તાપીના ઉચ્છલથી મુખ્યમંત્રી ભૂપેન્દ્ર પટેલ દ્વારા રૂ. ૯૬૨ કરોડની ઉદ્વહન સિંચાઈ યોજનાનું ઇ-લોકાર્પણ

ઉકાઈ જળાશય આધારિત વિશાળ સિંચાઈ પ્રકલ્પથી ૨૮ હજાર હેક્ટર જમીન થશે સિંચાઈક્ષમ

મુખ્યમંત્રી ભૂપેન્દ્ર પટેલે તાપી જિલ્લાના વિકાસ માટે અંદાજિત રૂ. ૧૬૦૦ કરોડના ખર્ચે તૈયાર થયેલી ઉકાઈ જળાશય આધારિત વિવિધ સિંચાઈ યોજનાઓનું ગાંધીનગરથી વર્ચ્યુઅલ માધ્યમ દ્વારા લોકાર્પણ અને ખાતમુહૂર્ત કર્યું હતું. આ પ્રસંગે તેમણે જણાવ્યું હતું કે, વડાપ્રધાન નરેન્દ્ર મોદીના ‘સેચ્યુરેશન એપ્રોચ’ અને વનબંધુ કલ્યાણ યોજનાના માર્ગદર્શન હેઠળ રાજ્ય સરકાર આદિજાતિ વિસ્તારોમાં શિક્ષણ, આરોગ્ય અને કનેક્ટિવિટી જેવી માળખાગત સુવિધાઓ પહોંચાડવા કટિબદ્ધ છે. આ યોજનાઓથી આદિવાસી સમુદાયના જીવનસ્તરમાં મોટો બદલાવ આવશે.

૨૮ હજાર હેક્ટર જમીનને નવપલ્લવિત કરતી ઉદ્વહન સિંચાઈ યોજના

તાપી જિલ્લાના સોનગઢ, ઉચ્છલ, નિઝર અને કુકરમુંડા તાલુકાના ૧૩૬ ગામો માટે રૂ. ૯૬૨.૧૨ કરોડની ઉકાઈ જળાશય આધારિત ઉદ્વહન સિંચાઈ યોજનાનું લોકાર્પણ કરવામાં આવ્યું હતું. ઇજનેરી કૌશલ્યના ઉત્તમ નમૂના સમાન આ યોજના દ્વારા ઉકાઈ ડેમનું પાણી ડુંગરાળ વિસ્તારો સુધી પહોંચાડવામાં આવશે, જેનાથી અંદાજે ૨૮ હજાર હેક્ટર જમીનને બારેમાસ સિંચાઈનો લાભ મળશે. આ સુવિધાને કારણે હજારો ખેડૂતો હવે વર્ષમાં એકથી વધુ પાક લઈ શકશે અને તેમની ખેતી વધુ સમૃદ્ધ બનશે.

બોરીસાવર યોજના થકી સોનગઢ અને વ્યારાના ગામોમાં હરિયાળી ક્રાંતિ આવશે

સિંચાઈ સુવિધાના બીજા તબક્કા તરીકે રૂ. ૬૫૧.૩૭ કરોડના ખર્ચે સાકાર થઈ રહેલી બોરીસાવર ઉદ્વહન સિંચાઈ યોજનાનું પણ ખાતમુહૂર્ત કરવામાં આવ્યું હતું. આ યોજના પૂર્ણ થવાથી સોનગઢ અને વ્યારા તાલુકાના ૨૯ ગામોની ૮ હજાર હેક્ટરથી વધુ જમીન સિંચાઈથી લાભાન્વિત થશે. આદિજાતિ વિકાસ મંત્રી નરેશભાઈ પટેલે ખેડૂતોને પાણીના કાર્યક્ષમ ઉપયોગ માટે ટપક સિંચાઈ (ડ્રિપ ઇરિગેશન) પદ્ધતિ અપનાવવા અને તેના પર મળતી સરકારી સબસિડીનો મહત્તમ લાભ લેવા ખાસ અનુરોધ કર્યો હતો.

મુખ્યમંત્રીશ્રી દ્વારા તાપીના પર્યાવરણ પ્રેમી વિજેશભાઈ ગામીતની કામગીરીની પ્રશંસા

તાપી જિલ્લા પંચાયત ખાતે વિશ્વ ક્ષય દિવસની ભવ્ય ઉજવણી

તાપી મૈયાના નીરના વધામણા અને મહાનુભાવોની ગરિમામય ઉપસ્થિતિ

ઉચ્છલ તાલુકાના બાબરઘાટ ખાતે આયોજિત આ કાર્યક્રમમાં રાજ્યમંત્રી ઈશ્વરસિંહ પટેલ અને ડો. જયરામભાઈ ગામીત સહિતના મહાનુભાવોએ હાજર રહીને તાપી મૈયાના નીરના ભાવપૂર્વક વધામણા કર્યા હતા. કાર્યક્રમ દરમિયાન ખેડૂતોની સુખાકારી દર્શાવતી એક શોર્ટ ફિલ્મ પણ રજૂ કરવામાં આવી હતી. આ પ્રસંગે જિલ્લા કલેક્ટર, ધારાસભ્યો અને મોટી સંખ્યામાં ખેડૂતો ઉપસ્થિત રહ્યા હતા. પાણીને વિકાસનો મુખ્ય આધાર ગણાવીને તંત્ર દ્વારા છેવાડાના માનવી સુધી સુખાકારી પહોંચાડવાની નેમ વ્યક્ત કરવામાં આવી હતી.