એન્જિનિયરિંગ અને સાયન્સના વિદ્યાર્થીઓ માટે મોટી તક; GATE અને NET પાસ ઉમેદવારોને અગ્રતા
ભારતીય અવકાશ સંશોધન સંગઠન (ISRO) માં જોડાઈને દેશના અદભૂત સ્પેસ મિશન્સનો હિસ્સો બનવાનું સ્વપ્ન જોતા યુવા વૈજ્ઞાનિકો અને એન્જિનિયરો માટે એક ખૂબ જ મહત્વના સમાચાર સામે આવ્યા છે. ઈસરો અંતર્ગત બેંગલુરુમાં આવેલા પ્રતિષ્ઠિત ‘યુ.આર. રાવ સેટેલાઇટ સેન્ટર’ (URSC) દ્વારા જુનિયર રિસર્ચ ફેલોશિપ (JRF) માટે સત્તાવાર ભરતીની જાહેરાત કરવામાં આવી છે. અવકાશયાનની ડિઝાઈન, સેટેલાઈટ ટેકનોલોજીનું પરીક્ષણ અને લોન્ચ મેનેજમેન્ટ જેવા દેશના અત્યંત ગુપ્ત અને મહત્વકાંક્ષી પ્રોજેક્ટ્સ પર કામ કરવાની આ એક સુવર્ણ તક છે. આ ફેલોશિપ પ્રોગ્રામ હેઠળ પસંદગી પામનાર ઉમેદવારોને દર મહિને ૪૨,૦૦૦ રૂપિયા સુધીનું આકર્ષક સ્ટાઈપન્ડ પણ આપવામાં આવશે.
દેશની સર્વોચ્ચ અવકાશ સંસ્થા ઇસરો સાથે કામ કરવું એ માત્ર એક નોકરી નથી, પરંતુ ગર્વની બાબત છે. યુ.આર. રાવ સેટેલાઇટ સેન્ટર (URSC) એ ભવિષ્યના સ્પેસ મિશન્સને ધ્યાનમાં રાખીને સંશોધનમાં રસ ધરાવતા પ્રતિભાશાળી ઉમેદવારો પાસેથી ઓનલાઈન અરજીઓ મંગાવી છે. આ ભરતી અંતર્ગત કુલ ૧૭ ખાલી બેઠકો ભરવાની જાહેરાત કરવામાં આવી છે, જેના માટેની ઓનલાઈન અરજી પ્રક્રિયા હાલ શરૂ થઈ ચૂકી છે.
કયા કયા એડવાન્સ્ડ ક્ષેત્રોમાં કામ કરવાનો મળશે મોકો?
આ ફેલોશિપ દરમિયાન ઉમેદવારોને અત્યંત આધુનિક ટેકનોલોજીકલ ક્ષેત્રોમાં પ્રાયોગિક સંશોધન કરવાની તક મળશે. જેમાં મુખ્યત્વે ECAD સોફ્ટવેર, માઇક્રોસર્કિટ્સ, એડવાન્સ્ડ માઇક્રોઇલેક્ટ્રોનિક્સ, યુઝર ઇન્ટરફેસ ડેવલપમેન્ટ, DC-DC કન્વર્ટર, સેગમેન્ટ મિરર ઓપ્ટિક્સ, TACHZ ડિટેક્ટર, મટીરીયલ સ્ટડીઝ, ડિજિટલ સિગ્નલ પ્રોસેસિંગ, VLSI ડિઝાઇન, ન્યુમેરિકલ મોડેલિંગ, ડેટા-ડ્રાઇવ મોડેલ્સ, રિસ્ક એસેસમેન્ટ અને 3D મોડેલિંગ સોફ્ટવેર જેવા વિષયોનો સમાવેશ થાય છે.
શૈક્ષણિક લાયકાતના કડક માપદંડો
ઇસરો દ્વારા જુદા જુદા પદો (જેમ કે JRF-E1 થી JRF-E13 અને JRF-M1 થી JRF-M3) માટે અલગ અલગ શૈક્ષણિક માપદંડો નક્કી કરવામાં આવ્યા છે.
-
મોટાભાગના પદો માટે ઉમેદવાર પાસે માન્ય યુનિવર્સિટીમાંથી M.E., M.Tech. અથવા M.Sc. (એન્જિનિયરિંગ) ની અનુસ્નાતક ડિગ્રી હોવી અનિવાર્ય છે. જેમાં ઓછામાં ઓછા ૬૦ ટકા ગુણ સાથે ફર્સ્ટ ક્લાસ અથવા ૧૦ માંથી ૬.૫ CGPA હોવા જરૂરી છે.
-
ચોક્કસ પદો માટે M.Sc. ના તમામ સેમેસ્ટરમાં કુલ મળીને ઓછામાં ઓછા ૬૫ ટકા ગુણ (અથવા ૧૦ માંથી ૬.૮૪ CGPA) સાથે પ્રથમ વર્ગ હોવો જરૂરી છે.
રાષ્ટ્રીય સ્તરની પરીક્ષાઓ પાસ હોવી જરૂરી
શૈક્ષણિક ડિગ્રી ઉપરાંત, ઉમેદવારે કેન્દ્ર સરકારની એજન્સીઓ દ્વારા આયોજિત પીએચડી પ્રોગ્રામ્સ માટેની રાષ્ટ્રીય સ્તરની પાત્રતા કસોટીઓ પાસ કરેલી હોવી જોઈએ. જેમ કે CSIR-UGC NET (લેક્ચરશિપ), GATE (એન્જિનિયરિંગ), JAM અથવા JEST પરીક્ષા ઉત્તીર્ણ કરનાર ઉમેદવારો જ આ માટે પાત્ર ગણાશે. આ ઉપરાંત DST, DBT, DOS, DRDO, IIT કે IISc જેવી પ્રતિષ્ઠિત સરકારી સંસ્થાઓ દ્વારા પસંદગી પામેલા વિદ્યાર્થીઓ પણ અરજી કરી શકે છે.
વય મર્યાદા અને નિયમો અનુસાર છૂટછાટ
અરજી કરવાની છેલ્લી તારીખ સુધીમાં સામાન્ય વર્ગના ઉમેદવારોની મહત્તમ ઉંમર ૨૮ વર્ષથી વધુ ન હોવી જોઈએ. જો કે, સરકારી નિયમો અનુસાર અનામત વર્ગના ઉમેદવારોને વય મર્યાદામાં વિશેષ છૂટછાટ આપવામાં આવી છે. જે અંતર્ગત SC અને ST કેટેગરીના ઉમેદવારોને ૫ વર્ષની તેમજ OBC કેટેગરીના ઉમેદવારોને ૩ વર્ષની સરકારી છૂટ મળવાપાત્ર રહેશે.
સ્ટાઈપન્ડનું માળખું અને પસંદગીની રીત
આ પ્રોગ્રામ અંતર્ગત પ્રાથમિક ફેલોશિપનો ગાળો ૨ વર્ષનો રહેશે, જેને ઉમેદવારના પર્ફોર્મન્સ અને પ્રોજેક્ટની જરૂરિયાત મુજબ આગળ લંબાવી શકાય છે. જુનિયર રિસર્ચ ફેલો (JRF) અને સિનિયર રિસર્ચ ફેલો (SRF) તરીકેનો કુલ કાર્યકાળ કોઈપણ સંજોગોમાં ૫ વર્ષથી વધુ નહીં હોય. શરૂઆતમાં JRF તરીકે દર મહિને ૩૭,૦૦૦ રૂપિયાનું સ્ટાઈપન્ડ મળશે, જે બાદમાં પ્રમોશન થઈને SRF બનતા દર મહિને ૪૨,૦૦૦ રૂપિયા સુધી પહોંચશે.
આ ભરતી માટે કોઈ લેખિત પરીક્ષા લેવામાં આવનાર નથી. ઉમેદવારોના શૈક્ષણિક રેકોર્ડ અને રાષ્ટ્રીય પરીક્ષાના સ્કોરના આધારે તેમને સીધા ઇન્ટરવ્યુ માટે શોર્ટલિસ્ટ કરવામાં આવશે અને શોર્ટલિસ્ટ થયેલા ઉમેદવારોને ઇમેઇલ દ્વારા જાણ કરવામાં આવશે.
સત્તાવાર વેબસાઇટ પર અરજી કરવાની રીત
રસ ધરાવતા લાયક ઉમેદવારો ઈસરોની સત્તાવાર વેબસાઈટ apps.ursc.gov.in પર જઈને ઓનલાઈન ફોર્મ ભરી શકે છે. વેબસાઈટના રિક્રુટમેન્ટ સેક્શનમાં જઈને પોતાની પસંદગીની પોસ્ટની સામે આપેલી લિંક પર ક્લિક કરી, જરૂરી તમામ દસ્તાવેજો અને વિગતો કાળજીપૂર્વક સબમિટ કરવાની રહેશે. અરજી કરવાની છેલ્લી તારીખ ૧૧ જુલાઈ, ૨૦૨૬ નક્કી કરવામાં આવી છે. ભવિષ્યના સંદર્ભ અને ઈન્ટરવ્યુના સમય માટે ફોર્મની પ્રિન્ટઆઉટ સાચવી રાખવી હિતાવહ છે.
