Post Office Scheme: દરરોજ માત્ર ₹૧૦૦ની નાની બચત તમને અપાવશે ₹૫ લાખથી વધુનું ગેરંટીડ ભંડોળ, જાણો સરકારની આ સુપરહિટ યોજના
આજના મોંઘવારીના જમાનામાં દરેક વ્યક્તિ પોતાના ભવિષ્યને સુરક્ષિત કરવા માટે કઈંક ને કઈંક બચત કરવા માંગે છે. પરંતુ શેરબજાર, મ્યુચ્યુઅલ ફંડ કે અન્ય ખાનગી નાણાકીય સ્કીમોમાં રહેલા બજારના જોખમોને કારણે ઘણા લોકો ત્યાં પૈસા રોકતા ડરે છે. જો તમે પણ કોઈ પણ જાતનું જોખમ લીધા વિના, સંપૂર્ણ સરકારી સુરક્ષા સાથે ૧૦૦ ટકા ગેરંટીડ વળતર મેળવવા ઈચ્છતા હોવ, તો ભારતીય પોસ્ટ ઓફિસ (Post Office) ની રિકરિંગ ડિપોઝિટ એટલે કે આરડી (RD) યોજના તમારા માટે સૌથી આકર્ષક અને શ્રેષ્ઠ સાધન સાબિત થઈ શકે છે. આ સ્કીમ ખાસ કરીને દેશના સામાન્ય ગ્રાહકો, ગૃહિણીઓ અને નાના પગારદાર વર્ગને ધ્યાનમાં રાખીને તૈયાર કરવામાં આવી છે, જેથી તેઓ પોતાની રોજિંદી નાની બચતમાંથી ભવિષ્ય માટે એક મોટું અને મજબૂત ભંડોળ આસાનીથી તૈયાર કરી શકે.
દરરોજ ₹૧૦૦ની બચત અને ₹૫ લાખનું ગણિત
હાલના સમયમાં પોસ્ટ ઓફિસ પોતાની રિકરિંગ ડિપોઝિટ યોજના પર વાર્ષિક ૬.૭ ટકાના દરે જોરદાર વ્યાજ ઓફર કરી રહી છે, જેમાં વ્યાજની ગણતરી ચક્રવૃદ્ધિ આધાર પર થાય છે. જો તમે તમારા રોજિંદા ખર્ચમાંથી માત્ર ₹૧૦૦ ની બચત કરીને દર મહિને નિયમિત ₹૩,૦૦૦ આ સરકારી આરડી ખાતામાં જમા કરો છો અને આ રોકાણને સતત ૧૦ વર્ષ (એટલે કે મૂળ મુદત બાદ બીજા ૫ વર્ષ લંબાવીને) સુધી ચાલુ રાખો છો, તો તમારી કુલ જમા થયેલી મૂળ મૂડી ₹૩,૬૦,૦૦૦ થશે. હવે સરકારના વર્તમાન ૬.૭ ટકા વ્યાજ દર મુજબ, ૧૦ વર્ષના ગાળામાં આ રકમ પર તમને આશરે ₹૧,૫૨,૫૬૫ જેટલું તો ફક્ત વ્યાજ જ મળશે. પરિણામે, જ્યારે તમારી પોલિસીની મુદત પૂરી થશે ત્યારે તમને કુલ ₹૫,૧૨,૫૬૫ નું મોટું ભંડોળ એકમુશ્ત હાથમાં મળશે. આ શિસ્તબદ્ધ બચત પદ્ધતિ સામાન્ય માણસને પણ અમીર બનાવી શકે છે.
દરેક વર્ગ માટે ખાતું ખોલાવવાની સરળ પાત્રતા
પોસ્ટ ઓફિસની આ લોકપ્રિય યોજના દેશના દરેક નાગરિક માટે ખુલ્લી છે. આમાં કોઈ પણ વ્યક્તિ પોતાની ઈચ્છા અનુસાર સિંગલ એકાઉન્ટ અથવા પરિવારના સભ્ય સાથે મળીને જોઈન્ટ (સંયુક્ત) એકાઉન્ટ ખોલાવી શકે છે. આ સ્કીમની સૌથી મોટી સુંદરતા એ છે કે આમાં ખાતું શરૂ કરવા માટે લઘુત્તમ માસિક રકમ માત્ર ₹૧૦૦ રાખવામાં આવી છે, જ્યારે રોકાણ માટેની કોઈ મહત્તમ મર્યાધા નક્કી નથી. ગ્રાહકો પોતાની આર્થિક સગવડ મુજબ માસિક હપ્તો ગમે તેટલો ઊંચો રાખી શકે છે. માતા-પિતા પોતાના નાના બાળકોના ઉજ્જવળ ભવિષ્યને ધ્યાનમાં રાખીને તેમના નામે પણ આ ખાતું શરૂ કરી શકે છે. જો બાળકની ઉંમર ૧૦ વર્ષ કે તેથી વધુ હોય, તો તે પોતે પણ આ ખાતાની લેણદેણ સંભાળી શકે છે અને બાળક ૧૮ વર્ષનું થતાં જ સામાન્ય કેવાયસી (KYC) પ્રક્રિયા કરીને આ ખાતાને પુખ્ત વયના ખાતામાં ફેરવી શકાય છે.
મુશ્કેલ સમયમાં કામ આવશે સસ્તી લોનની સુવિધા
ઘણીવાર એવું બને છે કે રોકાણ કર્યા પછી અચાનક કોઈ મેડિકલ ઈમરજન્સી કે ઘરના અન્ય મોટા ખર્ચ આવી પડે છે. આવી સ્થિતિમાં પોસ્ટ ઓફિસ ગ્રાહકોને પોતાની જમા પૂંજી પર લોન લેવાની અદભુત સુવિધા આપે છે. જો તમારું આરડી ખાતું ખુલેલાને એક વર્ષ પૂરું થઈ ગયું હોય અને તમે સળંગ ૧૨ હપ્તા નિયમિત ભર્યા હોય, તો તમે તમારા ખાતામાં જમા થયેલી કુલ રકમના પૂરા ૫૦ ટકા સુધીની રોકડ લોન તરીકે ઉપાડી શકો છો. આ લોનની ખાસિયત એ છે કે તેના પર લાગતો વ્યાજ દર તમારી આરડી પર મળતા વ્યાજ કરતાં માત્ર ૨ ટકા જ વધુ હોય છે, જે બજારની ખાનગી બેંકોની પર્સનલ લોન કરતાં ઘણો સસ્તો છે. આ લોનની ચુકવણી તમે દર મહિને નાના હપ્તામાં અથવા એકસાથે કરી શકો છો. જો તમે મુદત સુધી લોન પરત નથી કરી શકતા, તો પણ ચિંતાની જરૂર નથી, કારણ કે મેચ્યોરિટી વખતે તમારી મળવાપાત્ર રકમમાંથી લોનની બાકી રકમ કાપીને બાકીના પૈસા તમને ચૂકવી દેવાય છે.
હપ્તા ભરવાના અને મુદત વધારવાના સરળ નિયમો
પોસ્ટ ઓફિસની આ યોજનાની મૂળ સમયમર્યાદા ૫ વર્ષ (૬૦ મહિના) ની હોય છે. જો ૫ વર્ષ પૂરા થયા પછી પણ રોકાણકારને આ પૈસાની જરૂર ન હોય, તો તે એક સાદી અરજી આપીને આ ખાતાને બીજા ૫ વર્ષ માટે લંબાવી શકે છે. જો લંબાવેલા સમયગાળામાં નવા હપ્તા ન ભરવા હોય, તો પણ જૂની રકમ પર વ્યાજ મળવાનું ચાલુ રહે છે. હપ્તો જમા કરાવવાના નિયમો વિશે વાત કરીએ તો, જો તમે મહિનાની ૧ થી ૧૫ તારીખની વચ્ચે ખાતું ખોલાવ્યું હોય, તો દર મહિને ૧૫ તારીખ સુધીમાં હપ્તો ભરી દેવો પડે છે. અને જો ખાતું ૧૬ તારીખથી મહિનાના અંતિમ દિવસ વચ્ચે ખુલ્યું હોય, તો હપ્તો મહિનાના છેલ્લા કાર્યકારી દિવસ સુધીમાં જમા કરાવવાનો રહે છે. જો કોઈ અનિવાર્ય સંજોગોમાં ગ્રાહકે ખાતું સમય પહેલાં બંધ કરવું હોય, તો ૩ વર્ષ પૂરા થયા પછી પ્રિ-મેચ્યોર ક્લોઝરની મંજૂરી મળે છે, પરંતુ તેવા કિસ્સામાં આરડીનું વ્યાજ મળવાને બદલે પોસ્ટ ઓફિસના સામાન્ય સેવિંગ્સ એકાઉન્ટ મુજબનું વ્યાજ ચૂકવવામાં આવે છે.
નાની બચતની શક્તિ અને કેન્દ્ર સરકારની ગેરંટી ધરાવતી આ યોજના ખરેખર મધ્યમ વર્ગ માટે આશીર્વાદ સમાન છે, જે સુરક્ષિત ભવિષ્યનો પાયો નાખે છે.
