નવસારી મિલેટ મહોત્સવથી મળ્યુ નવું બજાર : “અંબિકા પ્રાકૃતિક ફાર્મ આઉટલેટ” દ્વારા ખેડૂતની સફળતા ગાથા
ડાંગ જિલ્લાના જામનાપાડા ગામના રહેવાસી બ્રિજેશભાઈ બિરારી માટે ખેતી માત્ર ગુજરાનનું સાધન નથી, પરંતુ એક સંઘર્ષ અને સંસ્કારની ગાથા છે. તેમણે “અંબિકા પ્રાકૃતિક ફાર્મ આઉટલેટ” દ્વારા કુદરતી પદ્ધતિથી ઉગાડેલા દેશી કઠોળ, ચોખા અને હળદર જેવા ઉત્પાદનોમાં હંમેશા ઉચ્ચ ગુણવત્તા જાળવી રાખી છે. અગાઉ તેમની આ મહેનત માત્ર ગામડાની સીમ સુધી મર્યાદિત હતી, પરંતુ રાજ્ય સરકારના મિલેટ મહોત્સવ જેવા સશક્ત પ્લેટફોર્મના કારણે આજે તેમની આ મહેનતને એક નવી ઓળખ અને દિશા મળી છે.
મિલેટ મહોત્સવ અને સરકારી મેળાઓ બન્યા આશીર્વાદ સમાન
નવસારીમાં આયોજિત મિલેટ મહોત્સવ બ્રિજેશભાઈ જેવા અનેક પ્રગતિશીલ ખેડૂતો માટે આશીર્વાદરૂપ સાબિત થયો છે. આ પ્લેટફોર્મ દ્વારા તેઓ માત્ર ખેતી સુધી સીમિત ન રહેતા એક સફળ ઉદ્યોગસાહસિક તરીકે ઉભરી આવ્યા છે. આજે તેઓ રાજ્યભરમાં યોજાતા વિવિધ કૃષિ મેળાઓ અને પ્રદર્શનોમાં ભાગ લઈને પોતાના ઉત્પાદનોનું સીધું વેચાણ કરે છે. આ પ્રક્રિયાથી તેમને વચેટિયાઓ વગર સીધી અને સ્થિર આવક પ્રાપ્ત થઈ રહી છે, જેના કારણે તેઓ આર્થિક રીતે આત્મનિર્ભર બન્યા છે અને અન્ય ખેડૂતો માટે પ્રેરણાસ્ત્રોત સાબિત થયા છે.
ગ્રાહકોનો વિશ્વાસ અને બજારના ખુલેલા દરવાજા
બ્રિજેશભાઈ ગર્વ સાથે જણાવે છે કે સરકાર દ્વારા પૂરા પાડવામાં આવતા આ પ્લેટફોર્મ્સ તેમના માટે બજારના બંધ દરવાજા ખોલી રહ્યા છે. હવે તેઓ માત્ર પાક પકવતા નથી, પરંતુ આત્મવિશ્વાસ સાથે ગ્રાહકોને તેનું વેચાણ પણ કરે છે. શહેરી વિસ્તારના લોકો હવે તેમની બ્રાન્ડ અને ગુણવત્તાયુક્ત પ્રોડક્ટ્સને ઓળખતા થયા છે. આ મહોત્સવોને કારણે ખેડૂતોને માત્ર સારી આવક જ નથી મળી, પરંતુ ગ્રાહકોનો અતૂટ વિશ્વાસ પણ પ્રાપ્ત થયો છે, જે ખેતીને વ્યવસાયિક દ્રષ્ટિકોણથી આગળ વધારવામાં ખૂબ મદદરૂપ થાય છે.
ગામડાની મહેનત અને શહેરના બજાર વચ્ચેનો સેતુ
નવસારી મિલેટ મહોત્સવનો મુખ્ય ઉદ્દેશ્ય પૌષ્ટિક ધાન્યોને પ્રોત્સાહન આપવાની સાથે ખેડૂતોને વેચાણ માટે મજબૂત પ્લેટફોર્મ પૂરું પાડવાનો છે. સરકાર અને વહીવટીતંત્રની આ પહેલ ગામડાની મહેનત અને શહેરના બજાર વચ્ચેનો અંતર ઘટાડવામાં સફળ રહી છે. બ્રિજેશભાઈની સફળતા એ વાતનું પ્રમાણ છે કે જો યોગ્ય માર્ગદર્શન અને બજારની સુવિધા મળે, તો ખેતરની પેદાશ વૈશ્વિક સ્તરે પોતાની આગવી ઓળખ બનાવી શકે છે. આ આયોજનની સફળતા ખેડૂત અને ગ્રાહક વચ્ચે એક સકારાત્મક અને સીધો સંબંધ સ્થાપિત કરી રહી છે.
