સગાઈના દિવસે બન્યો ભયાનક બનાવ, ધુમાડાના ગૂંગળામણથી ચારના જીવ ગયા
પંચમહાલ જિલ્લાના ગોધરા શહેરમાં આવેલા બામરોલી રોડ પર આવેલી વૃંદાવન-2 સોસાયટીમાં આજે વહેલી સવારે બનેલી આગની દુર્ઘટનાએ સમગ્ર વિસ્તારને હચમચાવી દીધો છે. રહેણાંક મકાનમાં અચાનક ફાટી નીકળેલી આગે એક જ પરિવારના ચાર સભ્યોનો જીવ છીનવી લીધો. મૃતકોમાં દંપતી સાથે તેમના બે નાબાલિક પુત્રોનો સમાવેશ થાય છે. ઘટનાએ સોસાયટીમાં શોકનું વાતાવરણ સર્જી દીધું છે.
સગાઈના દિવસે જ બનેલી કરુણ ઘટના
મળતી માહિતી મુજબ, દોશી પરિવાર પોતાના બે પુત્રો સાથે આ મકાનમાં રહેતો હતો. મોટા પુત્રની આજે વાપી ખાતે સગાઈ નક્કી હતી અને તેના માટે પરિવાર સવારમાં જ નીકળવાનો હતો. ડ્રાઈવર ગાડી લઈને ઘરે પહોંચ્યો ત્યારે મકાનમાંથી ધુમાડો નીકળતો જોઈને તેણે તરત જ પડોશીઓ અને ફાયર બ્રિગેડને જાણ કરી. થોડા જ પળોમાં લોકો ભેગા થઈ ગયા અને ઘટનાની ગંભીરતા વધુ સ્પષ્ટ બની.
ફાયર બ્રિગેડકર્મીઓએ દરવાજો તોડી અંદર પ્રવેશ કર્યો
ફાયર બ્રિગેડની ટીમ ઘટના સ્થળે પહોંચી ત્યારે મકાનનો દરવાજો અંદરથી બંધ મળ્યો હતો. તાત્કાલિક કાર્યવાહી કરીને દરવાજો તોડવામાં આવ્યો અને અંદર પ્રવેશ કરતા જ ચારેય પરિવારજનો બેભાન હાલતમાં મળી આવ્યા. તેમને તરત જ 108 એમ્બ્યુલન્સ મારફતે ગોધરા સિવિલ હોસ્પિટલ ખસેડાયા, પરંતુ ડોક્ટરોએ તમામને મૃત જાહેર કર્યા હતા. ધુમાડાના ગૂંગળામણને કારણે મોત થયાનું પ્રાથમિક અનુમાન છે.
શોર્ટ સર્કિટથી આગ લાગી હોવાનું અનુમાન
પ્રાથમિક તપાસ મુજબ, મકાનના ગ્રાઉન્ડ ફ્લોર પર રહેલા સોફામાં શોર્ટ સર્કિટ થતાં આગ લાગી હોવાનું જાણવા મળ્યું છે. મકાન એર-ટાઈટ હોવાને કારણે ધુમાડો બહાર નીકળ્યા વગર અંદર જ ફરી વળ્યો. આ પરિસ્થિતિમાં પરિવારના સભ્યોને સમયસર બહાર ન આવી શકવાથી દુર્ઘટના બની હોવાનું માનવામાં આવી રહ્યું છે. આગ કેવી રીતે ફાટી નીકળી તે અંગે FSL ટીમે વિગતવાર તપાસ શરૂ કરી છે.
તંત્રની દોડધામ, વિસ્તારમાં શોકનો માહોલ
દુર્ઘટનાની જાણ થતાં જ ફાયર વિભાગ, ગોધરા A ડિવિઝન પોલીસ સ્ટાફ, FSL અધિકારીઓ અને GEBની ટીમ તરત જ સ્થળ પર પહોંચી હતી. આગ પર કાબુ મેળવ્યા બાદ ટેકનિકલ તપાસ શરૂ કરવામાં આવી છે. એક જ પરિવારના ચાર લોકોના મોતથી સમગ્ર વિસ્તારમાં શોક અને અવિશ્વાસનો માહોલ છવાઈ ગયો છે. સગાઈના દિવસના સવારમાં બનેલી આ ઘટના સ્થાનિકો માટે વધુ હૃદયદ્રાવક બની છે.
