બાંગ્લાદેશના 35થી વધુ ગામોમાં પાંચ મહિનાથી અંધારપટ! 10 હજારથી વધુ લોકો પરેશાન, પદ્મા નદીની નીચે તૂટેલી કેબલ બની મુસીબત
પાડોશી દેશ બાંગ્લાદેશમાં એક વિચિત્ર અને ચિંતાજનક સ્થિતિ સામે આવી છે. સામાન્ય રીતે વીજળી થોડા કલાકો માટે બંધ રહે તો પણ લોકોની દિનચર્યા ખોરવાઈ જાય છે, પરંતુ બાંગ્લાદેશમાં એવા 35થી 40 ગામો છે, જ્યાં છેલ્લા પાંચ મહિનાથી વીજળી જ નથી. આ કારણે 10 હજારથી વધુ લોકો અંધારામાં જીવન જીવવા મજબૂર બન્યા છે. સ્થિતિ એવી છે કે લોકોના ઘરમાં રહેલા પંખા, ફ્રિજ અને ટીવી જેવી ચીજવસ્તુઓ માત્ર શોભાના સાધન બનીને રહી ગઈ છે. બાળકોના અભ્યાસથી લઈને ખેડૂતોના કામકાજ સુધી દરેક ક્ષેત્ર પર તેની અસર પડી રહી છે.
પદ્મા નદીની નીચે વીજળીની કેબલ તૂટતાં સર્જાઈ સમસ્યા
આ સમગ્ર સમસ્યા બાંગ્લાદેશના ફરીદપુર જિલ્લાના સદરપુર ઉપજિલ્લા હેઠળ આવતા નારિકેલબારિયા યુનિયન વિસ્તારમાં ઊભી થઈ છે. આ વિસ્તાર પદ્મા નદીથી ઘેરાયેલો હોવાથી અહીં વીજળી પહોંચાડવા માટે નદીના તળિયેથી આશરે ચાર કિલોમીટર લાંબી ખાસ સબમરીન કેબલ નાખવામાં આવી હતી.
વર્ષ 2021માં સરકારની 100 ટકા વીજળીકરણ યોજનાના ભાગરૂપે આ વિસ્તારમાં પ્રથમ વખત વીજળી પહોંચી હતી. વીજળી આવતાં ગ્રામજનોના જીવનમાં મોટો બદલાવ આવ્યો હતો. પરંતુ છેલ્લા પાંચ વર્ષ દરમિયાન આ કેબલ ચાર વખત તૂટી ચૂકી છે. છેલ્લે 8 જૂન, 2026ના રોજ કેબલ તૂટી જતાં સમગ્ર વિસ્તારમાં વીજ પુરવઠો બંધ થઈ ગયો હતો.
વીજ વિભાગના અધિકારીઓના જણાવ્યા અનુસાર, ચોમાસા દરમિયાન પદ્મા નદીમાં પાણીનો પ્રવાહ અત્યંત ઝડપી બની જાય છે. પાણીનું સ્તર વધવાથી અને નદીના જોરદાર પ્રવાહને કારણે કેબલનું સમારકામ કરવું મુશ્કેલ બન્યું છે. નદીની અંદર ઉતરીને સમારકામ કરવાનો પ્રયાસ પણ સફળ રહ્યો નહોતો.
ઘરોમાં પંખા બંધ, બાળકોનો અભ્યાસ મુશ્કેલ
પાંચ મહિનાથી વીજળી ન હોવાને કારણે ગ્રામજનોની મુશ્કેલીઓ સતત વધી રહી છે. ઉનાળાની ગરમીમાં પંખા વગર રાત પસાર કરવી મુશ્કેલ બની છે. અનેક પરિવારો દ્વારા લોન અથવા બચતના પૈસાથી ખરીદવામાં આવેલા ફ્રિજ અને ટીવી પણ ઉપયોગ વિના પડ્યાં છે.
બાળકોના શિક્ષણ પર પણ તેની ગંભીર અસર પડી છે. સાંજ પડતાં જ ગામોમાં અંધારું છવાઈ જાય છે. વિદ્યાર્થીઓને મીણબત્તી કે અન્ય વૈકલ્પિક પ્રકાશમાં અભ્યાસ કરવો પડે છે. બીજી તરફ નાના વેપારીઓને પણ મુશ્કેલી પડી રહી છે. વીજળીથી ચાલતાં સાધનો બંધ હોવાથી રોજગાર પર અસર થઈ છે.
કેટલાક લોકોએ મજબૂરીમાં સોલાર પેનલ લગાવ્યાં છે, પરંતુ તેનાથી માત્ર એકાદ-બે લાઇટ જ ચલાવી શકાય છે. પંખા અને અન્ય મોટા ઉપકરણો ચલાવવાનું શક્ય બનતું નથી. એક દરજીએ પોતાની વીજળીથી ચાલતી સિલાઈ મશીનનો ઉપયોગ ચાલુ રાખવા માટે આશરે 18 હજાર ટાકા ખર્ચીને નવી બેટરી ખરીદવી પડી હતી.
નવી કેબલ નાખવા માટે કરોડો રૂપિયાનો ખર્ચ
હવે જૂની કેબલનું સમારકામ મુશ્કેલ હોવાથી અધિકારીઓએ નવી કેબલ નાખવાનો નિર્ણય લીધો છે. આ સમગ્ર કામગીરી પાછળ અંદાજે 25 કરોડ બાંગ્લાદેશી ટાકા એટલે કે આશરે 18.91 કરોડ ભારતીય રૂપિયાનો ખર્ચ થવાની શક્યતા છે. ચાર કિલોમીટર લાંબી નવી કેબલની વ્યવસ્થા કરવામાં આવી છે અને કોન્ટ્રાક્ટરની પસંદગી માટે ટેન્ડર પ્રક્રિયા હાથ ધરવાની તૈયારી છે.
અધિકારીઓનો દાવો છે કે તમામ તૈયારીઓ પૂર્ણ થયા બાદ નવી કેબલ નાખવામાં વધુમાં વધુ ત્રણ દિવસ લાગશે. ડિસેમ્બર 2026 સુધીમાં વીજ પુરવઠો ફરી શરૂ કરવાનો લક્ષ્યાંક રાખવામાં આવ્યો છે.
ગ્રામજનોમાં રોષ, તંત્રની કામગીરી સામે સવાલો
બીજી તરફ, સ્થાનિક લોકો વીજ વિભાગની કામગીરી સામે નારાજગી વ્યક્ત કરી રહ્યા છે. તેમનું કહેવું છે કે પાંચ મહિના સુધી વીજળી બંધ રહેવા છતાં સમસ્યાનો કાયમી ઉકેલ લાવવામાં આવ્યો નથી. ગ્રાહક સંગઠનના ઊર્જા સલાહકાર ડૉ. એમ. શમ્સુલ આલમે પણ આટલા લાંબા સમય સુધી વીજ પુરવઠો બંધ રહેવાને ગંભીર બેદરકારી ગણાવી છે.
તેમના મતે વીજળી કોઈ સામાન્ય સુવિધા નથી, પરંતુ નાગરિકોને મળવી જોઈએ તેવી આવશ્યક જાહેર સેવા છે. નદીની નીચે કેબલ તૂટી જવી એક ટેકનિકલ સમસ્યા હોઈ શકે છે, પરંતુ તેના ઉકેલ માટે મહિનાઓ સુધી રાહ જોવી પડે તે સ્વીકાર્ય નથી.
એક તરફ દુનિયા આધુનિક ટેક્નોલોજી અને ડિજિટલ વિકાસ તરફ આગળ વધી રહી છે, ત્યારે બીજી તરફ બાંગ્લાદેશનાં આ ગામોના હજારો લોકો આજે પણ વીજળી જેવી મૂળભૂત સુવિધા માટે રાહ જોઈ રહ્યા છે. હવે જોવાનું એ રહેશે કે ડિસેમ્બર સુધીમાં નવી કેબલ નાખીને ગ્રામજનોના ઘરોમાં ફરી પ્રકાશ પહોંચે છે કે નહીં.
