તમારા ખાતામાં પીએફનું વ્યાજ જમા થયું કે નહીં? જાણો ઘરબેઠા બેલેન્સ ચકાસવાની ૪ સરળ રીતો
નોકરીયાત વર્ગ અને નોકરી કરતા લાખો કર્મચારીઓ માટે પીએફ (PF) સંબંધિત એક મોટા અને રાહત આપનારા સમાચાર સામે આવ્યા છે. કર્મચારી ભવિષ્ય નિધિ સંગઠન (EPFO) દ્વારા નાણાકીય વર્ષ ૨૦૨૫-૨૬ માટે સભ્યોના પીએફ ખાતામાં વ્યાજની રકમ જમા કરવાની પ્રક્રિયા પૂરજોશમાં શરૂ કરી દેવામાં આવી છે.
જો તમે સંગઠિત ક્ષેત્રમાં નોકરી કરો છો અને કર્મચારી ભવિષ્ય નિધિ સંગઠન (EPFO) ના સક્રિય સભ્ય છો, તો આ સમાચાર તમારા માટે અત્યંત આનંદદાયક છે. EPFO એ નાણાકીય વર્ષ ૨૦૨૫-૨૬ માટે દેશભરના લાખો કર્મચારીઓના ખાતામાં ૮.૨૫ ટકાના દરે વ્યાજની રકમ ટ્રાન્સફર કરવાનું સત્તાવાર રીતે શરૂ કરી દીધું છે.
સંગઠનના જણાવ્યા અનુસાર, અત્યાર સુધીમાં આશરે ૩૪ કરોડ સભ્યોના પીએફ ખાતામાં વ્યાજ ઉમેરીને નવી બેલેન્સ અપડેટ કરી દેવામાં આવી છે. સભ્યો હવે તેમના ખાતાની અદ્યતન સ્થિતિ જોઈ શકે છે.
૮.૨૫% વ્યાજ દરથી બચતમાં મોટો વધારો
નોકરીયાત વર્ગ માટે ઇપીએફ (EPF) એ સુરક્ષિત અને લાંબા ગાળાની બચત માટેનો સૌથી ભરોસાપાત્ર વિકલ્પ ગણાય છે. નિયમ મુજબ, કર્મચારી પોતાના મૂળ પગાર (Basic Salary + DA) ના ૧૨ ટકા હિસ્સો પીએફ ખાતામાં જમા કરાવે છે, અને એટલી જ સમાન રકમનું યોગદાન એમ્પ્લોયર (કંપની) દ્વારા કરવામાં આવે છે.
ઇપીએફઓ દર વર્ષે આ એકત્રિત થાપણ પર આકર્ષક વ્યાજ પૂરું પાડે છે. ઉદાહરણ તરીકે, જો કોઈ કર્મચારીના પીએફ ખાતામાં ₹૧ લાખની કુલ થાપણ બોલતી હોય, તો ૮.૨૫ ટકા વ્યાજ દર લેખે તેના ખાતામાં વાર્ષિક ₹૮,૨૫૦ વ્યાજ પેટે જમા થાય છે.
ઘરેબેઠા તમારું પીએફ બેલેન્સ ચેક કરવાની ૩ આસાન રીતો
૧. ઇપીએફઓ મેમ્બર પાસબુક પોર્ટલ (Passbook Lite):
તમારું બેલેન્સ જોવા માટે ઇપીએફઓના સત્તાવાર મેમ્બર પાસબુક પોર્ટલ પર જાઓ. ત્યાં તમારો ૧૨-અંકનો યુએએન (UAN), પાસવર્ડ અને કેપ્ચા કોડ દાખલ કરીને લોગ-ઈન કરો. તમારા રજિસ્ટર્ડ મોબાઇલ નંબર પર મળેલો ઓટીપી (OTP) દાખલ કર્યા પછી ‘વ્યૂ’ (View) વિભાગમાં જાઓ. ત્યાં ‘પાસબુક લાઇટ’ ઓપ્શન પર ક્લિક કરીને તમે જમા થયેલું વ્યાજ અને કુલ બેલેન્સ જોઈ શકો છો.
૨. મિસ્ડ કોલ અને એસએમએસ (SMS) સેવા:
જો તમારો મોબાઇલ નંબર યુએએન સાથે લિંક હોય, તો તમે ઇન્ટરનેટ વગર પણ બેલેન્સ જાણી શકો છો. તમારા રજિસ્ટર્ડ નંબર પરથી 011-22901406 પર મિસ્ડ કોલ આપો. થોડી જ સેકન્ડોમાં તમને એસએમએસ દ્વારા બેલેન્સની માહિતી મળી જશે.
આ ઉપરાંત, એસએમએસથી માહિતી મેળવવા માટે તમારા રજિસ્ટર્ડ નંબર પરથી 7738299899 પર EPFOHO UAN HIN લખીને મોકલો.
૩. ઉમંગ (UMANG) મોબાઈલ એપ:
તમારા સ્માર્ટફોનમાં ઉમંગ એપ ડાઉનલોડ કરી મોબાઇલ નંબરથી લોગ-ઈન કરો. એપમાં ‘ઓલ સર્વિસિસ’ માં જઈને EPFO વિકલ્પ પસંદ કરો. ત્યારબાદ ‘વ્યૂ પાસબુક’ (View Passbook) પર ક્લિક કરી તમારો UAN અને ઓટીપી દાખલ કરીને સરળતાથી પીએફ પાસબુક જોઈ શકાશે.
વ્યાજ જમા થવામાં વિલંબ થાય તો નાણાકીય નુકસાન થાય?
ઘણા પીએફ સભ્યોના મનમાં એવો ભય કે પ્રશ્ન રહેતો હોય છે કે જો તેમના ખાતામાં વ્યાજ મોડું જમા થાય તો શું તેમને વ્યાજનો નફો ઓછો મળશે? ઇપીએફઓએ આ અંગે સ્પષ્ટતા કરતા જણાવ્યું છે કે વિલંબના કારણે સભ્યોને કોઈ જ નાણાકીય નુકસાન થતું નથી.
ઇપીએફ સ્કીમ ૧૯૫૨ ના નિયમો અનુસાર, વ્યાજની ગણતરી દર મહિને ખાતામાં રહેલા રનિંગ બેલેન્સના આધારે જ કરવામાં આવે છે. તેથી, સિસ્ટમ અપડેટ કે ટેકનિકલ કારણોસર વ્યાજ ક્રેડિટ થવામાં મોડું થાય તો પણ ખાતાધારકને તેનું પૂરેપૂરું વ્યાજ વ્યાજસહિત ચૂકવવામાં આવે છે.
