Gujarat ગુજરાતમાં આગામી સમયમાં યોજાનારી મહાનગરપાલિકાઓ અને પંચાયતોની ચૂંટણીઓને લઈને ભારતીય જનતા પાર્ટીએ અત્યારથી જ વ્યૂહાત્મક તૈયારીઓ શરૂ કરી દીધી છે. આ વખતે પક્ષ દ્વારા ટિકિટ વિતરણમાં અત્યંત કડક અને શિસ્તબદ્ધ અભિગમ અપનાવવામાં આવે તેવી પ્રબળ શક્યતા છે. ખાસ કરીને કોંગ્રેસ, આમ આદમી પાર્ટી કે અન્ય રાજકીય પક્ષોમાંથી પક્ષપલટો કરીને ભાજપમાં જોડાયેલા નેતાઓ માટે આ ચૂંટણી કપરી સાબિત થઈ શકે છે, કારણ કે હાઈકમાન્ડ દ્વારા પક્ષપલટુઓને ટિકિટ ન આપવાની દિશામાં ગંભીર વિચારણા ચાલી રહી છે. ભાજપ આ રણનીતિ દ્વારા એવો સ્પષ્ટ સંદેશ આપવા માંગે છે કે પક્ષમાં સંગઠન અને વિચારધારા સર્વોપરી છે, અને માત્ર સત્તાના લોભમાં આવેલા નેતાઓ કરતાં વર્ષોથી પાયાના સ્તરે કામ કરતા નિષ્ઠાવાન કાર્યકરોને પ્રાધાન્ય આપવામાં આવશે.
પક્ષના આ સંભવિત નિર્ણય પાછળનું મુખ્ય કારણ કેડર બેઝ્ડ કાર્યકરોમાં વ્યાપેલો અસંતોષ હોવાનું મનાય છે. અગાઉની ચૂંટણીઓમાં અન્ય પક્ષમાંથી આવેલા નેતાઓને સીધી ટિકિટ મળવાને કારણે પક્ષના પાયાના કાર્યકરોમાં અન્યાયની લાગણી જન્મી હતી, જેની અસર સંગઠન પર ન પડે તે માટે ભાજપ હવે ‘શુદ્ધિકરણ’ તરફ આગળ વધી રહ્યું છે. સૂત્રોના જણાવ્યા અનુસાર, આગામી ચૂંટણીમાં માત્ર પક્ષપલટુઓ જ નહીં, પરંતુ સગાવાદ અને લાંબી ટર્મથી સત્તા ભોગવતા નેતાઓ પર પણ કાતર ફેરવવામાં આવશે. આ નવી ફોર્મ્યુલા મુજબ, જે નેતાઓ અન્ય પક્ષમાંથી આવ્યા છે તેમને સંગઠનની જવાબદારી સોંપાઈ શકે છે, પરંતુ ચૂંટણીના મેદાનમાં ઉતારવા માટે પક્ષના જૂના જોગીઓ અને નવા સક્રિય ચહેરાઓને જ પસંદ કરવામાં આવશે.
આ નિર્ણયને કારણે ગુજરાતના રાજકારણમાં ભારે ખળભળાટ મચી ગયો છે. જે નેતાઓએ તાજેતરમાં જ કેસરિયો ધારણ કર્યો છે, તેમના રાજકીય અસ્તિત્વ સામે સવાલો ઊભા થયા છે. જો ભાજપ આ કડક માપદંડો પર મક્કમ રહેશે, તો અન્ય પક્ષોમાંથી ભવિષ્યમાં થનારા પક્ષપલટા પર પણ બ્રેક લાગી શકે છે. ભાજપના આ વલણથી પાયાના કાર્યકરોમાં નવો જોમ અને ઉત્સાહ જોવા મળી રહ્યો છે, કારણ કે તેમને લાગે છે કે પક્ષ હવે ખરા અર્થમાં તેમના સમર્પણની કદર કરી રહ્યો છે. એકંદરે, આગામી સ્થાનિક સ્વરાજ્યની ચૂંટણીમાં ભાજપ ‘નો-રિપીટ’ થી પણ આગળ વધીને ‘ઓન્લી કેડર’ ના મંત્ર સાથે મેદાનમાં ઉતરે તેવી પૂરેપૂરી શક્યતા છે.
