મહેસાણાની ઘટનામાં રસ્તા અકસ્માતની આડમાં છુપાયેલું હત્યાનું કાવતરું બહાર આવ્યું
મહેસાણાના ઊંઝામાં બનેલી એક ઘટના સામાન્ય માર્ગ અકસ્માત જેવી લાગી હતી, પરંતુ પાછળ છુપાયેલું કાવતરું બહાર આવતા સમગ્ર વિસ્તાર ચોંકી ગયો. રાત્રિના સમયે ઓવરબ્રિજ પર એક મહિલાને કાર અથડાઈ અને તે બ્રિજ પરથી 50 ફૂટ નીચે પટકાઈ જતા ઘટનાસ્થળે જ મૃત્યુ પામેલી. શરૂઆતમાં બધાને લાગ્યું કે આ એક સામાન્ય અકસ્માત છે, પરંતુ તપાસ આગળ વધતાં આ બનાવ હત્યા તરફ વળી ગયો.
પોલીસને પ્રથમ નજરે અકસ્માતનો ભાસ
ઘટનાની જાણ મળતા જ પોલીસ સ્થળ પર પહોંચી અને એ જાણ્યું કે મોત પામેલી મહિલા 39 વર્ષીય લવિના ડિસોઝા હતી, જે મૂળ મુંબઈની અને નોકરી માટે ગુજરાતમાં રહેતી હતી. તેના પરિવારમાં પતિ અને એક દીકરો છે. અકસ્માત સમજી પોલીસે રૂટીન તપાસ શરૂ કરી, પરંતુ પરિવારને જાણ કરાયા બાદ પતિને શંકા ઉદ્ભવી અને આ કેસનો રૂખ સંપૂર્ણ બદલાઈ ગયો.
પતિને પ્રેમી પર શંકા અને ફરિયાદ
મૃતકના દીકરાએ રડતા રડતા પિતાને કહ્યું કે ‘મમ્મીને કોઈ ગાડીવાળાએ ટક્કર મારી છે’. આ સાંભળતાં જ પતિ રવિન્દ્ર શર્માને તરત જ શંકા થઈ અને તેમણે લવિનાના કથિત પ્રેમી પવન રાજગોરને ફોન કર્યો, પરંતુ તેણે વાત ટાળીને ફોન કાપી નાખ્યો. આ વર્તનથી રવિન્દ્રને પુરાવો મળ્યો કે અકસ્માત નહીં પરંતુ સંગઠિત હત્યા થઈ છે. તેમણે તરત જ ઊંઝા પોલીસને ફરિયાદ કરી અને પછી તપાસનું વલણ બદલાઈ ગયું.
ફોન પર ગાળાગાળી બાદ બે મિનિટમાં હંમલાની યોજના
પોલીસ તપાસમાં ખુલ્યું કે ઘટનાના થોડા સમય પહેલા લવિના તેના મિત્ર કુમારપાલ સુથાર સાથે ઓવરબ્રિજ પર સ્કૂટર પાર્ક કરી બેઠી હતી. આ દરમિયાન લવિના અને પવન રાજગોર વચ્ચે ચેન અને પૈસાની લેવડ-દેવડને લઈને ઊગ્ર ઝઘડો થયો હતો. ગુસ્સામાં ભરાયેલો પવન પોતાની કારમાં માત્ર બે મિનિટમાં ત્યાં પહોંચ્યો અને પૂરઝડપે કાર હંકારતાં લવિનાને ટક્કર મારી હતી.
અકસ્માત બતાવી ભાગવાનો નિષ્ફળ પ્રયાસ
ટક્કર એટલી જોરદાર હતી કે લવિના સીધી બ્રિજ પરથી નીચે પટકાઈ હતી. પવનને લાગ્યું કે આ અકસ્માત ગણાશે અને તે ત્યાંથી ભાગી જશે, પરંતુ લોકો ભેગા થતાં તે પોતાની કાર મુકીને જ ભાગ્યો. શરૂઆતમાં કેસને અકસ્માત ગણી લેવાયો હતો, પરંતુ કોલ ડિટેલ્સ અને સંબંધોની તપાસ બાદ સાબિત થયું કે આ ‘પ્રિ-પ્લાન્ડ મર્ડર’ જ હતું.
પ્રેમ, ઝઘડો અને લાલચનું અંતિમ પરિણામ
તપાસ પૂર્ણ થતાં મુખ્ય આરોપી પવન રાજગોરની પોલીસે ધરપકડ કરી છે અને તેને જેલભેગો કરવામાં આવ્યો છે. પ્રેમ, પૈસાની લાલચ અને અહંકારના કારણે પેદા થયેલી આ ઘટના ફિલ્મી કહાનીને પણ પાછળ મૂકે તેવી છે. શરૂઆતથી અકસ્માતનો ભાસ આપતા આ કેસનું આખરી પરિણામ હત્યા તરીકે સામે આવ્યું છે અને સમગ્ર વિસ્તાર આ ઘટનાથી સ્તબ્ધ થઈ ગયો છે.
