સુરતમાં કાપોદ્રા પોલીસ સ્ટેશન દ્વારા યોજાઈ ભવ્ય તિરંગા યાત્રા: શાળાઓના ભૂલકાંઓ અને પોલીસ જવાનોના સંગમથી સમગ્ર વિસ્તાર દેશભક્તિના રંગે રંગાયો
સુરત શહેરના કાપોદ્રા વિસ્તારમાં આજે દેશભક્તિ અને રાષ્ટ્રપ્રેમનો એક અદ્ભુત તેમજ પ્રેરણાદાયી માહોલ જોવા મળ્યો હતો. રાષ્ટ્રીય પર્વ અને ‘હર ઘર તિરંગા’ અભિયાન અંતર્ગત કાપોદ્રા પોલીસ સ્ટેશન દ્વારા એક ભવ્ય અને ઉત્સાહવર્ધક ‘તિરંગા યાત્રા’નું આયોજન કરવામાં આવ્યું હતું. વહીવટી તંત્ર અને જનતા વચ્ચેના સંબંધો વધુ મજબૂત બને તેમજ નાગરિકોમાં રાષ્ટ્રધ્વજ પ્રત્યે સન્માન અને ખમીરવંતો રાષ્ટ્રપ્રેમ જાગ્રત થાય તેવા શુભ આશયથી પોલીસ પ્રશાસન દ્વારા આ વિશેષ પદયાત્રાનું આયોજન હાથ ધરવામાં આવ્યું હતું. હાથમાં દેશની આન, બાન અને શાન સમો ત્રિરંગો લઈને નીકળેલા યુવાનો અને સ્થાનિકોના લીધે સમગ્ર વિસ્તાર રાષ્ટ્રભક્તિના અનોખા ઉત્સવમાં ફેરવાઈ ગયો હતો.
આ ભવ્ય તિરંગા યાત્રાનું મુખ્ય આકર્ષણ સ્થાનિક શાળાઓના ના નાના-મોટા ભૂલકાંઓ અને વિદ્યાર્થીઓની ઉત્સાહભરી ભાગીદારી રહી હતી. કાપોદ્રા વિસ્તારમાં આવેલી જાણીતી શિક્ષણ સંસ્થાઓ એવી ‘સિદ્ધ કુટીર’ અને ‘સાધના સ્કૂલ’ના સેંકડો વિદ્યાર્થીઓ ખૂબ જ હરખ અને ઉત્સાહ સાથે આ યાત્રામાં જોડાયા હતા. હાથમાં દેશનો રાષ્ટ્રધ્વજ લહેરાવતા અને મોં પર દેશભક્તિના નારા સાથે શિસ્તબદ્ધ રીતે ચાલી રહેલા આ ભૂલકાંઓને જોઈને માર્ગ પરથી પસાર થતા દરેક નાગરિકનું હૃદય ગર્વથી ભરાઈ આવ્યું હતું. શાળાઓના શિક્ષકો પણ વિદ્યાર્થીઓની સાથે રહીને તેમનો ઉત્સાહ બેવડાવી રહ્યા હતા.
માત્ર વિદ્યાર્થીઓ જ નહીં, પરંતુ સુરત પોલીસના જવાનો અને ઉચ્ચ અધિકારીઓએ પણ વર્દીના રોબની સાથે રાષ્ટ્રપ્રેમની ભાવના દર્શાવીને આ યાત્રામાં સક્રિયપણે ભાગ લીધો હતો. કાપોદ્રા પોલીસ સ્ટેશનના પી.આઈ., પી.એસ.આઈ. સહિતના તમામ નાના-મોટા પોલીસ કર્મચારીઓ પોતાની ખાખી વર્દીમાં સજ્જ થઈને શાળાના બાળકો સાથે હાથમાં તિરંગા પકડીને કદમથી કદમ મિલાવીને ચાલ્યા હતા. સામાન્ય રીતે જે પોલીસ જવાનોને કાયદો અને વ્યવસ્થા જાળવવાની કડક ડ્યુટીમાં જોવામાં આવે છે, તેમને આજે માસૂમ બાળકો સાથે એક સામાન્ય નાગરિકની જેમ રાષ્ટ્રધ્વજ લહેરાવતા જોઈને વિસ્તારના લોકોમાં સુરક્ષા અને સન્માનની અનોખી અનુભૂતિ થઈ હતી.
કાપોદ્રા પોલીસ સ્ટેશન ખાતેથી પ્રસ્થાન પામેલી આ ભવ્ય તિરંગા યાત્રા સમગ્ર કાપોદ્રા વિસ્તારના મુખ્ય માર્ગો, સોસાયટીઓ અને ચાર રસ્તાઓ પરથી પસાર થઈ હતી. આખી યાત્રા દરમિયાન સાઉન્ડ સિસ્ટમ પર ગૂંજતા દેશભક્તિના સુમધુર ગીતો, “હર ઘર તિરંગા”, “ભારત માતા કી જય” અને “વંદે માતરમ્”ના ગગનભેદી નારાઓએ વાતાવરણમાં એક અલગ જ જોશ પૂરી દીધો હતો. રસ્તાની બંને બાજુએ આવેલા વેપારીઓ, ઘરની બાલ્કનીઓમાં ઉભેલા રહીશો અને રાહદારીઓએ તિરંગા યાત્રાનું ઉષ્માભર્યું સ્વાગત કર્યું હતું અને પુષ્પવર્ષા કરીને બાળકો તથા પોલીસ જવાનોનો ઉત્સાહ વધાર્યો હતો.
