બે ગઠિયાઓની ચાલાકી: ડોક્ટરની નજર ચૂકવી પાંચ લાખ લઈને ફરાર
અમદાવાદ શહેરના ઇન્કમટેક્સ વિસ્તાર પાસે આવેલી એક ખાનગી ક્લિનિકમાં ધોળે દિવસે અદભૂત ચોરીની ઘટના બની. કમરના દુખાવાનું કારણ બતાવી બે ગઠિયા ડોક્ટર પાસે સારવાર લેવા આવ્યા, પરંતુ તેમની નજર તો કંઈક અલગ જ હતી. વાતોમાં ડોક્ટરની ઘડિયાળના વખાણ કરતા કરતા બંનેએ દવાખાનાના ડ્રોઅરમાં પડેલા પાંચ લાખ રૂપિયા ગાયબ કરી દીધા. આ આખી કરામત CCTVમાં સ્પષ્ટ રીતે કેદ થઈ હતી, જે બાદ પોલીસને આખી હકીકત સમજાઈ આવી.
ગઠિયાઓની ચાલાકીથી ડોક્ટર રહ્યા અજાણ
ઘટના 30 નવેમ્બરના દિવસે બની હતી, જ્યારે રાજકુમાર વિષ્ણુપ્રસાદ શર્મા અને બ્રિજ કિશોર નામના બે ગઠિયા ડો. પ્રવીણ આચાર્યના ક્લિનિકે પહોંચ્યા હતા. કમરના દુખાવો બતાવી પહેલા વિશ્વાસ જીતી લીધો અને પછી ડોક્ટરની ઘડિયાળની ખાસ પ્રશંસા કરતા વાતચીતમાં ઉલઝાવી દીધા. આ દરમ્યાન ડોક્ટરને ખબર પણ ન પડે તેમ બંનેએ ડ્રોઅરમાં રાખેલા પાંચ લાખની રકમ ઉચકીને ક્લિનિકમાંથી નીકળી ગયા. બાદમાં ડોક્ટરે પોલીસમાં આ અંગે ફરિયાદ નોંધાવી.
CCTV ફૂટેજનાં આધારે પોલીસની ઝડપી કાર્યવાહી
પોલીસે તપાસ શરૂ કરતા જ આખી ઘટના CCTVમાં સાફ દેખાઈ આવી. ગઠિયાઓ ઘડિયાળની વાતોમાં ડોક્ટર અને તેમની પત્નીને ભટકાવતા જોવા મળ્યા. ફૂટેજના આધારે એલસીબી ઝોન વનના સ્ટાફે બંને ચોરને સાબરમતી રિવરફ્રન્ટ નજીક ફરતા ઝડપ્યા. તેઓ સંપૂર્ણ નિર્ભય રીતે શહેરમાં ચક્કર લગાવી રહ્યા હતા, ત્યારે પોલીસે ઓળખીને પકડી પાડ્યા. ફરિયાદના આધારે પોલિસે વધુ કાર્યવાહી હાથ ધરી છે.
આરોપીઓ પાસેથી મુદ્દામાલની વસુલાત
ધરપકડ બાદ પોલીસે બંને પાસેથી ત્રણ મોબાઈલ ફોન, બલેનો કાર અને દોઢ લાખ રૂપિયા મળી કુલ 5.28 લાખનો મુદ્દામાલ કબજે કર્યો છે. પૂછપરછમાં સામે આવ્યું કે બંનેનો કોઇ પુરાવો એવો નથી કે તેઓ અગાઉ ગુનાહિત પ્રવૃત્તિમાં સામેલ હતા. રાજકુમાર શર્મા સાતમું ધોરણ સુધી ભણેલો અને ચોરીનો માસ્ટરમાઈન્ડ ગણાયો છે, જ્યારે બ્રિજકિશોર અભણ છે. ચોરી બાદ તેઓ 80 હજારની કિંમતનો iPhone ખરીદી પોતાના વતન ગ્વાલિયર જઈ મોજશોખ કરતા હતા.
વધુ ગુનાઓની તપાસમાં પોલીસે ઝડપ વધારી
પોલીસ હવેથી તપાસ કરી રહી છે કે બંનેએ શહેરમાં અથવા અન્યત્ર આવી કોઈ અન્ય ચોરી કરી છે કે નહીં. હાલ તો બંનેની ધરપકડ થઈ ગઈ છે અને વધુ ગુનાઓની કડિ જોડવાની પ્રક્રિયા ચાલુ છે. શહેરના મધ્ય વિસ્તારમાં દિનદહાડે બનેલી આ ઘટના લોકોને પણ ચોંકાવી ગઈ છે અને ક્લિનિકોમાં સુરક્ષાની વ્યવસ્થા અંગે નવા પ્રશ્નો ઉભા થયા છે.
