ઇમર્જિંગ સાયન્સ વિભાગની પરીક્ષામાં મોટી ભૂલ, યુનિવર્સિટી તંત્ર સામે સવાલો
અમદાવાદ સ્થિત ગુજરાત યુનિવર્સિટીમાં ફરી એકવાર પરીક્ષા વ્યવસ્થામાં ગંભીર ખામી સામે આવી છે. ઇમર્જિંગ સાયન્સ વિભાગમાં લેવામાં આવેલી M.Sc. એપ્લાઇડ મેથેમેટિક્સની પરીક્ષાએ વિદ્યાર્થીઓને અચાનક મુશ્કેલીમાં મૂકી દીધા હતા. પરીક્ષામાં અભ્યાસક્રમથી બહારના પ્રશ્નો આવતાં વિદ્યાર્થીઓ ગભરાઈ ગયા હતા. આ ઘટનાથી યુનિવર્સિટીની પરીક્ષા વ્યવસ્થાની વિશ્વસનીયતા પર પ્રશ્નચિહ્ન ઊભું થયું છે.
વિષયથી અસંબંધિત પ્રશ્નોથી વિદ્યાર્થીઓ અચંબામાં
મળતી વિગતો અનુસાર ‘કોમ્પ્યુટર ઓર્ગેનાઇઝેશન અને આર્કિટેક્ચર’ વિષયની પરીક્ષા દરમિયાન વિદ્યાર્થીઓને આપવામાં આવેલ પેપર અભ્યાસક્રમ સાથે મેળ ખાતું નહોતું. પ્રશ્નપત્ર જોઈને અનેક વિદ્યાર્થીઓ એકબીજાની તરફ જોઈ ચોંકી ગયા હતા. પ્રિન્ટિંગ પ્રક્રિયામાં મોટી ભૂલ થઈ હોવાનું પ્રાથમિક રીતે સામે આવ્યું છે. પરીક્ષા શરૂ થતાની સાથે જ ગડબડનો અહેસાસ વિદ્યાર્થીઓને થયો હતો.
વિદ્યાર્થીઓની ફરિયાદ બાદ તંત્ર હરકતમાં આવ્યું
વિદ્યાર્થીઓએ તરત જ પરીક્ષા હોલમાં હાજર સુપરવાઈઝરને સમગ્ર સ્થિતિથી અવગત કર્યા હતા. ફરિયાદ મળતાની સાથે યુનિવર્સિટી તંત્રએ નવું પ્રશ્નપત્ર તૈયાર કરવાની પ્રક્રિયા શરૂ કરી હતી. થોડા સમય બાદ વિદ્યાર્થીઓને યોગ્ય વિષયનું નવું પેપર આપવામાં આવ્યું હતું. જોકે આ દરમિયાન વિદ્યાર્થીઓનો કિંમતી સમય વેડફાયો હોવાની લાગણી વ્યાપક રીતે જોવા મળી.
અગાઉ પણ આવી ચૂકની પુનરાવર્તનથી ઉઠ્યા સવાલ
આ પહેલો બનાવ નથી કે જેમાં ગુજરાત યુનિવર્સિટીની પરીક્ષામાં આવી બેદરકારી જોવા મળી હોય. થોડા સમય પહેલાં જર્નાલિઝમ વિભાગની પરીક્ષામાં પણ અન્ય વિષયનું પેપર પૂછાયાનું સામે આવ્યું હતું. વારંવાર આવી ઘટનાઓ બનતા યુનિવર્સિટીની વહીવટી કામગીરી પર ગંભીર સવાલો ઉઠી રહ્યા છે. વિદ્યાર્થીઓમાં પણ પરીક્ષા પ્રણાલીને લઈને અસંતોષ વધતો જઈ રહ્યો છે.
