‘પિતા ખામેનેઈનું અધૂરું કામ પૂરું કરશે મુજતબા’: ઈરાનના નવા સુપ્રીમ લીડર વિશે પુતિનનું મોટું નિવેદન
પશ્ચિમ એશિયામાં ચાલી રહેલા ભયાનક સંઘર્ષની વચ્ચે ઈરાનમાં થયેલા સત્તા પરિવર્તને સમગ્ર વિશ્વનું ધ્યાન ખેંચ્યું છે. આયતોલ્લા અલી ખામેનેઈના નિધન બાદ તેમના પુત્ર મુજતબા ખામેનેઈને ઈરાનના નવા સુપ્રીમ લીડર તરીકે નિયુક્ત કરવામાં આવ્યા છે. આ નિમણૂક પર રશિયાના રાષ્ટ્રપતિ વ્લાદિમીર પુતિને મહત્વની પ્રતિક્રિયા આપી છે, જે ઈરાન અને રશિયા વચ્ચેના મજબૂત સંબંધોનો નિર્દેશ કરે છે.
પુતિનનો મુજતબા પર વિશ્વાસ
રશિયાના રાષ્ટ્રપતિ વ્લાદિમીર પુતિને નવા સુપ્રીમ લીડર મુજતબા ખામેનેઈને અભિનંદન પાઠવતા વિશ્વાસ વ્યક્ત કર્યો છે કે તેઓ તેમના પિતાના વારસાને આગળ ધપાવશે. પુતિને કહ્યું કે, “મુજતબા ખામેનેઈ તેમના પિતા આયતોલ્લા અલી ખામેનેઈ દ્વારા શરૂ કરાયેલા કાર્યો અને ઈરાનની સાર્વભૌમત્વ જાળવી રાખવાની લડાઈને પૂર્ણ કરશે.” નિષ્ણાતો માને છે કે પુતિનનું આ નિવેદન અમેરિકા અને ઈઝરાયેલ માટે એક સ્પષ્ટ સંદેશ છે કે રશિયા મુશ્કેલ સમયમાં ઈરાનની પડખે ઊભું છે.
ઈરાને રજૂ કર્યો આત્મરક્ષણનો તર્ક
બીજી તરફ, ઈઝરાયેલ અને અમેરિકાના સતત વધી રહેલા હુમલાઓ વચ્ચે ઈરાને આંતરરાષ્ટ્રીય મંચ પર પોતાનો પક્ષ રાખ્યો છે. ઈરાન સરકાર દ્વારા જારી કરવામાં આવેલા નિવેદનમાં જણાવવામાં આવ્યું છે કે, “ઈરાન પર થઈ રહેલા હુમલાઓ તેની અખંડિતતા પર પ્રહાર છે. અમે આંતરરાષ્ટ્રીય કાયદાઓ હેઠળ મળેલી આત્મરક્ષણ (Self-Defense) ની સત્તાનો ઉપયોગ કરી રહ્યા છીએ.” ઈરાને સ્પષ્ટ કર્યું છે કે તે તેના સૈન્ય મથકો અને પરમાણુ મથકોની રક્ષા કરવા માટે કોઈપણ હદ સુધી જવા તૈયાર છે.
જંગના મેદાનમાં નવો વળાંક
મુજતબા ખામેનેઈએ પદ સંભાળતાની સાથે જ ઈઝરાયેલ વિરુદ્ધ આક્રમક વલણ અપનાવ્યું છે. ઈરાની મીડિયા રિપોર્ટ્સ અનુસાર, નવા સુપ્રીમ લીડરના આદેશથી જ ઈઝરાયેલના કબજા હેઠળના વિસ્તારો તરફ મિસાઈલોનો મારો ચલાવવામાં આવ્યો છે. રિવોલ્યુશનરી ગાર્ડ્સ (IRGC) એ પણ નવા નેતા પ્રત્યે પોતાની વફાદારી જાહેર કરી છે, જેનાથી ઈરાનની સૈન્ય તાકાત વધુ સંગઠિત થઈ હોવાનું જણાય છે.
વૈશ્વિક અર્થતંત્ર પર ખતરો
પુતિન અને મુજતબા વચ્ચેના વધતા તાલમેલથી પશ્ચિમી દેશો ચિંતિત છે. આ યુદ્ધ માત્ર સરહદ સુધી સીમિત નથી રહ્યું, પરંતુ તેની અસર તેલના ભાવ અને વૈશ્વિક સપ્લાય ચેઈન પર પણ પડી રહી છે. જો રશિયા અને ઈરાન વધુ નજીક આવશે, તો મધ્ય પર્વમાં અમેરિકાનો પ્રભાવ ઘટી શકે છે અને યુદ્ધ વધુ લાંબુ ખેંચાઈ શકે છે.
