સબસિડી જોઈતી હોય તો આ ભૂલ ભૂલથી પણ ન કરતા: રજિસ્ટ્રેશન વગર નહીં મળે એક પણ રૂપિયો
આજના સમયમાં મોંઘા વીજળીના બિલમાંથી મુક્તિ મેળવવા માટે સોલાર પેનલ એક અત્યંત લોકપ્રિય અને ફાયદાકારક વિકલ્પ બની ગઈ છે. કેન્દ્ર સરકારની ‘પીએમ સૂર્ય ઘર મફત વીજળી યોજના’ જાહેર થયા બાદથી લોકોમાં પોતાના ઘરની છત પર રૂફટોપ સોલાર પેનલ લગાવવાનો ભારે ઉત્સાહ જોવા મળી રહ્યો છે. સોલાર પેનલ લગાવવાથી ન માત્ર વીજ બિલમાં મોટી રાહત મળે છે, પરંતુ સરકાર તરફથી મળતી મજબૂત સબસિડી આર્થિક બોજ પણ ખૂબ જ ઓછો કરી દે છે. જોકે, ઘણા લોકો એવું માને છે કે સોલાર પેનલ લગાવનાર દરેક વ્યક્તિને આ સબસિડી મળે છે, પરંતુ વાસ્તવિકતા અલગ છે. કેન્દ્ર સરકારે આ યોજનાનો લાભ આપવા માટે ચોક્કસ નિયમો અને પાત્રતાના માપદંડો નક્કી કર્યા છે.
કોને મળશે પીએમ સૂર્ય ઘર યોજનાની સબસિડી?
સરકારના નિયમો મુજબ સબસિડીનો લાભ લેવા માટે અરજદાર પાસે નીચે મુજબની પાત્રતા હોવી અનિવાર્ય છે:
ભારતીય નાગરિકત્વ: અરજદાર ભારતનો મૂળ નાગરિક હોવો જોઈએ.
માન્ય વીજળી કનેક્શન: જે મકાન પર સોલાર પેનલ લગાવવાની છે, ત્યાં અરજદારના નામે કાયદેસરનું એટલે કે માન્ય વીજળી મીટર/કનેક્શન હોવું ફરજિયાત છે.
મજબૂત છત: મકાનની છત સોલાર પેનલનું વજન સહન કરી શકે તેવી સારી અને મજબૂત સ્થિતિમાં હોવી જોઈએ.
અન્ય યોજનાનો લાભ નહીં: અરજદાર અગાઉથી કેન્દ્ર કે રાજ્ય સરકારની અન્ય કોઈ સોલાર સબસિડી યોજનાનો લાભ લેતો ન હોવો જોઈએ.
કોને નહીં મળે સબસિડીનો લાભ?
કેન્દ્ર સરકારે સ્પષ્ટ કર્યું છે કે પીએમ સૂર્ય ઘર મફત વીજળી યોજના માત્ર ને માત્ર સામાન્ય રહેણાંક મકાનો (Residential properties) માટે જ બનાવવામાં આવી છે. તેથી નીચે મુજબના સ્થળો પર સોલાર પેનલ લગાવવા પર કોઈપણ પ્રકારની સબસિડી મળશે નહીં:
કોમર્શિયલ મિલકતો: દુકાનો, શોપિંગ કોમ્પ્લેક્સ, કમર્શિયલ ઓફિસો અને બિઝનેસ સેન્ટર્સ પર લગાવેલી સોલાર પેનલ પર સબસિડી મળવાપાત્ર નથી.
ઔદ્યોગિક એકમો: કોઈપણ પ્રકારના નાના કે મોટા કારખાના, ફેક્ટરીઓ અને ઈન્ડસ્ટ્રીયલ વિસ્તારોમાં આ યોજનાનો લાભ મળશે નહીં.
સરકારી ઇમારતો: સરકારી કચેરીઓ, શાળા-કોલેજો કે અન્ય સરકારી મિલકતો પર લગાવવામાં આવતી પેનલ માટે સબસિડી ઉપલબ્ધ નથી.
આ ભૂલ કરશો તો સબસિડીથી વંચિત રહી જશો
સૌથી મહત્વની બાબત એ છે કે જો તમે પીએમ સૂર્ય ઘર યોજનાના સત્તાવાર પોર્ટલ પર આગોતરું રજિસ્ટ્રેશન કરાવ્યા વગર જ સીધા કોઈ વેન્ડર પાસે સોલાર પેનલ નંખાવી લેશો, તો તમને સબસિડીનો એક પણ રૂપિયો મળશે નહીં. સબસિડીનો દાવો કરવા માટે પહેલા સત્તાવાર પોર્ટલ પર અરજી કરવી, માન્ય વેન્ડરની પસંદગી કરવી અને પ્રક્રિયા મુજબ ટેકનિકલ મંજૂરી મેળવવી અત્યંત આવશ્યક છે. તેથી સોલાર પેનલ લગાવતા પહેલા તમામ નિયમો સમજીને આગળ વધવું હિતાવહ છે.
