ભાજપ મુખ્યાલયમાં વરિષ્ઠ નેતાઓનો જમાવડો: ગૃહમંત્રી અમિત શાહની અધ્યક્ષતામાં ભવિષ્યની રણનીતિ પર ચર્ચા
રાજધાની દિલ્હી સ્થિત ભારતીય જનતા પાર્ટી (BJP) ના રાષ્ટ્રીય મુખ્યાલય ખાતે આજે એક હાઇપ્રોફાઇલ અને મહત્વપૂર્ણ બેઠકનું આયોજન કરવામાં આવ્યું છે. આ બેઠકમાં કેન્દ્રીય ગૃહમંત્રી અમિત શાહ અને ભાજપના રાષ્ટ્રીય અધ્યક્ષ નીતિન નવીન સહિત પક્ષના વરિષ્ઠ નેતાઓ હાજરી આપી રહ્યા છે. આ ઉચ્ચ સ્તરીય બેઠકનો મુખ્ય એજન્ડા વડાપ્રધાન નરેન્દ્ર મોદીના જાહેર જીવનમાં ૨૫ વર્ષ પૂર્ણ થવાના પ્રસંગે દેશભરમાં ચાલી રહેલા કાર્યક્રમોની સમીક્ષા કરવાનો અને આગામી રાજકીય રણનીતિ ઘડવાનો છે.
પીએમ મોદીના જાહેર સેવાના ૨૫ વર્ષ: ‘સેવા સંકલ્પ અભિયાન’ની સમીક્ષા
વડાપ્રધાન નરેન્દ્ર મોદીએ ૭ ઓક્ટોબર, ૨૦૦૧ ના રોજ ગુજરાતના મુખ્યમંત્રી તરીકે પ્રથમ વખત બંધારણીય પદના શપથ લીધા હતા. આવતા વર્ષે ૭ ઓક્ટોબર, ૨૦૨૬ ના રોજ તેમના સફળ જાહેર સેવા કાર્યકાળના ૨૫ વર્ષ પૂર્ણ થઈ રહ્યા છે. આ ઐતિહાસિક તબક્કાને યાદગાર બનાવવા માટે ભાજપે ૧૭ સપ્ટેમ્બર (પીએમ મોદીના જન્મદિન) થી ૧૭ ઓક્ટોબર સુધી એક મહિનાનું દેશવ્યાપી ‘સેવા સંકલ્પ અભિયાન’ શરૂ કર્યું છે.
આજના મુખ્યાલય ખાતેના મંથનમાં કેન્દ્રીય ગૃહમંત્રી અમિત શાહ, પાર્ટી અધ્યક્ષ નીતિન નવીન અને રાષ્ટ્રીય જનરલ સેક્રેટરી વિનોદ તાવડે સહિતના વરિષ્ઠ નેતાઓ અત્યાર સુધી યોજાયેલા સેવા કાર્યક્રમોની વિગતવાર સમીક્ષા કરી રહ્યા છે. આ અભિયાન હેઠળ દેશના ખૂણે-ખૂણે રક્તદાન શિબિરો, સ્વચ્છતા અભિયાન, પર્યાવરણ સંરક્ષણ માટે વૃક્ષારોપણ અને વિવિધ જનકલ્યાણકારી પ્રવૃત્તિઓનું આયોજન કરવામાં આવી રહ્યું છે. બેઠકમાં નેતાઓ દેશભરમાં જનભાગીદારી વધારવા અને આ કાર્યક્રમોને વધુ વ્યાપક બનાવવા અંગે માર્ગદર્શન આપશે.
કાલથી સેવા તીર્થ ખાતે કેન્દ્રીય મંત્રીમંડળનું બે દિવસીય ચિંતન સત્ર
મુખ્યાલયની આ સંગઠનાત્મક બેઠક ઉપરાંત, આવતીકાલથી એટલે કે ૨૩ અને ૨૪ સપ્ટેમ્બરના રોજ કેન્દ્રીય મંત્રીમંડળનું એક અત્યંત મહત્વનું બે દિવસીય મંથન સત્ર યોજાવા જઈ રહ્યું છે. પ્રધાનમંત્રી નરેન્દ્ર મોદીની અધ્યક્ષતામાં યોજાનારી આ બેઠક પ્રધાનમંત્રી કાર્યાલય (PMO) પરિસરમાં આવેલા ‘સેવા તીર્થ’ ખાતે યોજાશે, જેમાં તમામ કેન્દ્રીય મંત્રીઓ અને મંત્રી પરિષદના સભ્યો ભાગ લેશે.
આ બે દિવસીય ચિંતન શિબિરમાં સરકારી યોજનાઓની પ્રગતિ, નીતિઓનું અસરકારક અમલીકરણ, શાસનમાં સુધારા, મંત્રાલયો વચ્ચે આંતરિક સંકલન અને સમય વ્યવસ્થાપન જેવા મહત્ત્વના પાસાઓ પર ગહન વિચાર-વિમર્શ કરવામાં આવશે. સરકારી ક્ષમતામાં વધારો કરવા અને પ્રજા સુધી સરકારી સેવાઓ વધુ ઝડપથી પહોંચાડવા માટે આ સત્ર એક રોડમેપ તૈયાર કરશે.
એકતરફ ભાજપ સંગઠન સ્તરે જનસંપર્ક અને સેવા અભિયાન મજબૂત કરી રહ્યું છે, તો બીજી તરફ વડાપ્રધાન મોદીના નેતૃત્વમાં સરકાર તેના કાર્યકાળના સુશાસન અને નીતિગત નિર્ણયોને વધુ ધારદાર બનાવવા માટે કટિબદ્ધ દેખાઈ રહી છે.
