ઈરાની બંદરો પર અમેરિકી નૌકાદળનું આક્રમક નિયંત્રણ: ૭૫ જહાજોને પાછા તારડ્યા, ૩ અક્ષમ કરાયા; હોર્મુઝ સામુદ્રધુનીમાંથી ઈરાને બિછાવેલી માઈન્સ દૂર
મધ્ય પૂર્વ ક્ષેત્રમાં ઈરાન અને અમેરિકા વચ્ચે વધી રહેલા ભારે તણાવ વચ્ચે યુનાઈટેડ સ્ટેટ્સ સેન્ટ્રલ કમાન્ડ (US CENTCOM) એ ગલ્ફ વિસ્તારમાં તેની સૈન્ય પ્રવૃત્તિઓ અને વર્ચસ્વ અંગે એક મોટો અને આક્રમક દાવો કર્યો છે. યુએસ સેન્ટ્રલ કમાન્ડના કમાન્ડર એડમિરલ બ્રેડ કૂપરે સત્તાવાર નિવેદન આપતાં જણાવ્યું છે કે ઈરાન સામે અમેરિકી નૌકાદળ દ્વારા નાકાબંધી લાગુ કરાયા બાદથી અત્યાર સુધી એક પણ વાણિજ્યિક કે અન્ય જહાજ યુએસ સૈન્યની પૂર્વ પરવાનગી વિના ઈરાનના કોઈ પણ બંદરમાં પ્રવેશ્યું નથી કે ઈરાની બંદર છોડીને બહાર નીકળ્યું નથી.
નાકાબંધી તોડવાનો પ્રયાસ કરનાર ૭૫ જહાજો પર કડક કાર્યવાહી
એડમિરલ કૂપરના જણાવ્યા મુજબ, અમેરિકી દળો ઈરાન પર લાદવામાં આવેલી નૌકાદળ નાકાબંધીને અત્યંત સખત રીતે અમલમાં મૂકી રહ્યા છે. આ કામગીરી દરમિયાન નાકાબંધીના નિયમોનું ઉલ્લંઘન કરીને પરવાનગી વગર ઈરાની દરિયાઈ સીમામાં પ્રવેશવાનો કે બહાર નીકળવાનો પ્રયાસ કરી રહેલા ૭૫ જેટલા વાણિજ્યિક જહાજોને અમેરિકી યુદ્ધ જહાજો દ્વારા અટકાવીને પાછા ફેરવી દેવામાં આવ્યા છે.
આ ઉપરાંત, અમેરિકી સૈન્યની ચેતવણીઓ અને સૂચનાઓનું અનાદર કરનારા ૩ શંકાસ્પદ જહાજો સામે આકરાં પગલાં ભરીને તેમને દરિયામાં જ સંપૂર્ણપણે અક્ષમ (Disabled) કરી દેવામાં આવ્યા હતા. યુએસ સેન્ટકોમ કમાન્ડરે સ્પષ્ટ કર્યું છે કે આંતરરાષ્ટ્રીય દરિયાઈ નિયમો અને નાકાબંધીનું ઉલ્લંઘન કરનાર કોઈપણ પક્ષ સામે કડક કાર્યવાહી ચાલુ રહેશે.
Update from CENTCOM Commander: pic.twitter.com/osPbltjJ1C
— U.S. Central Command (@CENTCOM) August 28, 2026
હોર્મુઝ સામુદ્રધુનીમાંથી ઈરાની દરિયાઈ ખાણો દૂર કરાઈ
અમેરિકી સૈન્યએ આ કામગીરી દરમિયાન એક અત્યંત મહત્વપૂર્ણ સૈન્ય સિદ્ધિ હાંસલ કરવાનો પણ દાવો કર્યો છે. એડમિરલ કૂપરે જણાવ્યું હતું કે યુએસ નેવીના વિશેષ દળોએ હોર્મુઝની સામુદ્રધુની (Strait of Hormuz) માં આવેલા આંતરરાષ્ટ્રીય શિપિંગ લેન પરથી ઈરાન દ્વારા બિછાવવામાં આવેલી તમામ ખતરનાક દરિયાઈ ખાણો (Marine Mines) ને સફળતાપૂર્વક શોધીને દૂર કરી દીધી છે.
અહેવાલો અનુસાર, આ દરિયાઈ માઈન્સ અને સબમરીન ટનલ ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC) દ્વારા કેટલાક મહિનાઓ પહેલાં આંતરરાષ્ટ્રીય જહાજોને નુકસાન પહોંચાડવા અને દરિયાઈ માર્ગને બાધિત કરવાના ઈરાદાથી નાખવામાં આવી હતી. હવે આંતરરાષ્ટ્રીય સ્તરે માન્યતા પ્રાપ્ત આ મુખ્ય સમુદ્રી માર્ગ ઈરાની સબમરીન માઈન્સના જોખમથી સંપૂર્ણપણે મુક્ત થઈ ગયો છે.
૫૦,૦૦૦ યુએસ સૈનિકો અને ૨૦ થી વધુ યુદ્ધ જહાજો તૈનાત
આ સમગ્ર વિશાળ સૈન્ય ઓપરેશનને સફળ બનાવવા માટે અમેરિકાએ ગલ્ફ ક્ષેત્રમાં પોતાની અભૂતપૂર્વ લશ્કરી તાકાત ખડકી દીધી છે. સમગ્ર પ્રદેશમાં આશરે ૫૦,૦૦૦ જેટલા અમેરિકી સૈનિકો રાઉન્ડ ધ ક્લોક તૈનાત છે. આ ઉપરાંત, ૨૦ થી વધુ આધુનિક યુદ્ધ જહાજો, વિમાનવાહક જહાજો અને સેંકડો લડાયક વિમાનો દરિયાઈ અને હવાઈ સીમાઓ પર સતત નજર રાખી રહ્યા છે.
૭૫૦ મિલિયન બેરલ ક્રૂડ ઓઈલ ધરાવતા ૧,૫૦૦ જહાજોને સુરક્ષિત માર્ગ આપ્યો
એડમિરલ કૂપરે ઉમેર્યું હતું કે સૈન્ય કાર્યવાહી અને નાકાબંધીની સાથે સાથે અમેરિકી દળો વૈશ્વિક વેપાર અને ઊર્જા પુરવઠો ખોરવાય નહીં તે માટે પણ કટિબદ્ધ છે. છેલ્લા કેટલાક મહિનાઓમાં યુએસ નેવીએ આશરે ૧,૫૦૦ જેટલા વાણિજ્યિક જહાજોને હોર્મુઝ સ્ટ્રેટમાંથી સુરક્ષિત રીતે પસાર થવામાં મદદ કરી છે.
આ જહાજોમાં વૈશ્વિક ઊર્જા બજારો માટે અત્યંત મહત્વપૂર્ણ ગણાતું આશરે ૭૫૦ મિલિયન બેરલ કાચું તેલ (ક્રૂડ ઓઈલ) વહન કરવામાં આવી રહ્યું હતું. આંતરરાષ્ટ્રીય શિપિંગ લેન દ્વારા સમાન અને સુરક્ષિત ટ્રાફિક જાળવવા માટે એક અલગ સુરક્ષા ચેનલ બનાવવામાં આવી છે, જેથી વિશ્વભરમાં તેલ પુરવઠાની અછત સર્જાય નહીં.
