સુરત: ચાલુ ટ્રેને મોબાઈલ સ્નેચિંગ કરતી ઘાતક ગેંગ ઝડપાઈ, પશ્ચિમ રેલવે LCB અને SOG સુરતની કાર્યવાહીથી નિર્મમ મનુષ્યવધનો ભેદ ઉકેલાયો
સુરત અને આસપાસના રેલવે વિસ્તારમાં ચાલુ ટ્રેને મુસાફરોના મોબાઈલ ઝૂંટવી લેતી અતિ જોખમી અને ઘાતક ગેંગનો સુરત રેલવે પોલીસે પર્દાફાશ કર્યો છે. પાનોલી રેલવે સ્ટેશન નજીક તાજેતરમાં બનેલી એક કમકમાટીભરી અને હૃદયદ્રાવક ઘટનાનો સચોટ ભેદ ઉકેલીને પોલીસે આ ગેંગના બે મુખ્ય સાગરીતોની ધરપકડ કરી લીધી છે. પશ્ચિમ રેલવે વડોદરા યુનિટની એલસીબી (LCB) અને એસઓજી (SOG) સુરતની સંયુક્ત ટીમે આ સફળ કામગીરી પાર પાડી છે.
ચાલુ ટ્રેને દરવાજે બેઠેલા મુસાફરનો ફોન ઝૂંટવતાં સર્જાયી ગંભીર દુર્ઘટના
પોલીસ તપાસમાં બહાર આવેલી વિગતો મુજબ, આ શાર્પ ગુનેગારો ચાલુ ટ્રેનના દરવાજે બેસીને કે ઉભા રહીને મોબાઈલ ફોનનો ઉપયોગ કરતા નિર્દોષ મુસાફરોને જ પોતાનો શિકાર બનાવતા હતા. તાજેતરમાં પાનોલી રેલવે સ્ટેશન પાસેથી પસાર થઈ રહેલી ટ્રેનના દરવાજે બેસીને એક મુસાફર મોબાઈલ વાપરી રહ્યો હતો, ત્યારે જ આ ગેંગના સભ્યોએ ઝડપથી તેનો ફોન ઝૂંટવવાનો પ્રયાસ કર્યો હતો. આ આચાનક થયેલા ઝપાઝપીમાં મુસાફર પોતાનું સંતુલન ગુમાવી બેઠો હતો અને ચાલુ ટ્રેને નીચે પટકાયો હતો.
ટ્રેનની ચપેટમાં આવતાં મુસાફરનું ગળું કપાઈ જવાથી ધાત સ્થળે જ કરૂણ મોત
ટ્રેનમાંથી નીચે પટકાયા બાદ કમનસીબે મુસાફર ચાલુ ટ્રેનની ચપેટમાં આવી ગયો હતો. ટ્રેનના પૈડા નીચે આવી જતાં તેનું ગળું કપાઈ ગયું હતું અને ઘટનાસ્થળે જ તેનું કમકમાટીભર્યું નીપજ્યું હતું. એક ક્ષણિક મોબાઈલ સ્નેચિંગની લાલચમાં નિર્દોષ મુસાફરે પોતાનો જીવ ગુમાવવો પડ્યો હતો. આ ઘટનાને પગલે રેલવે પોલીસ બેડામાં ભારે અરેરાટી સાથે ચકચાર મચી ગઈ હતી અને પોલીસે આ કેસને અત્યંત ગંભીરતાથી લઈને મનુષ્યવધનો ગુનો નોંધી તપાસના ચક્ર ગતિમાન કર્યા હતા.
CCTV ફૂટેજ અને ખાનગી બાતમીના આધારે ગણતરીના દિવસોમાં ૨ આરોપીઓ ઝબ્બે
આ દિલધડક અને નિર્મમ ઘટનાનો ભેદ ઉકેલવા માટે પશ્ચિમ રેલવે વડોદરા યુનિટની LCB અને SOG સુરતની ટીમો દ્વારા અલગ-અલગ દિશામાં તપાસ શરૂ કરવામાં આવી હતી. રેલવે સ્ટેશનો તેમજ આસપાસના વિસ્તારોના CCTV ફૂટેજ બારીકાઈથી ચકાસવામાં આવ્યા હતા. આ સાથે જ હ્યુમન ઈન્ટેલિજન્સ અને ખાનગી બાતમીદારોનું નેટવર્ક સક્રિય કરવામાં આવ્યું હતું. મળેલી સચોટ ખાનગી બાતમીના આધારે પોલીસે ગણતરીના દિવસોમાં જ આ ઘાતક ઘટનામાં સામેલ ૨ શાતિર આરોપીઓની ધરપકડ કરી લીધી છે.
રેલવે પોલીસ દ્વારા વધુ તપાસ અને મુસાફરો માટે ચેતવણી
બે આરોપીઓની ધરપકડ બાદ રેલવે પોલીસ દ્વારા તેમની ઊંડાણપૂર્વક પૂછપરછ હાથ ધરવામાં આવી છે, જેમાં આ ગેંગ દ્વારા ભૂતકાળમાં આચરવામાં આવેલા અન્ય ગુનાઓ અને તેમના અન્ય સાગરીતો અંગેની ચોંકાવનારી વિગતો બહાર આવવાની શક્યતા છે. આ સાથે જ રેલવે પોલીસ તંત્ર દ્વારા તમામ રેલવે મુસાફરોને અપીલ કરવામાં આવી છે કે ચાલુ ટ્રેને દરવાજે બેસીને કે ઉભા રહીને મોબાઈલ ફોનનો ઉપયોગ કરવાનું ટાળવું, કારણ કે આવી બેદરકારી કે ગુનેગારોની આવી છટકબારી જીવલેણ સાબિત થઈ શકે છે.
