હોમ લોનનું ટેન્શન છોડો: ₹60 લાખની લોન પર 15 કે 20 વર્ષમાં કેટલું વ્યાજ ચૂકવવું પડશે? જુઓ ડિટેલ્સ
પોતાનું ઘર ખરીદવું એ દરેક વ્યક્તિના જીવનનું સૌથી મોટું સપનું અને એક મહત્વપૂર્ણ નાણાકીય નિર્ણય હોય છે. જ્યારે તમે ₹80 લાખનું ઘર ખરીદવાનું આયોજન કરો છો, ત્યારે માત્ર મકાનની કિંમત જ નહીં પણ તેના માટે લેવામાં આવતી લોન અને દર મહિને ચૂકવવાની થતી ઈએમઆઈ (EMI) નું ગણિત સમજવું પણ એટલું જ જરૂરી છે. જો તમે ₹20 લાખનું ડાઉનપેમેન્ટ કરો છો, તો બાકીના ₹60 લાખ માટે તમારે હોમ લોન લેવી પડશે. આ લોન તમારા માસિક બજેટને કેવી રીતે અસર કરશે અને વ્યાજનું ભારણ કેટલું રહેશે, તેની વિગતવાર સમજ નીચે મુજબ છે.
હોમ લોન માટે વ્યાજ દર અને સિબિલ સ્કોરનું મહત્વ
હોમ લોન લેતી વખતે સૌથી પહેલી નજર વ્યાજ દર પર હોવી જોઈએ. બેંકો સામાન્ય રીતે એવા ગ્રાહકોને સૌથી ઓછા વ્યાજ દરે લોન આપે છે જેમનો સિબિલ સ્કોર (CIBIL Score) 800 કે તેથી વધુ હોય. તમારી આવક, ઉંમર અને અગાઉની કોઈ લોન ચાલતી હોય તો તેની અસર પણ વ્યાજ દર પર પડે છે.
ધારો કે તમને વાર્ષિક 7.50% ના વ્યાજ દરે ₹60 લાખની હોમ લોન મળે છે, તો અલગ-અલગ સમયગાળા માટે તમારું ગણિત કંઈક આવું રહેશે:
20 વર્ષના સમયગાળા માટે ₹60 લાખની લોનનું ગણિત
જો તમે ₹60 લાખની હોમ લોન 7.50% ના વ્યાજ દરે 20 વર્ષ માટે લો છો, તો તમારી માસિક કિંસ્ત (EMI) અંદાજે ₹48,336 બનશે.
-
કુલ વ્યાજ: આ 20 વર્ષ દરમિયાન તમારે માત્ર વ્યાજ પેટે અંદાજે ₹56,00,542 ચૂકવવા પડશે.
-
કુલ ચુકવણી: લોનની મૂળ રકમ અને વ્યાજ મળીને તમે બેંકને કુલ ₹1,16,00,542 પરત કરશો.
લાંબા ગાળાની લોનમાં EMI ઓછી રહે છે, જે મધ્યમ વર્ગના પરિવાર માટે દર મહિને ઘર ચલાવવામાં સરળતા રહે છે, પરંતુ સામે પક્ષે વ્યાજનો આંકડો મૂળ રકમની લગભગ નજીક પહોંચી જાય છે.
15 વર્ષના સમયગાળા માટે ₹60 લાખની લોનનો ફાયદો
ઘણા નિષ્ણાતો લોનનો સમયગાળો ઓછો રાખવાની સલાહ આપે છે. જો તમે એ જ ₹60 લાખની લોન 15 વર્ષ માટે લો છો, તો તમારી માસિક EMI વધીને ₹55,621 થઈ જશે.
-
વ્યાજમાં બચત: આ કિસ્સામાં તમારે કુલ વ્યાજ અંદાજે ₹40,11,733 ચૂકવવું પડશે.
-
ફાયદો: 20 વર્ષની સરખામણીએ અહીં તમે વ્યાજમાં લગભગ ₹15,88,809 ની સીધી બચત કરી શકો છો.
ટૂંકા ગાળાની લોનમાં તમારી માસિક EMI થોડી વધારે હોય છે, પણ તે લાંબા ગાળે લાખો રૂપિયાની બચત કરાવી આપે છે અને તમે દેવામાંથી વહેલા મુક્ત થઈ શકો છો.
બજેટ અને આવક મુજબ લોનનું આયોજન
બેંક તમારી આવક જોઈને તમને મહત્તમ લોન આપવા તૈયાર થઈ શકે છે, પરંતુ તમારે તમારા વાસ્તવિક બજેટને ધ્યાનમાં રાખવું જોઈએ. હોમ લોનની EMI તમારા ઘરના અન્ય ખર્ચાઓ જેવા કે બાળકોની ફી, મેડિકલ ખર્ચ અને અન્ય સામાજિક જવાબદારીઓમાં અવરોધરૂપ ન બનવી જોઈએ.
એક સામાન્ય નિયમ મુજબ, તમારી તમામ લોનની કુલ EMI તમારી નેટ ટેક-હોમ સેલરીના 40% થી 50% થી વધુ ન હોવી જોઈએ. જો તમારી આવક અનિશ્ચિત હોય અથવા ભવિષ્યમાં ખર્ચ વધવાની શક્યતા હોય, તો વધુ ડાઉનપેમેન્ટ કરવું અને ઓછી લોન લેવી એ હંમેશા ડહાપણભર્યું પગલું છે. હોમ લોન 30 વર્ષ સુધીના સમયગાળા માટે પણ મળી શકે છે, પરંતુ તે લોન ઘણી મોંઘી સાબિત થાય છે.
