સુરત પોલીસની મોટી કામગીરી: મહિલાનો અશ્લીલ વીડિયો બનાવી બ્લેકમેલ કરનાર 2700 કિમી દૂરથી ઝડપાયો
સુરત: સોશિયલ મીડિયા પર અજાણ્યા વ્યક્તિ સાથે મિત્રતા કરવી એક પરિણીત મહિલાને ભારે પડી ગઈ. ઇન્સ્ટાગ્રામ દ્વારા સંપર્કમાં આવેલા એક શખ્સે મહિલાનો બીભત્સ વીડિયો બનાવી તેને બ્લેકમેઇલ કરવાનું શરૂ કર્યું હતું. આ મામલે સુરતની અમરોલી પોલીસે ૨૭૦૦ કિલોમીટર દૂર છત્તીસગઢ જઈને આરોપીને ઝડપી પાડતા મોટી સફળતા મળી છે.
ઇન્સ્ટાગ્રામની મિત્રતા બની આફત
પ્રાપ્ત માહિતી અનુસાર, પીડિત મહિલા ઇન્સ્ટાગ્રામના માધ્યમથી અન્ટુ ઉર્ફે અર્જુન રામનાથ ઉપાધ્યાય નામના શખ્સના સંપર્કમાં આવી હતી. બંને વચ્ચે મિત્રતા થયા બાદ આરોપીએ કોઈક રીતે મહિલાનો બીભત્સ વીડિયો બનાવી લીધો હતો. ત્યારબાદ આ વીડિયોના આધારે તે સતત મહિલાને બ્લેકમેઇલ કરી રહ્યો હતો. આરોપીની ધમકીઓથી કંટાળીને મહિલા માનસિક રીતે ભાંગી પડી હતી.
બદનામીના ડરથી મહિલાનું આત્મઘાતી પગલું
આરોપીએ હદ તો ત્યારે કરી જ્યારે તેણે પીડિત મહિલાના સગા-સંબંધીઓમાં વીડિયો વાયરલ કરી દીધો. સમાજમાં પોતાની બદનામી થતા મહિલા ભારે આઘાતમાં સરી પડી હતી અને અંતિમ પગલું ભરીને આપઘાત કરવા માટે પહોંચી ગઈ હતી. જોકે, પોલીસે સમયસૂચકતા વાપરીને મહિલાને બચાવી લીધી હતી અને તેનું યોગ્ય કાઉન્સિલિંગ કર્યું હતું.
વેશપલટો કરી પોલીસે આરોપીને દબોચ્યો
પીડિત મહિલાની ફરિયાદના આધારે અમરોલી પોલીસે તપાસનો ધમધમાટ શરૂ કર્યો હતો. ટેકનિકલ સર્વેલન્સના આધારે આરોપીનું લોકેશન છત્તીસગઢના તેરાબંદી વિસ્તારમાં હોવાનું સામે આવ્યું હતું. મૂળ બિહારના વતની એવા આ આરોપીને પકડવા માટે સુરત પોલીસની ટીમ ૨૭૦૦ કિલોમીટર દૂર છત્તીસગઢ પહોંચી હતી. સ્થાનિક પોલીસને પણ છેતરીને છુપાયેલા આ આરોપીને પકડવા માટે સુરત પોલીસે સ્થાનિકોનો વેશપલટો કર્યો હતો અને છટકું ગોઠવીને તેને ઝડપી પાડ્યો હતો.
પોલીસની વધુ તપાસ જારી
હાલ અમરોલી પોલીસે આરોપી અન્ટુ ઉર્ફે અર્જુન રામનાથ ઉપાધ્યાયની ધરપકડ કરીને તેને સુરત લાવવાની તજવીજ હાથ ધરી છે. આ મામલે પોલીસ વધુ તપાસ કરી રહી છે કે આરોપીએ આ રીતે અન્ય કેટલી મહિલાઓને શિકાર બનાવી છે. આ ઘટનાએ સોશિયલ મીડિયા પર અજાણ્યા લોકો સાથે મિત્રતા કરતા પહેલા સાવચેત રહેવા માટે એક મોટો સંદેશ આપ્યો છે.
