રસોડાના બજેટથી લઈને સ્માર્ટફોન સુધી: ઓગસ્ટથી કઈ વસ્તુઓ પાછળ ચૂકવવા પડશે વધુ પૈસા?
ઓગસ્ટ મહિનાની શરૂઆત સાથે જ દેશના કરોડો પરિવારના માસિક બજેટ પર મોટો ફટકો પડવા જઈ રહ્યો છે. એકતરફ તહેવારોની સીઝન નજીક આવી રહી છે, તો બીજી તરફ FMCG પ્રોડક્ટ્સ, કન્ઝ્યુમર ડ્યુરેબલ્સ અને ઓટોમોબાઈલ કંપનીઓએ પોતાના ઉત્પાદનોના ભાવ વધારવાની સત્તાવાર તૈયારી કરી લીધી છે.
કંપનીઓના મતે કાચા માલના વધેલા ભાવ અને ટ્રાન્સપોર્ટેશન ખર્ચમાં થયેલા ઉછાળાના કારણે આ ભાવવધારો ગ્રાહકો પર પાસ-ઓન કરવો અનિવાર્ય બની ગયો છે.
રસોડાનું બજેટ ખોરવાશે: ચા, તેલ અને સાબુના ભાવ વધશે
રોજિંદા જીવનમાં વપરાતી અગત્યની વસ્તુઓ જેવી કે સવારની ચા, હેર ઓઇલ, સાબુ અને ડિટર્જન્ટના ભાવમાં ૬ થી ૮ ટકા સુધીનો વધારો જોવા મળી શકે છે.
પેકેજિંગ મટીરીયલ અને પામ ઓઈલની કિંમતો વધવાના કારણે એફએમસીજી (FMCG) કંપનીઓએ પોતાના ઉત્પાદનોના દામ વધારવા પડ્યા છે. આ અચાનક થયેલા વધારાથી ગૃહિણીઓનું માસિક રસોડાનું બજેટ સીધું ખોરવાઈ જવાની આશંકા છે.
ઈલેક્ટ્રોનિક્સ અને સ્માર્ટફોન થશે મોંઘા
ઘરવપરાશના સાધનો જેવા કે રેફ્રિજરેટર (ફ્રિજ), વોશિંગ મશીન અને એલઇડી ટીવીના ભાવમાં ૪ થી ૬ ટકા સુધીનો વધારો થઈ શકે છે.
આ ઉપરાંત, આંતરરાષ્ટ્રીય બજારમાં સ્માર્ટફોન અને ઈલેક્ટ્રોનિક્સમાં વપરાતી મેમરી ચિપના દામ છેલ્લા કેટલાક મહિનામાં ત્રણ ગણા સુધી વધી ગયા છે. આ ચિપ શોર્ટેજ અને મોંઘવારીની સીધી અસર સ્માર્ટફોન, લેપટોપ અને ટેબ્લેટની કિંમતો પર પડશે, જેથી નવો મોબાઈલ ખરીદવા માટે હવે વધુ ખિસ્સું હળવું કરવું પડશે.
નવી કાર ખરીદવી થશે મોંઘી: વાહન ઉત્પાદકો વધારશે ભાવ
જો તમે ઓગસ્ટ મહિનામાં કે આવનારી તહેવારોની સીઝનમાં નવી કાર ખરીદવાનું વિચારાઈ રહ્યા છો, તો તમારે વધુ રકમ ચૂકવવા માટે તૈયાર રહેવું પડશે.
દેશની સૌથી મોટી કાર ઉત્પાદક કંપની મારુતિ સુઝુકી ઓગસ્ટથી પોતાની વિવિધ ગાડીઓના મોડેલ પર ₹૩૦,૦૦૦ સુધીનો ભાવવધારો કરવા જઈ રહી છે. મારુતિ ઉપરાંત હોન્ડા, મર્સિડીઝ-બેન્ઝ અને અન્ય પ્રીમિયમ વાહન ઉત્પાદક કંપનીઓ પણ પોતાના વહિકલ્સના દર વધારવાની તૈયારી કરી રહી છે.
વૈશ્વિક પરિબળો અને મધ્ય પૂર્વનો તણાવ જવાબદાર
આ સાર્વત્રિક ભાવવધારા પાછળ મુખ્યત્વે આંતરરાષ્ટ્રીય પરિબળો જવાબદાર છે. મધ્ય પૂર્વ (West Asia) માં ચાલી રહેલા ભૌગોલિક-રાજકીય તણાવને કારણે વૈશ્વિક સપ્લાય ચેઈન ખોરવાઈ ગઈ છે.
દરિયાઈ માર્ગો પરથી થતા વેપારમાં ભાડું (Freight Cost) વધ્યું છે. સાથે જ ક્રૂડ ઓઈલ અને પામ ઓઈલના ભાવ વધવાથી લોજિસ્ટિક્સ, ટ્રાન્સપોર્ટેશન અને પેકેજિંગ મટીરીયલ્સના દામમાં મોટો ઉછાળો આવ્યો છે.
તબક્કાવાર વધશે ભાવ: સપ્ટેમ્બરમાં વધુ આંચકો શક્ય
કંપનીઓ ગ્રાહકો પર એકસાથે મોટો બોજ નાખવાને બદલે અલગ-અલગ તબક્કામાં કિંમતો વધારી રહી છે. શરૂઆતમાં પ્રીમિયમ અને મોટા પેકેટોના ભાવ વધારવામાં આવશે, જ્યારે નાના પેકેટોના ભાવ પાછળથી વધશે.
કંપનીઓ અનુસાર, જૂન ક્વાર્ટરમાં મોંઘવારીનો અડધો બોજ જ ગ્રાહકો પર નાખવામાં આવ્યો હતો. બાકીની ભરપાઈ કરવા માટે સપ્ટેમ્બર ક્વાર્ટરમાં કિંમતોમાં વધુ ૨ થી ૫ ટકાનો વધારો થઈ શકે છે. તૈયાર કપડાં (Apparel) પણ મોંઘા થવાના સંકેત છે.
અર્થતંત્ર અને મધ્યમ વર્ગ પર અસર
અર્થશાસ્ત્રીઓના મતે ગ્રાહક ફુગાવો (Inflation) ૫.૪ ટકાના બેઝલાઈન સ્તરથી ઉપર જઈ શકે છે, જે દેશના એકંદર વિકાસ દર પર દબાણ લાવશે. તહેવારોની સીઝનમાં મર્યાદિત આવક સામે વધતા ખર્ચાઓ સાથે તાલમેલ બેસાડવો એ મધ્યમ વર્ગ માટે સૌથી મોટો પડકાર બની રહેશે.
