ભાતીગળ લોકમેળામાં પોલીસનું સઘન મોનીટરીંગ, ટ્રાફિક અને સર્વેલન્સ વ્યવસ્થા સજ્જ
ડાંગ જિલ્લાના મુખ્ય મથક આહવા ખાતે ૨૬ ફેબ્રુઆરીથી ૩ માર્ચ ૨૦૨૬ દરમિયાન યોજાનારા ઐતિહાસિક ‘ડાંગ દરબાર’ મેળામાં કાયદો અને વ્યવસ્થા જળવાઈ રહે તે માટે પોલીસ વિભાગે કમર કસી છે. જિલ્લા કલેક્ટર અને પોલીસ અધિક્ષક પૂજા યાદવના માર્ગદર્શન હેઠળ મેળાનું સુચારૂ સંચાલન કરવા માટે વિવિધ સમિતિઓ બનાવવામાં આવી છે. આ મેળામાં લાખોની સંખ્યામાં લોકો ઉમટી પડતા હોવાથી કોઈ અનિચ્છનીય ઘટના ન બને તે માટે પોલીસ તંત્ર દ્વારા ખાસ આયોજન કરવામાં આવ્યું છે.
૧૭૦થી વધુ સુરક્ષાકર્મીઓ અને SHE ટીમ તૈનાત
મેળામાં આવતા નાગરિકોની સુરક્ષા માટે ૧૭૦થી વધુ પોલીસ જવાનો અને અધિકારીઓને તૈનાત કરવામાં આવ્યા છે. ખાસ કરીને મહિલાઓની સુરક્ષા માટે ‘SHE ટીમ’ સતત કાર્યરત રહેશે. આ ઉપરાંત, ભીડનો લાભ લઈને થતી મોબાઈલ ચોરી કે ચેઈન સ્નેચિંગ જેવી પ્રવૃત્તિઓ રોકવા માટે સ્પેશિયલ સર્વેલન્સ ટીમ ગોઠવવામાં આવી છે. જો કોઈ મુશ્કેલી જણાય તો નાગરિકોને તાત્કાલિક હેલ્પલાઈન નંબર ૧૧૨ પર સંપર્ક કરવા સૂચના આપવામાં આવી છે.
ટ્રાફિક નિયમન માટે ૬ પાર્કિંગ પોઈન્ટ અને સતત મોનિટરિંગ
મેળા દરમિયાન વાહન ચાલકોને હાલાકી ન પડે તે માટે આહવા શહેરમાં ૬ જેટલા અલગ-અલગ ટ્રાફિક અને પાર્કિંગ પોઈન્ટ બનાવવામાં આવ્યા છે. રાત્રિના સમયે પણ વાહન વ્યવહાર સુરક્ષિત રહે તે માટે આ પાર્કિંગ સ્થળોએ પૂરતી લાઈટની વ્યવસ્થા કરવામાં આવી છે. પોલીસ વિભાગ દ્વારા ઇમરજન્સી સેવાઓ જેવી કે એમ્બ્યુલન્સ કે ફાયર ફાઈટરને રસ્તો મળી રહે તે માટે સતત મોનિટરિંગ કરવામાં આવી રહ્યું છે, જેથી મેળાનો આનંદ માણવા આવતા લોકોને કોઈ તકલીફ ન પડે.
સાયબર ક્રાઈમ જાગૃતિ અને વહીવટી તંત્રનું સંકલન
આ વર્ષે મેળામાં માત્ર સુરક્ષા જ નહીં, પરંતુ લોકોમાં સાયબર ગુનાઓ પ્રત્યે જાગૃતિ લાવવા માટે ખાસ પ્રદર્શન પણ ગોઠવવામાં આવ્યું છે. કલેક્ટર શાલિની દુહાન અને પોલીસ વડા સહિતના ઉચ્ચ અધિકારીઓ મેળાની વ્યવસ્થાઓ પર સીધી નજર રાખી રહ્યા છે. વહીવટી તંત્રની આખી ટીમ એ વાતનું ધ્યાન રાખી રહી છે કે ડાંગની પરંપરા અને સંસ્કૃતિને માણવા આવતા પ્રવાસીઓ એક સુરક્ષિત અને યાદગાર અનુભવ લઈને પરત ફરે.
