ખિસ્સામાં પૈસા નહીં, પણ ક્રેડિટ કાર્ડનું દેવું રેકોર્ડ સ્તરે! અમેરિકામાં શું થઈ રહ્યું છે?
અમેરિકામાં ક્રેડિટ કાર્ડ લોકોના રોજિંદા જીવનનો એક મહત્વપૂર્ણ ભાગ બની ગયું છે. ખાવા-પીવાથી લઈને શોપિંગ અને અન્ય જરૂરી ખર્ચાઓ માટે લોકો ક્રેડિટ કાર્ડનો બહોળો ઉપયોગ કરી રહ્યા છે. પરંતુ હવે આ જ સુવિધા તેમના માટે દેવાનો એક મોટો બોજ બની રહી છે. પરિસ્થિતિ એવી સર્જાઈ છે કે મોટી સંખ્યામાં લોકો ક્રેડિટ કાર્ડના બિલ સમયસર ભરી શકતા નથી. ફ્રેડરલ રિઝર્વ બેંક ઓફ ન્યૂયોર્કના તાજેતરના અહેવાલ મુજબ, 2026 ના ત્રીજા ક્વાર્ટરમાં અમેરિકનોનું કુલ ક્રેડિટ કાર્ડ બાકી દેવું વધીને રેકોર્ડ 1.29 ટ્રિલિયન ડોલર એટલે કે આશરે ₹121.3 લાખ કરોડ થઈ ગયું છે.
ક્રેડિટ કાર્ડ બાકી દેવામાં ઝડપી વધારો
ન્યૂયોર્ક ફેડના અહેવાલ મુજબ, ત્રીજા ક્વાર્ટરમાં ક્રેડિટ કાર્ડનું બાકી દેવું 22 અબજ ડોલર (આશરે ₹2.06 લાખ કરોડ) વધ્યું છે. આ અગાઉના ક્વાર્ટરની સરખામણીએ 1.7 ટકાનો વધારો દર્શાવે છે. તો બીજી તરફ, એક વર્ષ પહેલાની સરખામણીમાં ક્રેડિટ કાર્ડનું કુલ બાકી દેવું 52 અબજ ડોલર (આશરે ₹4.88 લાખ કરોડ) વધી ગયું છે.
જોકે, આ આંકડાઓમાં ફુગાવાની (મોંઘવારીની) અસર સામેલ નથી. આનો અર્થ એ થાય છે કે દેવામાં થયેલા વધારાનો કેટલોક હિસ્સો વસ્તુઓ અને સેવાઓની વધેલી કિંમતોના કારણે પણ હોઈ શકે છે.
ઘરગથ્થુ દેવું રેકોર્ડ સ્તરે પહોંચ્યું
માત્ર ક્રેડિટ કાર્ડ જ નહીં, પરંતુ અમેરિકન પરિવારો પર અન્ય પ્રકારના દેવાનો બોજ પણ સતત વધી રહ્યો છે. મોર્ગેજ (હોમ લોન), સ્ટુડન્ટ લોન અને ઓટો લોન સહિત પરિવારોનું કુલ દેવું ત્રીજા ક્વાર્ટરમાં 334 અબજ ડોલર (આશરે ₹31.4 લાખ કરોડ) વધીને રેકોર્ડ 19.1 ટ્રિલિયન ડોલર (આશરે ₹1,795.4 લાખ કરોડ) સુધી પહોંચી ગયું છે.
આ આંકડો 2019 માં કોરોના મહામારી શરૂ થયા પહેલાના સ્તરની સરખામણીએ આશરે 5 ટ્રિલિયન ડોલર (આશરે ₹470 લાખ કરોડ) વધુ છે, જે દર્શાવે છે કે અમેરિકન ઘરો પર નાણાકીય દબાણ કેટલું ગંભીર બન્યું છે.
ગરીબ વિસ્તારોમાં બિલ ન ભરી શકનારાઓની સંખ્યા સૌથી વધુ
ક્રેડિટ કાર્ડના વધતા દેવાની સૌથી મોટી અસર ઓછી આવક ધરાવતા પરિવારો પર પડી રહી છે. ન્યૂયોર્ક ફેડના એક અલગ અહેવાલ અનુસાર, સૌથી ઓછી આવક ધરાવતા વિસ્તારોમાં રહેતા લોકોના 10.3 ટકા ક્રેડિટ કાર્ડ બેલેન્સ 90 દિવસથી વધુ સમયથી બાકી (Default) છે. જ્યારે સૌથી અમીર વિસ્તારોમાં આ આંકડો માત્ર 4.4 ટકા છે.
એટલે કે ગરીબ વિસ્તારોમાં ગંભીર રીતે બાકી રહેલા ક્રેડિટ કાર્ડ દેવાનો દર અમીર વિસ્તારોની સરખામણીએ બમણા કરતાં પણ વધુ છે.
આવક જૂથો વચ્ચે વધતી અસમાનતા
અહેવાલ દર્શાવે છે કે 2022 પછી સૌથી શ્રીમંત અને સૌથી ગરીબ વિસ્તારો વચ્ચે ક્રેડિટ કાર્ડ ચૂકવણીમાં ડિફોલ્ટ થવાનો તફાવત વધ્યો છે. ખાસ વાત એ છે કે તમામ આવક જૂથોમાં ચુકવણીમાં વિલંબ થવાનો દર હજુ પણ કોરોના મહામારી પહેલાના સ્તરથી ઉપર બનેલો છે.
આવી સ્થિતિમાં ઓછી આવક ધરાવતા પરિવારો માટે ક્રેડિટ કાર્ડનું બિલ ચૂકવવું સતત મુશ્કેલ બની રહ્યું છે. સમયસર ચૂકવણી ન થવાથી તેમને વધારાની ફી અને ખરાબ ક્રેડિટ સ્કોર જેવી સમસ્યાઓનો સામનો કરવો પડી શકે છે, સાથે જ દેવા પર વ્યાજનો બોજ પણ સતત વધતો જાય છે.
યુવાનો પર પણ વધી રહ્યું છે નાણાકીય દબાણ
ક્રેડિટ કાર્ડના વધતા ઉપયોગની અસર યુવાનો પર પણ સ્પષ્ટપણે જોવા મળી રહી છે. ટ્રાન્સયૂનિયનના ત્રીજા ક્વાર્ટરના અહેવાલ મુજબ, અમેરિકામાં એક ક્રેડિટ કાર્ડ ધારક પર સરેરાશ 6,678 ડોલર (આશરે ₹6.28 લાખ) નું દેવું છે.
તેમજ ન્યૂયોર્ક ફેડના અહેવાલ અનુસાર, 30 વર્ષથી ઓછી ઉંમરના દેવાદારોમાં એવા લોકોની સંખ્યા સૌથી વધુ રહી છે જેમનું ક્રેડિટ કાર્ડ દેવું પ્રથમ વખત 90 દિવસ કે તેથી વધુ સમય માટે બાકી રહ્યું છે. આ દર્શાવે છે કે યુવાનો પણ દેવું ચૂકવવાના ભારે દબાણ સામે ઝઝૂમી રહ્યા છે.
