સોશિયલ મીડિયાના બેતાજ બાદશાહ: PM મોદીએ યુટ્યુબ અને ઇન્સ્ટાગ્રામ પર સ્થાપ્યા નવા કીર્તિમાન
વડાપ્રધાન નરેન્દ્ર મોદીએ ડિજિટલ દુનિયામાં પોતાની લોકપ્રિયતાનો ડંકો વગાડતા વધુ એક ઐતિહાસિક સિદ્ધિ હાંસલ કરી છે. વિશ્વના નેતાઓમાં સૌથી વધુ પ્રભાવશાળી ગણાતા PM મોદીના યુટ્યુબ સબ્સ્ક્રાઇબર્સની સંખ્યા હવે 30 મિલિયન (3 કરોડ) ને પાર કરી ગઈ છે. આ આંકડો માત્ર એક સંખ્યા નથી, પરંતુ તે વૈશ્વિક સ્તરે તેમની વધતી જતી સ્વીકાર્યતા અને જનતા સાથેના સીધા જોડાણનું પ્રતિક છે.
વૈશ્વિક નેતાઓની સરખામણીમાં પ્રચંડ સરસાઈ
યુટ્યુબ પ્લેટફોર્મ પર PM મોદીની લોકપ્રિયતા અન્ય વૈશ્વિક નેતાઓ કરતા અનેકગણી વધારે છે. આ યાદીમાં બીજા ક્રમે બ્રાઝિલના ભૂતપૂર્વ રાષ્ટ્રપતિ જાયર બોલ્સોનારો છે, પરંતુ તેમના સબ્સ્ક્રાઇબર્સની સંખ્યા PM મોદી કરતા ચોથા ભાગની જ છે. આશ્ચર્યજનક વાત એ છે કે, ડેટા મુજબ PM મોદી પાસે અમેરિકી રાષ્ટ્રપતિ ડોનાલ્ડ ટ્રમ્પ કરતા સાત ગણા વધુ યુટ્યુબ સબ્સ્ક્રાઇબર્સ છે, જે સાબિત કરે છે કે તેમનો ડિજિટલ પહોંચનો વ્યાપ કેટલો વિશાળ છે.
ઇન્સ્ટાગ્રામ પર 100 મિલિયનનો આંકડો પાર કરનાર પ્રથમ નેતા
માત્ર યુટ્યુબ જ નહીં, પરંતુ ઇન્સ્ટાગ્રામ પર પણ વડાપ્રધાન મોદીએ ઇતિહાસ રચ્યો છે. તેઓ 100 મિલિયન (10 કરોડ) ફોલોઅર્સ ધરાવતા વિશ્વના પ્રથમ રાજકીય નેતા બન્યા છે. વર્ષ 2014 માં ઇન્સ્ટાગ્રામ પર જોડાયા બાદ, છેલ્લા એક દાયકામાં તેમનું એકાઉન્ટ વિશ્વનું સૌથી વધુ એન્ગેજિંગ ડિજિટલ સ્પેસ બની ગયું છે.
જો આંકડાકીય સરખામણી કરીએ તો, PM મોદીના ઇન્સ્ટાગ્રામ ફોલોઅર્સ ડોનાલ્ડ ટ્રમ્પ (43.2 મિલિયન) કરતા બમણાથી પણ વધુ છે. હકીકતમાં, વિશ્વના અન્ય ટોચના પાંચ નેતાઓ – પ્રબોવો સુબિયાન્ટો, લુલા, એર્દોગન અને જેવિયર માઇલી – આ તમામના ફોલોઅર્સનો કુલ સરવાળો કરવામાં આવે તો પણ તે PM મોદીના એકલાના ફોલોઅર્સ કરતા ઓછો થાય છે.
ભારતીય રાજનીતિમાં પણ એકહથ્થુ શાસન
ભારતીય રાજકીય ફલક પર પણ સોશિયલ મીડિયાના મામલે PM મોદી અન્ય નેતાઓ કરતા જોજનો દૂર છે. ઇન્સ્ટાગ્રામ પર ઉત્તર પ્રદેશના મુખ્યમંત્રી યોગી આદિત્યનાથ 16.1 મિલિયન સાથે બીજા ક્રમે અને રાહુલ ગાંધી 12.6 મિલિયન સાથે ત્રીજા ક્રમે છે. યુટ્યુબ પર પણ PM મોદીના સબ્સ્ક્રાઇબર્સ રાહુલ ગાંધી કરતા ત્રણ ગણા અને આમ આદમી પાર્ટી કે કોંગ્રેસના સત્તાવાર હેન્ડલ્સ કરતા ચાર ગણા વધુ છે.
આ આંકડાઓ સ્પષ્ટપણે દર્શાવે છે કે વડાપ્રધાન નરેન્દ્ર મોદી માત્ર ભારતમાં જ નહીં, પરંતુ સમગ્ર વિશ્વના યુવાનો અને નાગરિકોમાં અત્યંત લોકપ્રિય છે. તેમની આ ડિજિટલ સક્રિયતાએ જનસંવાદની નવી વ્યાખ્યા લખી છે.
