પુર, ભૂકંપ અને શહેરી આપત્તિઓમાં બચાવ માટે આધુનિક સાધનોનું પ્રદર્શન
સુરતના અઠવાલાઈન્સ સ્થિત પોલીસ પરેડ ગ્રાઉન્ડ ખાતે એન.ડી.આર.એફ. (NDRF), એસ.ડી.આર.એફ. (SDRF) અને સુરત મહાનગરપાલિકાના ફાયર વિભાગ દ્વારા સંયુક્ત રીતે એક વિશેષ પ્રદર્શનનું આયોજન કરવામાં આવ્યું હતું. આ કાર્યક્રમમાં પૂર, ભૂકંપ કે અન્ય કોઈ પણ કુદરતી આપત્તિ સમયે લોકોના જીવ બચાવવા માટે વપરાતા આધુનિક સાધનો અને ટેકનોલોજીનું પ્રદર્શન કરવામાં આવ્યું હતું. સંદેશાવ્યવહારના સાધનોથી માંડીને જીવરક્ષક સાધનો વિશે નાગરિકો અને વહીવટી અધિકારીઓને વિસ્તૃત માહિતી આપવામાં આવી હતી.
ધરાશાયી થયેલી ઈમારતોમાંથી જીવ બચાવવાનું જીવંત નિદર્શન
ઓલપાડ સ્થિત એન.ડી.આર.એફ.ની ૬ઠ્ઠી બટાલિયનના જવાનો દ્વારા આ પ્રસંગે ‘કોલેપ્સ્ડ સ્ટ્રક્ચર સર્ચ એન્ડ રેસ્ક્યુ’ (CSSR) નું લાઈવ ડેમોસ્ટ્રેશન રજૂ કરવામાં આવ્યું હતું. આ નિદર્શનમાં જ્યારે કોઈ મોટી ઈમારત ધરાશાયી થાય, ત્યારે કાટમાળ નીચે ફસાયેલા લોકોને કઈ રીતે શોધી કાઢવા અને સુરક્ષિત રીતે બહાર લાવવા તેની ઝીણવટભરી તકનીકો બતાવવામાં આવી હતી. ૬૦ જેટલા તાલીમબદ્ધ જવાનોએ પોતાની કુશળતા બતાવીને સૌને મંત્રમુગ્ધ કરી દીધા હતા.
ઉચ્ચ અધિકારીઓની ઉપસ્થિતિમાં આપત્તિ વ્યવસ્થાપન કૌશલ્યોની ચકાસણી
આ મહત્વપૂર્ણ કાર્યક્રમમાં રાષ્ટ્રીય આપત્તિ વ્યવસ્થાપન સત્તામંડળ (NDMA) ના વરિષ્ઠ મેજર જનરલ એ.કે. વર્મા અને કાકરાપાર પરમાણુ મથકના સાઈટ ડિરેક્ટર ખાસ ઉપસ્થિત રહ્યા હતા. એન.ડી.આર.એફ.ના અધિકારી વિકાસ સિંહ અને તેમની ટીમના નેતૃત્વમાં યોજાયેલા આ કાર્યક્રમમાં પોલીસ, ફાયર અને વહીવટી તંત્રના અનેક કર્મચારીઓએ ભાગ લીધો હતો. આ પ્રદર્શન દ્વારા સાબિત થયું કે કોઈપણ મોટી હોનારત સમયે સુરતનું આપત્તિ વ્યવસ્થાપન તંત્ર સંપૂર્ણ રીતે સજ્જ અને સતર્ક છે.
