જાહેર માર્ગો પર અવરોધ દૂર કરવા મહાનગરપાલિકાની કડક કાર્યવાહી
કરમસદ-આણંદ મહાનગરપાલિકાના કમિશનરની સૂચના મુજબ, શહેરના વિવિધ વિસ્તારોમાં રસ્તા નડતરરૂપ ગેરકાયદેસર દબાણો દૂર કરવાની કડક કાર્યવાહી શરૂ કરવામાં આવી છે. મહાનગરપાલિકાના એસ્ટેટ વિભાગને આદેશ આપવામાં આવ્યો છે કે જાહેર માર્ગો પર થતા દબાણોને તાત્કાલિક અસરથી હટાવવામાં આવે, જેથી વાહનવ્યવહાર અને નાગરિકોની અવરજવરમાં કોઈ અડચણ ઊભી ન થાય.
લાંભવેલ રોડ પરથી ૫૦ ગુંઠા જમીન દબાણમુક્ત કરાઈ
આ ઝુંબેશના ભાગરૂપે આજે મહાનગરપાલિકાની એસ્ટેટ ટીમે લાંભવેલ રોડ પર આવેલા જોગણી માતાના મંદિર પાસે દરોડા પાડ્યા હતા. અહીં રસ્તાની આસપાસ ખડકાયેલા લારી-ગલ્લા, લોખંડની કેબિનો અને તાડપત્રી બાંધીને કરાયેલા કાચા દબાણોને દૂર કરવામાં આવ્યા હતા. આ કામગીરી દ્વારા અંદાજે ૫૦ ગુંઠા જેટલી સરકારી જમીન ખુલ્લી કરાવવામાં પાલિકાને સફળતા મળી છે.
જાહેર રસ્તા રોકનાર સામે કડક દંડની ચીમકી
એસ્ટેટ વિભાગના ઇન્સ્પેક્ટરે આ અંગે સ્પષ્ટ સૂચના આપી છે કે મનપા વિસ્તારમાં જાહેર રસ્તાઓ પર લોકોને અડચણ થાય તે રીતે લારી-ગલ્લા કે કેબિનો ઊભી રાખવી ગેરકાયદેસર છે. જો ભવિષ્યમાં ફરીથી આવા દબાણો કરવામાં આવશે, તો તંત્ર દ્વારા સામાન જપ્ત કરવા ઉપરાંત કડક દંડનીય કાર્યવાહી પણ કરવામાં આવશે. આ કામગીરીનો હેતુ શહેરના રસ્તાઓને ખુલ્લા અને વ્યવસ્થિત રાખવાનો છે.
