સુરત બન્યું ‘બોલીવુડ હબ’: ISPL મેચ માટે લાલભાઈ સ્ટેડિયમમાં સલમાન ખાનની ધમાકેદાર એન્ટ્રી
સુરત ડાયમંડ સિટી આજે બોલીવુડના “ભાઈજાન” સલમાન ખાનના આગમનથી ગુંજી ઉઠ્યું હતું. લાલભાઈ કોન્ટ્રાક્ટર ક્રિકેટ સ્ટેડિયમ ખાતે આયોજિત ISPL (ઇન્ડિયન સ્ટ્રીટ પ્રીમિયર લીગ) માં હાજરી આપવા માટે સલમાન ખાન ખાસ સુરત આવ્યા હતા.
સુરત એરપોર્ટ પર ભવ્ય સ્વાગત અને ચુસ્ત બંદોબસ્ત
સલમાન ખાનના સુરત એરપોર્ટ પર ઉતરાણ સાથે જ સુરક્ષા વ્યવસ્થા અત્યંત કડક કરી દેવામાં આવી હતી. વીડિયોમાં જોઈ શકાય છે કે એરપોર્ટની અંદર અને બહાર CISF અને ગુજરાત પોલીસના જવાનોનો મોટો કાફલો તૈનાત હતો. સલમાન ખાન એરપોર્ટ ટર્મિનલમાંથી બહાર આવ્યા ત્યારે તેઓ કાળા ચશ્મા અને બ્લેક જેકેટમાં જોવા મળ્યા હતા, અને તેમની સાથે તેમના અંગત બોડીગાર્ડ શેરા પણ હાજર હતા.
એરપોર્ટની બહાર પોલીસની ગાડીઓ અને સુરક્ષા વાહનોનો મોટો કાફલો સલમાન ખાનને એસ્કોર્ટ કરવા માટે તૈયાર હતો. સુરક્ષાના કારણોસર લાલભાઈ સ્ટેડિયમ સુધીના રૂટ પર પણ પોલીસ દ્વારા ખાસ તકેદારી રાખવામાં આવી હતી.
View this post on Instagram
લાલભાઈ સ્ટેડિયમમાં લોકોનું કીડિયારું ઉભરાયું
લાલભાઈ કોન્ટ્રાક્ટર સ્ટેડિયમમાં જ્યારે સલમાન ખાને એન્ટ્રી કરી ત્યારે સમગ્ર સ્ટેડિયમ ‘સલમાન-સલમાન’ ના નારાથી ગાજી ઉઠ્યું હતું. ISPL પ્રીમિયર લીગના આ આયોજનમાં બોલીવુડ સ્ટારની હાજરીએ ચાર ચાંદ લગાવી દીધા હતા. લોકો સલમાન ખાનની એક ઝલક મેળવવા માટે સ્ટેડિયમની આસપાસ અને એરપોર્ટ બહાર મોટી સંખ્યામાં ઉમટી પડ્યા હતા.
સલમાન ખાનનું અભિવાદન
પોતાના ચાહકોનો આટલો મોટો પ્રતિસાદ જોઈને સલમાન ખાન પણ ગદગદિત થયા હતા. તેમણે હાથ હલાવીને લોકોનું અભિવાદન ઝીલ્યું હતું. સ્ટેડિયમમાં મેચ દરમિયાન પણ સલમાન ખાનનો ઉત્સાહ જોવા જેવો હતો.
