડ એન્ટી કરપ્શન બ્યુરો (VACB)ને તપાસ માટે જરૂરી મંજૂરી આપવામાં આવી છે. મુખ્યમંત્રી વી.ડી. સતીશન સાથે ચર્ચા કર્યા બાદ અને કાનૂની અભિપ્રાય મેળવ્યા પછી આ નિર્ણય લેવામાં આવ્યો હોવાનું જણાવાયું છે.
શું છે 2 કરોડ રૂપિયાની લાંચનો સમગ્ર મામલો?
આ વિવાદ કેરળના એક મોટા રોડ પ્રોજેક્ટ સાથે જોડાયેલો છે. આરોપો અનુસાર, વર્ષ 2006 દરમિયાન કેરળમાં એક રોડ પ્રોજેક્ટનું કામ ભારત અને મલેશિયાની કંપનીઓના સંયુક્ત સાહસ PATI-BEL દ્વારા કરવામાં આવી રહ્યું હતું. આ પ્રોજેક્ટ તિરુવનંતપુરમથી અંગમાલી સુધીના મેઇન સેન્ટ્રલ રોડના વિકાસ સાથે સંબંધિત હતો.
આ પ્રોજેક્ટમાં મલેશિયાના એન્જિનિયર લી સી બિન મહત્વની જવાબદારી સંભાળતા હતા. ફરિયાદી કોન્ટ્રાક્ટર વી.ઓ. સજને આરોપ લગાવ્યો છે કે તે સમયે PWD સચિવ તરીકે કાર્યરત જ્ઞાનેશ કુમારે પ્રોજેક્ટનાં બાકી બિલોની ચૂકવણી કરાવવા માટે 2 કરોડ રૂપિયાની લાંચ માગી હતી.
સજ્જનના દાવા પ્રમાણે, પ્રોજેક્ટનાં લગભગ 17 કરોડ રૂપિયાનાં બિલો મંજૂર હોવા છતાં તેની ચૂકવણી અટકાવવામાં આવી હતી. પરિણામે કંપની અને તેની સાથે કામ કરતા કોન્ટ્રાક્ટરો પર આર્થિક દબાણ વધ્યું હતું. જોકે, આ તમામ બાબતો હાલમાં ફરિયાદમાં કરવામાં આવેલા આરોપો છે, જેની તપાસ થવાની બાકી છે.
મલેશિયન એન્જિનિયરની આત્મહત્યાનો પણ ઉલ્લેખ
આ સમગ્ર મામલામાં મલેશિયન એન્જિનિયર લી સી બિનના મૃત્યુનો પણ ઉલ્લેખ કરવામાં આવ્યો છે. નવેમ્બર 2006માં તેમણે મલેશિયામાં આત્મહત્યા કરી હતી. ફરિયાદી સજ્જનનો દાવો છે કે એન્જિનિયરે મૃત્યુ પહેલાં લાંચની માંગણી અને બિલોની ચૂકવણી અટકાવવાના મુદ્દે મુશ્કેલીઓનો સામનો કર્યો હતો.
ફરિયાદીનો એવો પણ દાવો છે કે લી સી બિનની આત્મહત્યાની નોંધમાં જ્ઞાનેશ કુમારના નામનો ઉલ્લેખ હતો. જોકે, આ નોંધ જાહેરમાં ઉપલબ્ધ થઈ નથી અને તેમાં કરવામાં આવેલા કથિત ઉલ્લેખની સ્વતંત્ર પુષ્ટિ પણ થઈ નથી.
અગાઉ પણ થઈ હતી તપાસ
નોંધનીય છે કે આ મામલે અગાઉ પણ વિજિલન્સ તપાસ કરવામાં આવી હતી. વર્ષ 2006માં રોડ પ્રોજેક્ટમાં ગેરરીતિઓ અને લાંચની માંગણીના આરોપો સામે આવ્યા બાદ તપાસ શરૂ કરવામાં આવી હતી. જોકે, પૂરતા પુરાવા ન મળતાં તે સમયે તપાસ આગળ વધારવાની જરૂર ન હોવાનું જણાવવામાં આવ્યું હતું. વર્ષ 2012માં પણ સંબંધિત કેટલાક કેસોમાં કાર્યવાહી બંધ કરવામાં આવી હતી.
હવે નવી ફરિયાદ અને અગાઉની તપાસ અંગે ઉઠેલા સવાલોને ધ્યાનમાં રાખીને ફરીથી તપાસનો માર્ગ ખોલવામાં આવ્યો છે.
હવે આગળ શું થશે?
કેરળ સરકારની મંજૂરી બાદ વિજિલન્સ વિભાગ ફરિયાદમાં કરવામાં આવેલા દાવાઓ, સંબંધિત દસ્તાવેજો, સાક્ષીઓનાં નિવેદનો અને અગાઉની તપાસની વિગતોની તપાસ કરશે. આ પ્રક્રિયા દરમિયાન આરોપોમાં કેટલું તથ્ય છે તે સ્પષ્ટ થઈ શકશે.
અહીં ખાસ નોંધવું જરૂરી છે કે તપાસની મંજૂરી મળવાનો અર્થ આરોપ સાબિત થઈ ગયા એવો નથી. જ્ઞાનેશ કુમાર સામેના આરોપોની સત્યતા તપાસ બાદ જ નક્કી થઈ શકશે.
દેશના મુખ્ય ચૂંટણી કમિશનર જેવા મહત્વપૂર્ણ બંધારણીય પદ પર રહેલી વ્યક્તિ સાથે જોડાયેલા આ મામલે હવે સૌની નજર વિજિલન્સ તપાસના પરિણામ પર રહેશે. લગભગ 20 વર્ષ જૂના આ વિવાદમાં તપાસ કયા નવા તથ્યો સામે લાવે છે તે જોવું રસપ્રદ રહેશે.
