કિશોરીઓના સશક્તિકરણ માટે ઝાલોદમાં કાયદા, સુરક્ષા અને બેન્કિંગ અંગે જાગૃતિ કાર્યક્રમ
ઝાલોદ તાલુકા આઈ.સી.ડી.એસ. ઘટક-૧ દ્વારા ‘પૂર્ણા યોજના’ હેઠળ ૧૪ થી ૧૮ વર્ષની કિશોરીઓ માટે ખાસ એક્સપોઝર વિઝિટનું આયોજન કરવામાં આવ્યું હતું. સી.ડી.પી.ઓ. નીલુંબેનના માર્ગદર્શન હેઠળ કિશોરીઓએ ઝાલોદ પોલીસ સ્ટેશનની મુલાકાત લીધી હતી. જ્યાં પોલીસ ઇન્સ્પેક્ટર શ્રી ગામીત અને મહિલા પોલીસ કોન્સ્ટેબલ્સ દ્વારા કિશોરીઓને ઘરેલું હિંસા, દહેજ પ્રથા, બાળ લગ્ન અને જાતીય સતામણી જેવા ગંભીર સામાજિક દૂષણો સામે લડવા માટેના કાયદાઓ વિશે સમજ આપી હતી.
કિશોરીઓને મુશ્કેલીના સમયે ૧૮૧ અભયમ હેલ્પલાઇન, મહિલા પોલીસ સ્ટેશન અને સખી વન સ્ટોપ સેન્ટરનો સંપર્ક કેવી રીતે કરવો તેની વિગતવાર માહિતી આપી પ્રોત્સાહિત કરવામાં આવી હતી. આ ઉપરાંત, સોશિયલ મીડિયાના વધુ પડતા ઉપયોગથી થતા ગેરફાયદા અને સાયબર સુરક્ષા અંગે પણ સાવચેત કરવામાં આવી હતી.
બેન્કિંગ વ્યવહાર અને નાણાકીય સાક્ષરતા
કિશોરીઓ આર્થિક રીતે પણ જાગૃત બને તે હેતુથી તેમને બેન્ક ઓફ બરોડાની મુલાકાત કરાવવામાં આવી હતી. બેન્ક કર્મચારીઓએ કિશોરીઓને બેન્કમાં ખાતું ખોલાવવા માટે જરૂરી દસ્તાવેજો (KYC) ની જાણકારી આપી હતી. ખાસ કરીને દીકરીઓના ઉજ્જવળ ભવિષ્ય માટેની સુકન્યા સમૃદ્ધિ યોજના, એજ્યુકેશન લોન અને બચત ખાતાના વિવિધ પ્રકારો વિશે સમજણ આપી હતી.
શિક્ષણ અને સશક્તિકરણ પર ભાર
પોલીસ સ્ટેશનની આંતરિક મુલાકાત દરમિયાન કિશોરીઓએ પોલીસની કાર્યપદ્ધતિ પ્રત્યક્ષ નિહાળી હતી. અધિકારીઓએ કિશોરીઓ સાથે સંવાદ કરી તેમને ઉચ્ચ શિક્ષણ મેળવી આત્મનિર્ભર બનવા પ્રેરણા આપી હતી. આ કાર્યક્રમમાં આઈ.સી.ડી.એસ.ની ટીમ, આંગણવાડી કાર્યકર બહેનો અને મોટી સંખ્યામાં કિશોરીઓ જોડાઈ હતી.
