દાહોદ જિલ્લામાં “ગામે ગામ આરોગ્ય કિરણ” કાર્યક્રમથી 102 કેન્દ્રોમાં 5000થી વધુ નાગરિકોને આરોગ્ય સેવાઓ
દાહોદ જિલ્લા પંચાયતના આરોગ્ય અને પરિવાર કલ્યાણ વિભાગ દ્વારા એક મહત્વપૂર્ણ પહેલ હાથ ધરવામાં આવી છે. જિલ્લા વિકાસ અધિકારી સ્મિત લોઢા અને મુખ્ય જિલ્લા આરોગ્ય અધિકારી ડૉ. ઉદય ટીલાવતના માર્ગદર્શન હેઠળ “ગામે ગામ આરોગ્ય કિરણ” કાર્યક્રમ શરૂ કરવામાં આવ્યો છે. આ અભિયાનનો મુખ્ય ઉદ્દેશ્ય જિલ્લાના છેવાડાના ગામડાં સુધી ઉત્તમ આરોગ્ય સેવાઓ પહોંચાડવાનો છે, જેથી લોકોને નાની-મોટી બીમારીઓ માટે દૂર સુધી દોડવું ન પડે.
૧૦૨ આરોગ્ય કેન્દ્રો પર હેલ્થ કેમ્પનું આયોજન
આ વિશેષ અભિયાન અંતર્ગત જિલ્લાના તમામ ૧૦૨ પ્રાથમિક અને શહેરી આરોગ્ય કેન્દ્રો પર ભવ્ય મેડિકલ કેમ્પ યોજવામાં આવ્યા હતા. આ કેમ્પોમાં કુલ ૫૦૧૫ લોકોએ પોતાનું સ્વાસ્થ્ય પરીક્ષણ કરાવ્યું હતું, જેમાં ૨૭૩૪ મહિલાઓ અને ૨૨૮૧ પુરુષોનો સમાવેશ થાય છે. આ આંકડા દર્શાવે છે કે ગ્રામીણ વિસ્તારના લોકો હવે પોતાના સ્વાસ્થ્ય પ્રત્યે વધુ જાગૃત બન્યા છે અને સરકારી સેવાઓનો ઉત્સાહપૂર્વક લાભ લઈ રહ્યા છે.
વિવિધ ગંભીર બીમારીઓનું નિદાન અને સારવાર
કેમ્પ દરમિયાન સામાન્ય બીમારીઓથી લઈને ગંભીર રોગોની તપાસ કરવામાં આવી હતી. આંકડા મુજબ ૧૪૮૩ લોકોની જનરલ તપાસ, ૨૮૫ સગર્ભા મહિલાઓની ગર્ભ તપાસ અને ૨૦૦૦થી વધુ લોકોના ડાયાબિટીસ તથા બ્લડપ્રેશર ચેક કરવામાં આવ્યા હતા. આ ઉપરાંત ટીબી, કેન્સર અને સિકલ સેલ જેવી બીમારીઓના નિદાન માટે પણ ખાસ વ્યવસ્થા કરવામાં આવી હતી. બાળકો અને મહિલાઓ માટે રસીકરણની સેવાઓ પણ સ્થળ પર જ પૂરી પાડવામાં આવી હતી.
આયુષ્માન કાર્ડ અને ઘરઆંગણે આરોગ્યનો ઉજાસ
આરોગ્ય તપાસની સાથે સાથે લોકોની આર્થિક સુરક્ષાનું પણ ધ્યાન રાખવામાં આવ્યું હતું. કેમ્પમાં ૧૯૬ જેટલા નવા ‘આયુષ્માન કાર્ડ’ (PM-JAY) બનાવવામાં આવ્યા હતા, જે ગંભીર બીમારીના સમયે હોસ્પિટલના ખર્ચમાં મદદરૂપ થશે. “ગામે ગામ આરોગ્ય કિરણ” કાર્યક્રમ સાચા અર્થમાં ગ્રામ્ય વિસ્તારોમાં નવી આશા લઈને આવ્યો છે. સમયસર તપાસ અને માર્ગદર્શન મળવાને કારણે અનેક લોકો ગંભીર બીમારીઓથી બચી શકશે, જે જિલ્લાના વિકાસ માટે એક સકારાત્મક પગલું છે.
