અમે દબાણમાં આવનારા નથી; જો ‘ઓપરેશન સિંદૂર 2.0’ થશે તો તે પહેલાં કરતાં વધુ ખતરનાક હશે: લેફ્ટનન્ટ જનરલ મનોજ કટિયાર
વધતી જતી વૈશ્વિક પડકારો વચ્ચે ભારત પોતાની સીમાઓની સુરક્ષાને લઈને સતત સતર્ક છે. દુશ્મનને રણમેદાનમાં જડબાતોડ જવાબ આપવા માટે ભારતીય સેના કેટલી સજ્જ છે, તેની ઝલક તાજેતરમાં પઠાણકોટ કેન્ટ ખાતે આયોજિત ‘ઓપરેશન સિંદૂર’ના પ્રદર્શન દરમિયાન જોવા મળી હતી. આ અવસરે વેસ્ટર્ન કમાન્ડના લેફ્ટનન્ટ જનરલ મનોજ કટિયારે સ્પષ્ટ શબ્દોમાં ચેતવણી આપી હતી કે ભારત કોઈના દબાણમાં આવવાનું નથી અને જો ભવિષ્યમાં ‘ઓપરેશન સિંદૂર 2.0’ કરવાની જરૂર પડી, તો તે પહેલાં કરતાં ઘણું વધારે ઘાતક હશે.
પાકિસ્તાનની પરમાણુ ધમકી માત્ર એક ‘બ્લફ’
પાકિસ્તાન તરફથી વારંવાર આપવામાં આવતી પરમાણુ હુમલાની ધમકીઓ પર પ્રતિક્રિયા આપતા લેફ્ટનન્ટ જનરલ કટિયારે જણાવ્યું હતું કે, આ માત્ર ભારત પર દબાણ લાવવાનો એક પ્રયાસ છે. તેમણે તેને ‘બ્લફ’ (ખાલી ધમકી) ગણાવતા કહ્યું કે, પાકિસ્તાન ભારતને જવાબી કાર્યવાહી કરતા અટકાવવા માંગે છે, પરંતુ ભારતીય સેના આવા કોઈ પણ દબાણને વશ થશે નહીં.
આતંકી ઠેકાણાઓ પર સચોટ પ્રહાર
ઓપરેશન સિંદૂરની સફળતા વિશે વાત કરતા તેમણે જણાવ્યું કે, આ ઓપરેશન હેઠળ ભારતે પાકિસ્તાનમાં આવેલા અનેક આતંકી ઠેકાણાઓને નિશાન બનાવ્યા હતા. જ્યારે પાકિસ્તાને વળતો હુમલો કરવાનો પ્રયાસ કર્યો, ત્યારે ભારતે તેમના એરબેઝ અને સૈન્ય મથકોને ભારે નુકસાન પહોંચાડ્યું હતું. આ સંઘર્ષ લગભગ 88 કલાક ચાલ્યો હતો, જેના અંતે પાકિસ્તાને ઘૂંટણ ટેકવીને DGMO સ્તરે સીઝફાયરની અપીલ કરવી પડી હતી.
ઓપરેશન સિંદૂર 2.0: વધુ કડક અને અત્યાધુનિક
મનોજ કટિયારે ચેતવણી આપી છે કે આગામી વ્યૂહરચનામાં ડ્રોન સૌથી મહત્વનો હિસ્સો હશે. વેસ્ટર્ન કમાન્ડ હાલમાં ડ્રોન નિર્માણ અને ટેકનિકલ તૈયારીઓ પર વિશેષ ધ્યાન આપી રહી છે. જમ્મુ-કાશ્મીરમાં આતંકવાદની સ્થિતિ પર તેમણે કહ્યું કે, આંકડાઓ પહેલા કરતા ઘટ્યા છે, પરંતુ પાકિસ્તાન હજુ પણ શાંતિ ડહોળવાનો પ્રયાસ કરે છે, જેની સામે સેનાની કડક કાર્યવાહી ચાલુ રહેશે.
બ્રહ્મોસ અને આકાશ: ભારતીય સેનાના અજેય હથિયારો
પઠાણકોટમાં પ્રદર્શન દરમિયાન બ્રહ્મોસ મિસાઈલ મુખ્ય આકર્ષણનું કેન્દ્ર રહી હતી. આ સુપરસોનિક ક્રુઝ મિસાઈલ જમીનથી જમીન પર અત્યંત સચોટ પ્રહાર કરવા માટે જાણીતી છે. તેની ઝડપ અને ઓછી ઊંચાઈએ ઉડવાની ક્ષમતાને કારણે તેને રોકવી દુશ્મન માટે લગભગ અશક્ય છે. તેવી જ રીતે, આકાશ એર ડિફેન્સ સિસ્ટમ સપાટીથી હવામાં પ્રહાર કરીને દુશ્મનના ડ્રોન અને મિસાઈલોને હવામાં જ તોડી પાડવાની અદભૂત ક્ષમતા ધરાવે છે.
મોડર્ન વોરફેર અને સ્પેશિયલ યુનિટ્સ
આજના આધુનિક યુદ્ધમાં ડ્રોન એક મોટો ખતરો છે. સેનાએ બતાવ્યું કે કેવી રીતે મલ્ટી-લેયર એર ડિફેન્સ અને ઇલેક્ટ્રોનિક વોરફેર સિસ્ટમ દ્વારા દુશ્મનના ડ્રોન લિંકને જામ કરી શકાય છે. આ ઉપરાંત, સેનામાં નવી સામેલ થયેલી રુદ્ર બ્રિગેડ અને ભૈરવ બટાલિયન વિશે પણ માહિતી આપવામાં આવી હતી. આ યુનિટ્સ નાઈટ વિઝન અને એડવાન્સ કોમ્યુનિકેશનથી સજ્જ છે, જે હાઈ-રિસ્ક ઓપરેશન પાર પાડવામાં માહિર છે.
આ પ્રદર્શન દ્વારા ભારતીય સેનાએ વિશ્વને સંદેશ આપ્યો છે કે તે હળવાશમાં લેવા જેવી શક્તિ નથી અને દેશની સુરક્ષા માટે કોઈપણ હદ સુધી જવા તૈયાર છે.
