૧ સપ્ટેમ્બરથી બદલાઈ જશે LPG અને PNG સાથે જોડાયેલા આ મહત્વના નિયમો: ગેસ સિલિન્ડરના દરોથી લઈને e-KYC અને નવા કનેક્શન પર પડશે મોટી અસર
આવતીકાલે એટલે કે ૧ સપ્ટેમ્બરથી નવા મહિનાનો પ્રારંભ થઈ રહ્યો છે. દર મહિનાની પહેલી તારીખે દેશમાં નાણાકીય અને સેવા ક્ષેત્રે અનેક મહત્વના ફેરફારો થતા હોય છે, જેની સીધી અસર સામાન્ય નાગરિકોના ખિસ્સા અને દૈનિક બજેટ પર પડે છે. આ ક્રમમાં સપ્ટેમ્બર મહિનાની શરૂઆત સાથે જ રસોઈ ગેસ (LPG) અને પાઈપ્ડ નેચરલ ગેસ (PNG) સાથે જોડાયેલા કેટલાક અત્યંત મહત્વપૂર્ણ નિયમોમાં ફેરફાર થવા જઈ રહ્યા છે.
આ નવા ફેરફારોમાં ગેસ સિલિન્ડરના દરોમાં સંભવિત વધ-ઘટ, નવા કનેક્શન માટેની સરકારી યોજનાઓ અને બાયોમેટ્રિક e-KYC અપડેટ્સ જેવી બાબતોનો સમાવેશ થાય છે.
શું સપ્ટેમ્બરમાં ગેસ સિલિન્ડરના ભાવ ઘટશે?
દર મહિનાની પહેલી તારીખે દેશની જાહેર ક્ષેત્રની ઓઇલ માર્કેટિંગ કંપનીઓ (OMCs) દ્વારા ૧૪.૨ કિલોગ્રામના ઘરેલુ સિલિન્ડર તેમજ ૧૯ કિલોગ્રામના વ્યાપારી (કોમર્શિયલ) સિલિન્ડરના દરો સમીક્ષા કરીને જાહેર કરવામાં આવે છે. આ ઉપરાંત ૫ કિલોગ્રામ અને ૧૦ કિલોગ્રામના ‘ફ્રી-ટ્રેડ’ શ્રેણીના સિલિન્ડરના ભાવોમાં પણ આંતરરાષ્ટ્રીય બજારની સ્થિતિ મુજબ સુધારો કરાય છે.
ઓગસ્ટ મહિના દરમિયાન ઘરેલુ LPG ના ભાવ સ્થિર રહ્યા હતા, જ્યારે વેપારીઓ માટે રાહતરૂપ સમાચાર એ હતા કે કોમર્શિયલ સિલિન્ડરના ભાવમાં ₹૧૯૨ નો નોંધપાત્ર ઘટાડો થયો હતો. કોલકાતા, મુંબઈ, ચેન્નાઈ, નોઈડા, હૈદરાબાદ, ચંદીગઢ અને તિરુવનંતપુરમ જેવા તમામ પ્રમુખ શહેરોમાં આ રાહત જોવા મળી હતી.
હવે ગૃહિણીઓ અને સામાન્ય ગ્રાહકો આતુરતાથી રાહ જોઈ રહ્યા છે કે ૧ સપ્ટેમ્બરે ઘરેલુ ગેસ સિલિન્ડરના ભાવ ઘટે છે કે કેમ. જોકે, દરોમાં ઘટાડો થશે, વધારો થશે કે ભાવ યથાવત રહેશે તેનો સ્પષ્ટ ચિત્ર ૧ સપ્ટેમ્બરની વહેલી સવારે જ સામે આવશે.
LPG e-KYC પૂર્ણ કરવાની આજે છેલ્લી તક
જો તમે હજુ સુધી તમારા LPG ગેસ કનેક્શનનું e-KYC પૂર્ણ નથી કરાવ્યું, તો આજે જ તે પ્રક્રિયા પૂરી કરી લેવી અનિવાર્ય છે. તેલ વિતરણ કંપનીઓએ આધાર-આધારિત બાયોમેટ્રિક e-KYC પૂર્ણ કરવા માટે ૩૧ ઓગસ્ટ, ૨૦૨૬ ની આખરી સમયસીમા નક્કી કરી છે.
જે ગ્રાહકો સમયસર આ પ્રક્રિયા પૂર્ણ કરવામાં નિષ્ફળ રહેશે, તેમને ૧ સપ્ટેમ્બરથી ગેસ સબસિડી મળવામાં મુશ્કેલી પડી શકે છે અને સાથે જ નવા સિલિન્ડરના સપ્લાય કે બુકિંગમાં પણ અડચણોનો સામનો કરવો પડી શકે છે. ગ્રાહકો આ કામગીરી પોતાના ઘરબેઠા ઓનલાઈન પોર્ટલ અથવા મોબાઈલ એપ દ્વારા કરી શકે છે અથવા પોતાની નજીકની ગેસ એજન્સીની રૂબરૂ મુલાકાત લઈને પણ બાયોમેટ્રિક વેરિફિકેશન કરાવી શકે છે.
PNG પ્રોત્સાહન યોજનાની આવતીકાલથી શરૂઆત
કેન્દ્રીય સ્તરે શહેરી અને ગ્રામીણ વિસ્તારોમાં સ્વચ્છ ઈંધણના વપરાશને પ્રોત્સાહન આપવા માટે ૧ સપ્ટેમ્બરથી એક નવી ‘PNG પ્રોત્સાહન યોજના’ અમલમાં આવી રહી છે. આ સરકારી યોજનાનો મુખ્ય ઉદ્દેશ્ય દેશભરના વધુને વધુ શહેરો, નગરો અને ગ્રામીણ વિસ્તારોને પાઇપ્ડ નેચરલ ગેસ (PNG) નેટવર્ક સાથે ઝડપથી જોડવાનો છે.
આ યોજના હેઠળ જે નવા ગ્રાહકો પોતાના ઘરમાં PNG કનેક્શન મેળવવા માંગતા હશે, તેમને નોંધણી ફી (Registration Fee) અને સિક્યોરિટી ડિપોઝિટ પર વિશેષ છૂટછાટો મળશે. આ ઉપરાંત ગ્રાહકોની અનુકૂળતા માટે લવચીક EMI (હપ્તા) ના વિકલ્પો પણ પૂરા પાડવામાં આવશે.
સરકાર દ્વારા આપવામાં આવતી સબસિડી અને પ્રોત્સાહનોના કારણે ગેસ વિતરણ કંપનીઓ માટે નવા વિસ્તારોમાં મુખ્ય પાઇપલાઇનનું નેટવર્ક પાથરવું નાણાકીય રીતે વધુ સરળ અને ઝડપી બનશે, જેનાથી સામાન્ય લોકોને સિલિન્ડર બદલવાની ઝંઝટમાંથી કાયમી મુક્તિ મળી શકશે.
