વિરોધી પણ ઝૂકી ગયા! વૈભવ સૂર્યવંશીના તોફાને જીત્યા સંજીવ ગોયેન્કાના દિલ; ગાવસ્કરે આઈપીએલ હરાજીને લઈને ખેંચી ટાંટિયાખેંચ
કહેવાય છે કે જ્યારે પ્રતિભા અસાધારણ હોય, ત્યારે દુશ્મની અને હરીફાઈના સરહદો ઓગળી જાય છે. ક્રિકેટના મેદાન પર આવું અવારનવાર જોવા મળે છે જ્યારે વિરોધી ટીમના ખેલાડીઓ કે માલિકો પણ કોઈ યુવા ખેલાડીની રમત જોઈને તેના પ્રેમમાં પડી જાય. જયપુરના સવાઈ માનસિંહ સ્ટેડિયમમાં રાજસ્થાન રોયલ્સ (RR) અને લખનૌ સુપર જાયન્ટ્સ (LSG) વચ્ચે રમાયેલી મેચમાં કંઈક આવો જ અદ્ભુત નઝારો જોવા મળ્યો.
માત્ર 15 વર્ષના યુવા સનસનાટીભર્યા બેટ્સમેન વૈભવ સૂર્યવંશીએ લખનૌના બોલરોની એવી ધુલાઈ કરી કે લખનૌના માલિક સંજીવ ગોયેન્કા પોતાની હારનું દુઃખ ભૂલીને આ બાળકની પ્રશંસા કરવા મજબૂર થઈ ગયા. આ રસપ્રદ દ્રશ્ય જોઈને લાઈવ કોમેન્ટ્રી કરી રહેલા મહાન ક્રિકેટર સુનીલ ગાવસ્કર પણ પોતાને રોકી શક્યા નહીં અને તેમણે મજાકિયા અંદાજમાં આઈપીએલ (IPL) ની આગામી હરાજીને લઈને મોટી વાત કહી દીધી.
ધીમી શરૂઆત અને પછી રનનું પ્રચંડ તોફાન
લખનૌ સુપર જાયન્ટ્સે આપેલા 221 રનના વિશાળ લક્ષ્યનો પીછો કરવા ઉતરેલી રાજસ્થાન રોયલ્સની શરૂઆત વૈભવ સૂર્યવંશી માટે બહુ આસાન નહોતી. દબાણ સાફ દેખાતું હતું. વૈભવે તેના પહેલા 12 બોલમાં માંડ 11 રન બનાવ્યા હતા. બીજી તરફ તેનો ઓપનિંગ પાર્ટનર યશસ્વી જયસ્વાલ માત્ર 18 બોલમાં 37 રન ફટકારે ટીમને આગળ ધપાવી રહ્યો હતો. એવું લાગતું હતું કે વૈભવ આજે ક્રિઝ પર સંઘર્ષ કરી રહ્યો છે, પણ એ તો માત્ર તોફાન પહેલાની શાંતિ હતી.
એક ઓવર પછી વૈભવે ગિયર બદલ્યો અને પછી જે થયું તે ઈતિહાસ બની ગયું. તેણે લખનૌના ફાસ્ટ બોલર આકાશ સિંહની એક જ ઓવરમાં 26 રન ઝૂડી કાઢ્યા. તેના પછીના શિકાર બન્યા ભારતના સૌથી ઝડપી બોલર મયંક યાદવ, જેમની ઓવરમાં વૈભવે 29 રન લૂંટ્યા. માત્ર 23 બોલમાં વૈભવે પોતાની ધમાકેદાર હાફ સેન્ચુરી પૂરી કરી લીધી હતી. પરંતુ અસલી ક્લાસ તો એ પછી જોવા મળ્યો, જ્યારે તેણે બાકીના 43 રન માત્ર 15 બોલમાં બનાવી દીધા!
સદી ચૂકી જવાનું દર્દ, પણ આખું સ્ટેડિયમ ઊભું થઈ ગયું
વૈભવ સૂર્યવંશીની સદી એકદમ પાકી લાગતી હતી. તે 93 રને રમી રહ્યો હતો અને ફેન્સ તેની સદીની ઉજવણી કરવા તૈયાર હતા. પરંતુ મોહસીન ખાનના એક ધીમા બોલ (Slower Ball) પર તે થાપ ખાઈ ગયો અને માત્ર 7 રન માટે તેની યાદગાર સદી ચૂકી ગયો. સદી ન થવાના કારણે આ યુવા ખેલાડીના ચહેરા પર નિરાશા સાફ જોઈ શકાતી હતી. તે ભારે હૈયે પેવેલિયન તરફ પાછો વળી રહ્યો હતો.
પરંતુ જયપુરના દર્શકો અને રાજસ્થાનના ડગઆઉટે જે કર્યું તેણે ભાવુક માહોલ બનાવી દીધો. આખું સ્ટેડિયમ આ 15 વર્ષના બાળકની ઇનિંગના માનમાં ઊભું થઈ ગયું (Standing Ovation). એટલું જ નહીં, વિરોધી છાવણી એટલે કે લખનૌ સુપર જાયન્ટ્સના માલિક સંજીવ ગોયેન્કા અને ટીમના મુખ્ય કોચ જસ્ટિન લેંગર પણ પોતાની સીટ પરથી ઊભા થઈ ગયા અને વૈભવ માટે જોરદાર તાળીઓ પાડી. વૈભવ જ્યારે આઉટ થયો ત્યારે રાજસ્થાનને હજુ 43 રનની જરૂર હતી, પણ તેણે લખનૌની બોલિંગ લાઇન-અપના એવા લીરેલીરા ઉડાવ્યા હતા કે લખનૌ માટે પ્લેઓફની રેસમાંથી બહાર થવું અને સિઝનની 9મી હાર સ્વીકારવી લગભગ નક્કી થઈ ગઈ હતી.
રાજસ્થાન રોયલ્સે બાકીનો પીછો વધુ 31 બોલ બાકી રાખીને ખૂબ જ સરળતાથી પૂર્ણ કરી લીધો, જેમાં ધ્રુવ જુરેલે અણનમ 53 રન બનાવીને વિજયી ચોગ્ગો ફટકાર્યો અને ટીમને 7 વિકેટે શાનદાર જીત અપાવી.
મેચ પછીનો નઝારો: ગાવસ્કરની ટીખળ અને ગોયેન્કાની ગણતરી
મેચ પૂરી થયા પછી મેદાન પર એક એવો નઝારો જોવા મળ્યો જેણે સોશિયલ મીડિયા પર ધૂમ મચાવી દીધી. વૈભવ સૂર્યવંશી બાઉન્ડ્રી લાઇન પાસે ઉભો રહીને નાના બાળકો અને ચાહકોને ઓટોગ્રાફ આપી રહ્યો હતો. આ જ સમયે લખનૌના માલિક સંજીવ ગોયેન્કા તેની પાસે પહોંચ્યા અને તેની પીઠ થાબડીને લાંબી વાતચીત કરવા લાગ્યા.
આ લાઈવ દ્રશ્ય ટીવી સ્ક્રીન પર જોઈને કોમેન્ટ્રી બોક્સમાં બેઠેલા સુનીલ ગાવસ્કર ભારે ઉત્સાહમાં આવી ગયા. ગાવસ્કરે હસતા હસતા સંજીવ ગોયેન્કાની મનની વાત જાણી લીધી હોય તેમ લાઈવ ઓન-એર મજાક કરી. ગાવસ્કરે ગોયેન્કા વતી વૈભવને ચીડવતા કહ્યું:
“હું ટૂંક સમયમાં જ (આગામી મેગા ઓક્શનમાં) તમારા માટે મોટી બોલી લગાવીશ!”
ગાવસ્કરનો ઈશારો સાફ હતો કે વૈભવ જેવી અદભુત પ્રતિભાને કોઈપણ ફ્રેન્ચાઈઝી માલિક પોતાની ટીમમાં સામેલ કરવા માટે કરોડો રૂપિયા પાણીની જેમ વહાવવા તૈયાર થઈ જશે.
સોશિયલ મીડિયા પર ગોયેન્કાની હૃદયસ્પર્શી પોસ્ટ
મેદાન પર વાતચીત કર્યા પછી પણ સંજીવ ગોયેન્કાનો વૈભવ પ્રત્યેનો આદર ઓછો ન થયો. તેમણે મોડી રાત્રે સોશિયલ મીડિયા પ્લેટફોર્મ પર આ યુવા ખેલાડીની પ્રશંસામાં એક અત્યંત સુંદર અને પ્રેરણાદાયી પોસ્ટ લખી.
The world has seen your talent. The nation sees the future in you. That’s a lot of responsibility already on very young shoulders, very able ones at that. Preserve the innocence, keep honing your brilliance, and the world will be at your feet.
Prayers, aashirwad, and love for… pic.twitter.com/LZS7pEe93s
— Dr. Sanjiv Goenka (@DrSanjivGoenka) May 20, 2026
ગોયેન્કાએ ટ્વીટમાં લખ્યું:
“દુનિયાએ આજે તમારી અદભુત પ્રતિભા જોઈ છે. આખો દેશ તમારામાં ભારતીય ક્રિકેટનું ભવિષ્ય જોઈ રહ્યો છે. આટલી નાની ઉંમરે તમારા ખૂબ જ સક્ષમ ખભા પર પહેલેથી જ ઘણી મોટી જવાબદારીઓ આવી ગઈ છે. બસ મારી એક જ સલાહ છે, તમારી અંદરની આ માસૂમિયતને હંમેશા જાળવી રાખજો, તમારી કળાને ધાર કાઢતા રહેજો અને એક દિવસ આખી દુનિયા તમારા કદમોમાં હશે. વૈભવ, તમને મારા તરફથી ઘણી બધી પ્રાર્થનાઓ, આશીર્વાદ અને ઘણો પ્રેમ.”
એક વિરોધી ટીમના માલિક તરફથી આવા શબ્દો મળવા તે કોઈપણ ખેલાડી માટે કોઈ મોટા એવોર્ડથી ઓછા નથી.
શું રાજસ્થાન રોયલ્સ પોતાના ‘કોહલી’ ને જવા દેશે?
સુનીલ ગાવસ્કરની હરાજી વાળી ટિપ્પણી ભલે રમૂજી અને મનોરંજક હોય, પરંતુ ક્રિકેટના સમીક્ષકો જાણે છે કે વાસ્તવિકતા કંઈક અલગ છે. આઈપીએલના નિયમો મુજબ, કોઈ ખેલાડી પોતાની ફ્રેન્ચાઈઝી સાથે કેટલો સમય રહી શકે તેની કોઈ મહત્તમ મર્યાદા નથી. રાજસ્થાન રોયલ્સે લાંબા ગાળાના રોકાણ તરીકે વૈભવ સૂર્યવંશીના રૂપમાં એક સાચો હીરો શોધી કાઢ્યો છે.
જેમ રોયલ ચેલેન્જર્સ બેંગ્લોરે વિરાટ કોહલીને ક્યારેય હરાજીમાં જવા દીધો નથી, તેવી જ રીતે રાજસ્થાન રોયલ્સ પણ વૈભવને ક્યારેય મુક્ત (Release) કરે તેવી શક્યતા નહિવત છે, જ્યાં સુધી ખેલાડી પોતે ટીમ છોડવાનો નિર્ણય ન કરે. તેથી ગોયેન્કા ભલે ગમે તેટલી ઈચ્છા રાખે, આ હીરો હાલ પૂરતો તો રાજસ્થાનના તાજમાં જ ચમકતો રહેશે.
