નર્સિંગ ક્ષેત્રે સેવાભાવનો સંદેશ, સુરતમાં ગ્રેજ્યુએશન સેરેમની સાથે વિદ્યાર્થીઓને નવી દિશા
સુરતની નવી સિવિલ હોસ્પિટલ કેમ્પસમાં આવેલી સરકારી નર્સિંગ કોલેજ ખાતે B.Sc નર્સિંગની ૧૨મી બેચના વિદ્યાર્થીઓનો ગ્રેજ્યુએશન સેરેમની અને પ્રથમ વર્ષના વિદ્યાર્થીઓનો શપથ ગ્રહણ સમારોહ ભવ્ય રીતે યોજાયો હતો. આ પ્રસંગે વીર નર્મદ દક્ષિણ ગુજરાત યુનિવર્સિટીના કુલપતિ ડો. કે.એન. ચાવડાએ ખાસ ઉપસ્થિત રહીને પદવી મેળવનાર વિદ્યાર્થીઓને ઉજ્જવળ ભવિષ્યની શુભેચ્છાઓ પાઠવી હતી. તેમણે નર્સિંગ વ્યવસાયની મહત્તા સમજાવતા કહ્યું કે, હોસ્પિટલમાં દર્દી સાથે સૌથી વધુ સમય નર્સિંગ સ્ટાફ જ વિતાવે છે અને કોઈપણ આપત્તિના સમયે તેઓ સેવામાં હંમેશા અગ્રેસર રહે છે.
નર્સિંગ ક્ષેત્રને ‘નોબલ ગ્લોબલ વ્યવસાય’ ગણાવતા મહાનુભાવો
કાર્યક્રમમાં નર્સિંગ કાઉન્સિલના ઉપપ્રમુખ ઇકબાલ કડીવાલાએ જણાવ્યું હતું કે, નર્સિંગ એ માત્ર નોકરી નથી પરંતુ એક પવિત્ર અને વૈશ્વિક વ્યવસાય છે. આજે ગુજરાતના નર્સિંગ સેક્ટરનું દુનિયાભરમાં મોટું પ્રભુત્વ છે અને અહીંના વિદ્યાર્થીઓ AIIMS જેવી પ્રતિષ્ઠિત સંસ્થાઓ તેમજ વિદેશોમાં પણ પોતાની સેવાનો ડંકો વગાડી રહ્યા છે. આ કોલેજમાં જમ્મુ-કાશ્મીરથી લઈને અંબાજી અને ઉમરગામ સુધીના વિવિધ વિસ્તારોના વિદ્યાર્થીઓ અભ્યાસ કરી રહ્યા છે, જે આ સંસ્થાની શૈક્ષણિક ગુણવત્તા અને લોકપ્રિયતા દર્શાવે છે.
વિદ્યાર્થીઓના ઘડતરમાં શૈક્ષણિક સંસ્થા અને વાલીઓની ભૂમિકા
કોલેજના પ્રિન્સિપાલ ડો. ઇન્દ્રાવતી રાવે વિદ્યાર્થીઓના વ્યક્તિગત વિકાસ પર ભાર મૂકતા કહ્યું કે, ચાર વર્ષના અભ્યાસ દરમિયાન કોલેજ પરિવાર જ વિદ્યાર્થીઓના વાલી તરીકેની ભૂમિકા ભજવે છે. વિદ્યાર્થીઓને શ્રેષ્ઠ શિક્ષણની સાથે પારિવારિક હુંફ અને શિસ્તબદ્ધ માર્ગદર્શન આપવું એ સંસ્થાની પ્રાથમિકતા છે. આ અવસરે હાજર રહેલા વાલીઓએ પણ રાજ્ય સરકારનો આભાર માન્યો હતો. સરકારી સંસ્થાઓમાં મળતું ઉચ્ચ કક્ષાનું નિ:શુલ્ક શિક્ષણ જ સામાન્ય પરિવારના સંતાનોને વૈશ્વિક સ્તરે કારકિર્દી બનાવવામાં મદદરૂપ થઈ રહ્યું છે.
સેવા અને સમર્પણના સંકલ્પ સાથે નર્સિંગ વિદ્યાર્થીઓ સમાજ સેવામાં જોડાશે
આ સમારોહમાં યુનિવર્સિટીના એક્ઝિક્યુટિવ મેમ્બર ડો. પારુલ વડગામા, દીપકમલ વ્યાસ અને નર્સિંગ સુપ્રિટેન્ડન્ટ નીરજાબેન પટેલ સહિતના મહાનુભાવોએ હાજરી આપી હતી. પ્રથમ વર્ષના નૂતન વિદ્યાર્થીઓએ નર્સિંગના શપથ લઈને માનવતાની સેવા કરવાનો સંકલ્પ કર્યો હતો. આ સ્નાતકો હવે રાજ્ય સરકારની હોસ્પિટલો તેમજ ખાનગી સેક્ટરમાં પોતાની સેવાઓ આપવા માટે સજ્જ થયા છે. કાર્યક્રમના અંતે તમામ સફળ વિદ્યાર્થીઓને પ્રમાણપત્ર એનાયત કરવામાં આવ્યા હતા અને તેમના અત્યાર સુધીના શૈક્ષણિક પ્રદાનને બિરદાવવામાં આવ્યું હતું.
