બાલ અધ્યાપન મંદિર પ્રવેશ નિયમોમાં બદલાવ: હવે વધુ યુવાનો બની શકશે તાલીમબદ્ધ પૂર્વ પ્રાથમિક શિક્ષક
રાજ્યમાં શિક્ષણ ક્ષેત્રે ગુણવત્તા વધારવા અને યુવાનો માટે કારકિર્દીના નવા દ્વાર ખોલવા માટે ગુજરાત સરકાર દ્વારા સતત મહત્વપૂર્ણ પગલાં લેવામાં આવી રહ્યા છે. આ જ શ્રેણીમાં, મુખ્યમંત્રી ભૂપેન્દ્રભાઈ પટેલના નેતૃત્વ હેઠળ રાજ્ય સરકારે પૂર્વ પ્રાથમિક શિક્ષણ એટલે કે બાલ અધ્યાપન મંદિરની પ્રી-પીટીસી (D.E.C.Ed.) કૉલેજોમાં પ્રવેશ પ્રક્રિયાને લઈને કેટલાક મોટા અને રાહતરૂપ સુધારાઓ જાહેર કર્યા છે. આ નવા નિર્ણયોથી તાલીમ મેળવવા ઈચ્છતા રાજ્યના અસંખ્ય યુવા ઉમેદવારોને સીધો લાભ મળશે.
મુખ્યમંત્રી અને શિક્ષણ મંત્રીઓના માર્ગદર્શન હેઠળ યુવા-વિદ્યાર્થીલક્ષી સુધારા
રાજ્યમાં ગુણવત્તાયુક્ત પૂર્વ પ્રાથમિક શિક્ષણ માટે સક્ષમ અને તાલીમબદ્ધ શિક્ષકો સરળતાથી ઉપલબ્ધ થઈ શકે, તે હેતુસર આ સુધારાઓ અમલમાં મૂકવામાં આવ્યા છે. મુખ્યમંત્રીના માર્ગદર્શન તથા શિક્ષણ મંત્રી ડૉ. પ્રદ્યુમન વાજા અને શિક્ષણ રાજ્ય મંત્રી રિવાબા જાડેજાના નેતૃત્વમાં લેવાયેલા આ નિર્ણયોથી પ્રી-પીટીસી પ્રવેશ પ્રક્રિયા વધુ સમાવેશી, સરળ અને સમયાનુકૂળ બની છે. આ નવા ફેરફારોથી માત્ર બેઠકોમાં જ વધારો થયો નથી, પરંતુ અનામત અને વયમર્યાદાના નિયમોમાં પણ છૂટછાટ આપવામાં આવી છે.
પ્રી-પીટીસી કૉલેજોમાં બેઠકોની સંખ્યા વધી: પ્રતિ વર્ગ ૬૨ બેઠકો ફાળવાઈ
અગાઉ પ્રી-પીટીસી કૉલેજોમાં વર્ગદીઠ ૫૦ બેઠકોની મંજૂર ક્ષમતા હતી, જેને હવે ૨૫ ટકાના વધારા સાથે વધારીને કુલ ૬૨ બેઠકો કરવામાં આવી છે. આ વધારાને કારણે તાલીમ મેળવવા ઈચ્છુક વધુમાં વધુ ઉમેદવારોને શિક્ષક બનવાની સુવર્ણ તક મળી રહેશે. આ સાથે જ, રાજ્યમાં ગુણવત્તાયુક્ત બાળ શિક્ષણ માટે તાલીમબદ્ધ માનવબળનો વ્યાપ પણ મોટા પ્રમાણમાં વિસ્તરશે.
EWS અને દિવ્યાંગો માટે અનામતની નવી અને પારદર્શક જોગવાઈ
સુધારેલા પ્રવેશ માળખા અનુસાર સામાજિક અને શૈક્ષણિક રીતે પછાત વર્ગ (SEBC) માટે ૨૭ ટકા અનામત હેઠળ ૧૭ બેઠકો, અનુસૂચિત જાતિ (SC) માટે ૭ ટકા મુજબ ૪ બેઠકો અને અનુસૂચિત જનજાતિ (ST) માટે ૧૫ ટકા મુજબ ૯ બેઠકો નક્કી કરવામાં આવી છે.
જ્યારે ઓપન કેટેગરીમાં ૪૧ ટકા મુજબ ૨૬ બેઠકો રહેશે. આ ઉપરાંત, આર્થિક રીતે નબળા વર્ગ (EWS) માટે ઇતિહાસમાં પ્રથમ વખત ૧૦ ટકા મુજબ ૬ બેઠકોની વિશેષ જોગવાઈ કરવામાં આવી છે. દિવ્યાંગ ઉમેદવારો માટે ‘રાઇટ્સ ઓફ પર્સન વિથ ડિસેબિલિટીઝ એક્ટ, ૨૦૧૬’ નીકલમ-૩૨ અનુસાર કુલ બેઠકોમાંથી ૫ ટકા બેઠકો અનામત રાખવામાં આવી છે, જેથી સમાવેશી શિક્ષણને વધુ બળ મળશે.
મહત્તમ વયમર્યાદા ૨૪ વર્ષથી વધારીને ૩૦ વર્ષ કરાઈ
અગાઉ પ્રવેશ માટેની મહત્તમ વયમર્યાદા ૨૪ વર્ષ હતી, જેના કારણે ઘણા લાયક યુવાનો વય મર્યાદાના કારણે વંચિત રહી જતા હતા. રાજ્ય સરકારે આ નિયમમાં મોટો ફેરફાર કરીને મહત્તમ વયમર્યાદા વધારીને ૩૦ વર્ષ કરી દીધી છે. એટલું જ નહીં, અનુસૂચિત જાતિ, અનુસૂચિત જનજાતિ, પછાત વર્ગો, EWS અને દિવ્યાંગ ઉમેદવારોને મહત્તમ વયમર્યાદામાં વધુ ૫ વર્ષની વિશેષ છૂટ આપવામાં આવશે. આ નિર્ણયથી અભ્યાસમાં થોડો વિલંબ થયો હોય તેવા યુવાનો પણ પોતાની કારકિર્દી બનાવી શકશે.
પાત્રતા ધોરણો અને માધ્યમની પસંદગીમાં લવચીકતા
પ્રવેશ મેળવવા માટે ધોરણ-૧૨ ની પરીક્ષામાં ઓછામાં ઓછા ૫૦ ટકા ગુણ મેળવેલા હોવા જરૂરી છે. ગુજરાત બોર્ડ ઉપરાંત CBSE અને ICSE જેવા અન્ય માન્ય બોર્ડના વિદ્યાર્થીઓને પણ આ પાત્રતા લાગુ પડશે. અનામત વર્ગોના વિદ્યાર્થીઓને ગુણની પાત્રતામાં ૫ ટકાની છૂટ અપાઈ છે. આ ઉપરાંત, વિદ્યાર્થીઓએ ધોરણ-૧૦ કે ૧૨ જે માધ્યમમાં ભણ્યા હોય તેમાંથી કોઈપણ માધ્યમની સંસ્થામાં પ્રવેશ માટે અરજી કરવાની છૂટ આપવામાં આવી છે, જે શિક્ષણ ક્ષેત્રે એક ખૂબ જ આવકારદાયક પગલું છે.
