‘રશિયાને મોટો ફાયદો નહીં થાય’, અમેરિકાનું નવું નિવેદન: ભારતને રશિયન તેલ ખરીદવા માટે આપી કામચલાઉ છૂટ
મધ્ય પૂર્વ (મિડલ ઈસ્ટ) માં ચાલી રહેલા યુદ્ધ અને વૈશ્વિક અશાંતિ વચ્ચે અમેરિકાએ ભારતને લઈને એક મહત્વનો નિર્ણય લીધો છે. વ્હાઇટ હાઉસના પ્રેસ સેક્રેટરી કેરોલિન લેવિટે પુષ્ટિ કરી છે કે ભારતને આગામી 30 દિવસ સુધી રશિયા પાસેથી તેલ ખરીદવા માટે વિશેષ છૂટછાટ આપવામાં આવી છે. જોકે, અમેરિકાએ સ્પષ્ટ કર્યું છે કે આ નિર્ણયથી રશિયાને કોઈ મોટો આર્થિક ફાયદો થવાનો નથી.
ભારતને કેમ મળી આ વિશેષ છૂટ?
પ્રેસ સેક્રેટરી કેરોલિન લેવિટે મીડિયા સાથેની વાતચીતમાં જણાવ્યું હતું કે, ભારત હંમેશા આંતરરાષ્ટ્રીય સ્તરે એક ‘સારા અભિનેતા’ (Good Actor) તરીકેની ભૂમિકા ભજવતું આવ્યું છે. તેમણે કહ્યું કે, “ભારતે ભૂતકાળમાં અમેરિકાના પ્રતિબંધોનું સન્માન કર્યું છે. જ્યારે અગાઉ ભારતને રશિયન તેલ ન ખરીદવા વિનંતી કરવામાં આવી હતી, ત્યારે તેમણે તેનો સહજતાથી સ્વીકાર કર્યો હતો. આ સકારાત્મક વલણને ધ્યાનમાં રાખીને રાષ્ટ્રપતિ ટ્રમ્પ, ટ્રેઝરી સેક્રેટરી અને નેશનલ સિક્યોરિટી ટીમની સહમતી બાદ આ કામચલાઉ રાહત આપવામાં આવી છે.”
ઈરાન યુદ્ધ અને ગ્લોબલ સપ્લાયની સ્થિરતા
અમેરિકાના આ નિર્ણય પાછળનું મુખ્ય કારણ ઈરાન સાથેના સંઘર્ષને કારણે વૈશ્વિક તેલ બજારમાં સર્જાયેલી અસ્થિરતા છે. લેવિટે વધુમાં ઉમેર્યું કે, ઈરાનને કારણે વિશ્વભરમાં તેલના પુરવઠામાં જે અછત ઉભી થઈ છે, તેને સરભર કરવા માટે આ પગલું લેવાયું છે. તેમનો મુખ્ય ઉદ્દેશ્ય ગ્લોબલ ઓઈલ સપ્લાયને સ્થિર રાખવાનો છે. જે રશિયન તેલ ભારત ખરીદી રહ્યું છે તે પહેલાથી જ સમુદ્રમાં (In transit) હતું, તેથી તેનાથી રશિયન સરકારને કોઈ નવી આર્થિક મદદ મળવાની શક્યતા નહિવત છે.
અમેરિકી નાણા મંત્રીનું વલણ
આ અગાઉ અમેરિકી નાણા મંત્રી (ટ્રેઝરી સેક્રેટરી) સ્કોટ બેસેન્ટે પણ આ અંગે સકારાત્મક સંકેતો આપ્યા હતા. તેમણે જણાવ્યું હતું કે ભારતીયો ખૂબ જ સહયોગી રહ્યા છે. મધ્ય પૂર્વના સંઘર્ષને કારણે જ્યારે તેલના પુરવઠામાં ગેપ સર્જાયો, ત્યારે ભારતની જરૂરિયાતો અને વૈશ્વિક બજારના સંતુલનને જોતા રશિયન તેલ લેવાની મંજૂરી આપવી જરૂરી બની હતી. ભારત આ અગાઉ અમેરિકી તેલ ખરીદવા માટે પણ તૈયાર હતું, પરંતુ વર્તમાન કટોકટીને જોતા આ ટેમ્પરરી એડજસ્ટમેન્ટ કરવામાં આવ્યું છે.
