PM Modi: ‘પ્રેસ રિલીઝથી Instagram Reels સુધીનું પરિવર્તન જોયું’, પત્રકારો સાથેની મુલાકાતમાં PM મોદીએ યાદ કર્યા જૂના દિવસો, મીડિયા વિશે કહી મોટી વાત
દેશના વડાપ્રધાન નરેન્દ્ર મોદીએ નવી દિલ્હીમાં ભાજપના મુખ્યાલય ખાતે પત્રકારો માટે આયોજિત દિવાળી મિલન કાર્યક્રમમાં હાજરી આપી હતી. આ દરમિયાન તેમણે પત્રકારો સાથે સંવાદ સાધ્યો હતો અને મીડિયા જગત સાથેના પોતાના જૂના અનુભવો પણ શેર કર્યા હતા. વડાપ્રધાને પત્રકારત્વના બદલાતા સ્વરૂપનો ઉલ્લેખ કરતાં કહ્યું કે તેમણે પ્રેસ રિલીઝના જમાનાથી લઈને Instagram Reelsના આજના યુગ સુધી મીડિયાની સફર જોઈ છે.
તેમણે પત્રકારોના કામની પ્રશંસા કરવાની સાથે દેશની સફળતાઓને લોકો સુધી પહોંચાડવામાં મીડિયાની ભૂમિકા મહત્ત્વપૂર્ણ ગણાવી હતી.
પત્રકારોની કામગીરીને બિરદાવી
દિવાળી અને છઠ પૂજાના અવસર પર વડાપ્રધાન મોદીએ પત્રકારો અને તેમના પરિવારોને શુભેચ્છાઓ પાઠવી હતી. તેમણે કહ્યું કે તહેવારોના દિવસોમાં દરેક વ્યક્તિ પોતાના પરિવાર સાથે સમય પસાર કરવા ઇચ્છે છે, પરંતુ પત્રકારોનું કામ એવું છે કે તેમને સતત બ્રેકિંગ ન્યૂઝની પાછળ દોડવું પડે છે.
આવી વ્યસ્તતા વચ્ચે પણ પત્રકારો કાર્યક્રમમાં હાજર રહ્યા તે બદલ તેમણે આભાર વ્યક્ત કર્યો હતો. મજાકિયા અંદાજમાં તેમણે આ કાર્યક્રમને ‘નોન-બ્રેકિંગ ન્યૂઝ’ કાર્યક્રમ ગણાવ્યો હતો.
ફેક્સ મશીનથી Instagram Reels સુધીની સફર
પોતાના સંબોધનમાં વડાપ્રધાને મીડિયામાં આવેલા ટેક્નોલોજીકલ પરિવર્તનનો ખાસ ઉલ્લેખ કર્યો હતો. તેમણે જણાવ્યું કે 1990ના દાયકામાં જ્યારે તેઓ ભાજપમાં સંગઠનાત્મક જવાબદારીઓ સંભાળતા હતા ત્યારે પ્રેસ રિલીઝ મોકલવા માટે ફેક્સ મશીન શોધવું પડતું હતું.
તે સમયે સમાચાર પહોંચાડવાની પ્રક્રિયા આજની સરખામણીમાં ઘણી ધીમી હતી. પરંતુ આજે ડિજિટલ ટેક્નોલોજીના કારણે સમાચાર ગણતરીની સેકન્ડોમાં લાખો લોકો સુધી પહોંચી જાય છે.
મોદીએ કહ્યું કે તેમણે મીડિયાની આ સમગ્ર સફર નજીકથી જોઈ છે. અગાઉના સમયમાં કેમેરાની સંખ્યા ઓછી હતી, પરંતુ પત્રકારો સાથેના સંબંધોમાં આત્મીયતા હતી. તેમણે ભાજપના જૂના કાર્યાલયના દિવસો યાદ કરતાં જણાવ્યું કે ત્યારે આવા કાર્યક્રમોમાં ખુરશીઓ ગોઠવવાથી લઈને મહેમાનોની વ્યવસ્થા કરવાની જવાબદારી પણ તેઓ સંભાળતા હતા.
પત્રકારોએ જ આપી હતી ગુજરાતના મુખ્યમંત્રી બનવાની જાણકારી!
વડાપ્રધાન મોદીએ પોતાના રાજકીય જીવન સાથે જોડાયેલો એક રસપ્રદ કિસ્સો પણ સંભળાવ્યો હતો. તેમણે જણાવ્યું કે એક વખત પત્રકારોનું એક જૂથ અચાનક તેમની પાસે આવ્યું હતું અને તેમને મીઠાઈ ખવડાવવાનું કહ્યું હતું.
જ્યારે તેમણે તેનું કારણ પૂછ્યું ત્યારે પત્રકારોએ કહ્યું કે હવે તમે ગુજરાત જઈ રહ્યા છો અને ગુજરાતના મુખ્યમંત્રી બનવાના છો.
મોદીએ યાદ કર્યું કે તે સમયે ભાજપના ગણતરીના વરિષ્ઠ નેતાઓને જ આ વાતની જાણ હતી, પરંતુ પત્રકારોને આ સમાચાર અગાઉથી મળી ગયા હતા. આખરે 7 ઓક્ટોબર, 2001ના રોજ તેમણે ગુજરાતના મુખ્યમંત્રી તરીકે શપથ લીધા હતા.
2047 સુધીમાં વિકસિત ભારત બનાવવાનું લક્ષ્ય
પોતાના સંબોધનમાં વડાપ્રધાને ભારતના વિકાસના લક્ષ્યનો પણ ઉલ્લેખ કર્યો હતો. તેમણે કહ્યું કે પત્રકારત્વમાં ડેડલાઇનનું વિશેષ મહત્ત્વ હોય છે. અખબાર છાપવાનું હોય કે ટીવી પર સમાચાર પ્રસારિત કરવાના હોય, દરેક જગ્યાએ સમયમર્યાદા મહત્ત્વપૂર્ણ છે.
તેવી જ રીતે ભારત સામે પણ વર્ષ 2047ની એક મોટી ડેડલાઇન છે. આઝાદીના 100 વર્ષ પૂર્ણ થાય ત્યારે ભારતને વિકસિત રાષ્ટ્ર બનાવવાનું લક્ષ્ય છે.
તેમણે અંતરિક્ષ વિજ્ઞાન, મોબાઇલ મેન્યુફેક્ચરિંગ, સ્ટાર્ટઅપ, સૌર ઊર્જા અને માળખાકીય વિકાસ સહિતનાં ક્ષેત્રોમાં ભારતની પ્રગતિનો ઉલ્લેખ કર્યો હતો.
મીડિયાને દેશની સફળતાઓ રજૂ કરવાની અપીલ
વડાપ્રધાન મોદીએ ભારતીય મીડિયાને દેશની સફળતાની કહાનીઓ લોકો સુધી પહોંચાડવા અપીલ કરી હતી. તેમણે કહ્યું કે દેશમાં અનેક સકારાત્મક પરિવર્તનો આવી રહ્યાં છે અને આવી સફળતાઓને યોગ્ય સ્થાન મળવું જોઈએ.
આ ઉપરાંત તેમણે ડ્રગ્સના દુષણ સામે જાગૃતિ ફેલાવવામાં પણ મીડિયાને સક્રિય ભૂમિકા ભજવવા વિનંતી કરી હતી.
