વર્લ્ડ કપ ક્વોલિફાયર્સ: ભારતીય મહિલા હોકી ટીમની ઐતિહાસિક સિદ્ધિ, ઈટાલીને હરાવી વર્લ્ડ કપમાં એન્ટ્રી
ભારતીય મહિલા હોકી ટીમે ફરી એકવાર મેદાન પર પોતાનું વર્ચસ્વ સાબિત કર્યું છે. મહિલા હોકી વર્લ્ડ કપ ક્વોલિફાયર્સની સેમીફાઈનલમાં ભારત અને ઈટાલી વચ્ચે રમાયેલા રોમાંચક મુકાબલામાં ભારતનો 1-0 થી વિજય થયો છે. આ જીતની સાથે જ ભારતીય ટીમે ન માત્ર ટુર્નામેન્ટની ફાઈનલમાં પ્રવેશ કર્યો છે, પરંતુ આગામી વર્લ્ડ કપ માટે પણ પોતાનું સ્થાન સુરક્ષિત કરી લીધું છે.
રોમાંચક પ્રથમ ક્વાર્ટર: બંને ટીમો વચ્ચે કાંટાની ટક્કર
મેચની શરૂઆતથી જ ભારત અને ઈટાલીની ખેલાડીઓ વચ્ચે જોરદાર સંઘર્ષ જોવા મળ્યો હતો. પ્રથમ ક્વાર્ટરમાં બંને ટીમોએ આક્રમક રમત રમી હતી. ભારતીય ટીમે બે વખત ઈટાલીના ડિફેન્સને તોડીને સર્કલમાં પ્રવેશ કર્યો હતો, પરંતુ ઈટાલીએ પણ વળતો પ્રહાર કરીને ગોલ કરવાની અનેક તકો ઝડપી હતી. જોકે, ભારતના મજબૂત ડિફેન્સે ઈટાલીને એક પણ ગોલ કરવા દીધો નહોતો.
બીજા ક્વાર્ટરમાં પેનલ્ટી કોર્નરની નિષ્ફળતા
બીજા ક્વાર્ટરમાં ભારતીય ખેલાડીઓએ ગોલ કરવા માટે અનેક પ્રયાસો કર્યા. મેચની 18મી મિનિટે ભારતને પ્રથમ પેનલ્ટી કોર્નર મળ્યો હતો, જ્યાં નવનીત કૌરે શાનદાર શોટ માર્યો હતો, પરંતુ ઈટાલીની ગોલકીપર લુસિયા ઈનેસ કારુસોએ તેને અટકાવી દીધો હતો. ત્યારબાદ 27મી મિનિટે મળેલો બીજો પેનલ્ટી કોર્નર પણ ગોલ પોસ્ટથી દૂર રહી ગયો હતો. આમ, હાફ ટાઈમ સુધી બંને ટીમો ગોલ રહિત રહી હતી.
મનીષા ચૌહાણનો નિર્ણાયક ગોલ
બીજા હાફની શરૂઆતમાં ઈટાલીએ પુનરાગમન કરવાનો પ્રયાસ કર્યો હતો, પરંતુ ભારતીય ગોલકીપર બિચુ દેવી ખારીબામની સતર્કતાને કારણે ઈટાલી સફળ થઈ શક્યું નહીં. મેચની 40મી મિનિટે ભારતને ફરી એકવાર પેનલ્ટી કોર્નર મળ્યો. આ વખતે મનીષા ચૌહાણે કોઈ ભૂલ ન કરી અને એક શક્તિશાળી શોટ સાથે ઈટાલીના ડિફેન્સને ચીરીને બોલને ગોલ પોસ્ટમાં ધકેલી દીધો હતો. આ એકમાત્ર ગોલ અંતે ભારત માટે વિજયી સાબિત થયો.
ફાઈનલમાં ઈંગ્લેન્ડ સામે ટક્કર
છેલ્લા ક્વાર્ટરમાં ઈટાલીએ સ્કોર સરભર કરવા માટે આકાશ-પાતાળ એક કર્યા હતા, પરંતુ ભારતીય ટીમે રક્ષણાત્મક રમત રમીને વિજય જાળવી રાખ્યો હતો. હવે ફાઈનલમાં ભારતનો સામનો ઈંગ્લેન્ડ સામે થશે.
વિશેષ વિગત: ભારતીય મહિલા હોકી ટીમ હવે 15 થી 30 ઓગસ્ટ દરમિયાન બેલ્જિયમ અને નેધરલેન્ડની યજમાનીમાં રમાનારા વર્લ્ડ કપમાં વિશ્વની શ્રેષ્ઠ ટીમો સામે ટકરાશે.
