ગાંધીનગર સિવિલમાં સારવાર દરમિયાન એક જવાનનું દુઃખદ અવસાન, મંત્રીએ આપી સાંત્વના
ગુજરાતમાં સ્ટેચ્યુ ઓફ યુનિટી (SOU) ખાતે યોજાનારી પરેડ માટે આવેલા સુરક્ષા દળોના જવાનો મોટી સંખ્યામાં ડેન્ગ્યુની ઝપેટમાં આવ્યા છે. આ ગંભીર પરિસ્થિતિને ધ્યાનમાં રાખીને ગુજરાતના આરોગ્ય મંત્રી પ્રફુલ પાનશેરીયાએ ગઈકાલ મોડી રાત્રે ગાંધીનગર સિવિલ હોસ્પિટલની અચાનક મુલાકાત લીધી હતી. મંત્રીએ હોસ્પિટલમાં દાખલ તમામ જવાનોના ખબર-અંતર પૂછીને તેમનું મનોબળ વધાર્યું હતું અને તબીબો સાથે બેઠક યોજીને સારવારની સર્વાંગી સમીક્ષા કરી હતી.
૮૭ જવાનો સિવિલમાં દાખલ, ૫૦ સાજા થઈને રવાના
કેવડિયા ખાતે આયોજિત પરેડ કાર્યક્રમમાં ભાગ લેવા માટે દેશના વિવિધ રાજ્યોમાંથી સુરક્ષા દળોના જવાનો ગુજરાત આવ્યા છે. આરોગ્ય મંત્રી પ્રફુલ પાનશેરીયાએ આ મુલાકાત દરમિયાન જવાનોની સ્વાસ્થ્ય સ્થિતિ વિશે વિસ્તૃત માહિતી આપતા જણાવ્યું હતું કે, ઓરિસ્સા, ઝારખંડ, દિલ્હી, પશ્ચિમ બંગાળ અને છત્તીસગઢથી આવેલા BSF, CRPF તથા ITBP ના અંદાજે 87 જવાનોને તાવ અને અન્ય શારીરિક અસ્વસ્થતાની ફરિયાદો બાદ તાત્કાલિક ગાંધીનગર સિવિલ હોસ્પિટલ ખાતે ખસેડવામાં આવ્યા હતા.
તબીબોની સઘન સારવાર અને ઉત્તમ દેખરેખના પરિણામે જવાનોની તબિયતમાં ઝડપી સુધારો જોવા મળ્યો છે. છેલ્લા ૧૦ દિવસમાં કુલ 87 જવાનો દાખલ થયા હતા, જેમાંથી 50 જવાનો સંપૂર્ણપણે સાજા થઈ જતા તેમને હોસ્પિટલમાંથી રજા આપી દેવામાં આવી છે. જ્યારે બાકીના 37 જવાનો હજુ પણ સિવિલ હોસ્પિટલમાં સારવાર હેઠળ છે. મંત્રીએ રાહતનો શ્વાસ લેતા જણાવ્યું હતું કે હાલ તમામ 37 જવાનોની સ્થિતિ સ્થિર અને સુધારા પર છે, અને કોઈ પણ જવાનની તબિયત ગંભીર નથી.
જવાનોની સંભાળ માટે ખાસ સૂચનાઓ અને પોષણયુક્ત આહાર
ગાંધીનગર સિવિલ હોસ્પિટલ ખાતે જવાનોના સ્વાસ્થ્યની સમીક્ષા કરતી વખતે આરોગ્ય મંત્રીએ અત્યંત સંવેદનશીલ અભિગમ અપનાવ્યો હતો. તેમણે સ્પષ્ટ શબ્દોમાં જણાવ્યું હતું કે જે જવાનો દેશની સરહદો પર આપણી રક્ષા કરે છે, આ મુશ્કેલ સમયમાં તેમની ઉત્તમ સારવાર અને સંભાળ રાખવી આપણી નૈતિક ફરજ છે.
સારવારમાં કોઈ પણ પ્રકારની ક્ષતિ ન રહે તે માટે મંત્રીએ સિવિલ હોસ્પિટલના સુપ્રિન્ટેન્ડેન્ટ ડૉ. મીતા પરીખ અને તબીબી ટીમને ખાસ દિશા-નિર્દેશો આપ્યા હતા. તેમણે જવાનો પૂરતા પ્રમાણમાં પ્રવાહી (પાણી) પીએ તે સુનિશ્ચિત કરવા જણાવ્યું હતું. આ ઉપરાંત, જવાનોને સવારે પૌષ્ટિક નાસ્તો, તાજા ફળો, ફ્રૂટ જ્યુસ, સલાડ અને તબીબોની સલાહ મુજબનું સાત્વિક ભોજન સમયસર મળી રહે તેવી વિશેષ વ્યવસ્થાઓ ગોઠવવા પણ તાકીદ કરી હતી. ડેન્ગ્યુના દર્દીઓ માટે પ્લેટલેટ્સની જરૂરિયાત ઊભી થાય તો બ્લડ બેંકમાં પૂરતો સ્ટોક ઉપલબ્ધ રાખવા માટે પણ સમીક્ષા કરવામાં આવી હતી.
એક જવાનનું દુઃખદ અવસાન: વર્કઆઉટને કારણે કાર્ડિયાક અરેસ્ટની આશંકા
સમીક્ષા દરમિયાન મંત્રીએ સિવિલ હોસ્પિટલમાં સારવાર લઈ રહેલા એક જવાનના અચાનક થયેલા દુઃખદ નિધન પર ઊંડા શોકની લાગણી વ્યક્ત કરી હતી. તેમણે કહ્યું કે દેશની સેવા કરનાર જવાનને ગુમાવવો એ આપણા માટે મોટી ક્ષતિ છે અને રાજ્ય સરકાર શોકગ્રસ્ત પરિવારના દુઃખમાં પૂરી રીતે સહભાગી છે.
ઘટના વિશે વિગતો આપતા મંત્રીએ જણાવ્યું કે શરૂઆતમાં તમામ જવાનોની સ્થિતિ સ્થિર હતી, પરંતુ અચાનક એક જવાને છાતીમાં અસહ્ય દુખાવાની ફરિયાદ કરી હતી. તબીબોએ તાત્કાલિક ધોરણે ઈસીજી (ECG) સહિતની કાર્ડિયાક તપાસ કરીને તેમને આઈસીયુ (ICU) માં ખસેડ્યા હતા, પરંતુ સઘન પ્રયાસો છતાં તેમને બચાવી શકાયા નહોતા. તબીબોના પ્રાથમિક તારણ મુજબ, જવાનને તાવ અને અસ્વસ્થતા હોવા છતાં તેઓ પોતાની રોજિંદી ભારે કસરત કે વર્કઆઉટ ચાલુ રાખતા હતા, જેના કારણે હૃદયરોગનો હુમલો (કાર્ડિયાક અરેસ્ટ) આવ્યો હોવાની શક્યતા છે. જો કે, મૃત્યુનું સાચું કારણ ફાઇનલ પોસ્ટમોર્ટમ (PM) રિપોર્ટ આવ્યા બાદ જ સ્પષ્ટ થશે.
સરકાર દ્વારા સતત મોનિટરિંગ અને સાવચેતીના પગલાં
મુખ્યમંત્રી ભૂપેન્દ્ર પટેલના માર્ગદર્શન હેઠળ આરોગ્ય વિભાગ દ્વારા શરૂઆતથી જ યુદ્ધના ધોરણે કામગીરી કરવામાં આવી રહી છે. જવાનો જ્યાં રોકાયા છે તે રહેઠાણના સ્થળો પર મચ્છરોના ઉપદ્રવને ડામવા માટે દૈનિક બે વખત ફોગિંગ અને કીટકનાશક દવાઓનો છંટકાવ કરવામાં આવી રહ્યો છે. આ ઉપરાંત, આરોગ્ય વિભાગની વિશેષ ટીમ દ્વારા ૨૪ કલાક સતત સ્વાસ્થ્ય અને સ્વચ્છતાનું મોનિટરિંગ કરવામાં આવી રહ્યું છે, જેથી અન્ય જવાનો સંપૂર્ણપણે સુરક્ષિત રહી શકે.
