શેરડીનો રસ પીવાના શોખીનો સાવધ! આ 3 સમસ્યા ધરાવતા લોકોએ ભૂલથી પણ ન પીવો જોઈએ આ રસ.
ઉનાળાની કાળઝાળ ગરમીમાં ઠંડો-મીઠો શેરડીનો રસ મળી જાય તો આખા શરીરને જે રાહત મળે છે, તેની કલ્પના જ અલગ છે. શેરડીનો રસ માત્ર તરસ જ નથી છિપાવતો, પરંતુ તેમાં રહેલા નેચરલ શુગર અને ફાઈબર શરીરને ઈન્સ્ટન્ટ એનર્જી પણ આપે છે. પરંતુ, શું દરેક વ્યક્તિ માટે શેરડીનો રસ અમૃત સમાન છે? કે પછી તે કોઈ માટે નુકસાનકારક પણ સાબિત થઈ શકે?
દિલ્હીની જીટીબી હોસ્પિટલના મેડિસિન વિભાગના ડૉ. અજીત કુમાર આ બાબતે કેટલીક મહત્વની ચેતવણીઓ આપે છે. તેમના મતે, ભલે શેરડીનો રસ કુદરતી હોય, પરંતુ અમુક સ્વાસ્થ્ય સમસ્યાઓ ધરાવતા લોકોએ આનાથી દૂર રહેવું જ હિતાવહ છે.
ચાલો વિગતે જાણીએ કે કયા લોકોએ શેરડીનો રસ પીવાનું ટાળવું જોઈએ:
ડાયાબિટીસના દર્દીઓ માટે જોખમ
શેરડીના રસમાં કુદરતી શર્કરા (Natural Sugar) ભરપૂર માત્રામાં હોય છે. ડૉ. અજીત જણાવે છે કે, જે લોકોનો શુગર લેવલ સતત હાઈ રહેતો હોય, તેમણે શેરડીના રસથી અંતર જાળવવું જોઈએ. આ રસ પીવાથી શરીરમાં ગ્લુકોઝનું પ્રમાણ અચાનક વધી શકે છે (Sugar Spike), જે ડાયાબિટીસના દર્દીઓ માટે જોખમી સાબિત થઈ શકે. જો તમને ડાયાબિટીસ હોય, તો ડોક્ટરની સલાહ વગર આ રસ ન પીવો જોઈએ.
વધતા વજન અથવા મેદસ્વીપણાની સમસ્યા
જો તમે તમારું વજન ઘટાડવાનો પ્રયત્ન કરી રહ્યા હોવ અથવા મેદસ્વીપણા (Obesity) થી પરેશાન હોવ, તો શેરડીનો રસ તમારા માટે વિલન સાબિત થઈ શકે છે. તેનું કારણ એ છે કે શેરડીના રસમાં કેલરીનું પ્રમાણ ઘણું ઊંચું હોય છે. તે શરીરમાં જઈને તરત જ શુગર લેવલ વધારે છે, જે ચરબીના સંગ્રહમાં મદદ કરે છે. જોકે, ડોક્ટર ઉમેરે છે કે જો તમારું વજન વધારે છે પણ શુગર કંટ્રોલમાં છે, તો અઠવાડિયામાં એકાદ વાર એક ગ્લાસ રસ પી શકાય છે, પણ રોજ પીવાની આદત નુકસાન કરી શકે.
પાચન સંબંધી તકલીફો હોય તેવા લોકો
જે લોકોને વારંવાર અપચો, પેટમાં દુખાવો કે ગેસની સમસ્યા રહેતી હોય, તેમણે પણ શેરડીનો રસ પીતી વખતે સાવધ રહેવું જોઈએ. શેરડીનો રસ પ્રકૃતિમાં ભારે હોય છે, જે નબળા પાચનતંત્ર ધરાવતા લોકોની મુશ્કેલીઓ વધારી શકે છે. વધુ પડતો રસ પીવાથી પેટમાં ગરબડ કે પેટ ફૂલવા જેવી સમસ્યાઓ થઈ શકે છે.
સ્વચ્છતાનો અભાવ અને અન્ય નુકસાન
શેરડીના રસમાં જોવા મળતું ‘પોલીકોસોનોલ’ (Policosanol) નામનું તત્વ જો વધુ પડતું શરીરમાં જાય, તો તે અનિદ્રા, ચક્કર આવવા કે લોહી પાતળું થવા જેવી સમસ્યાઓ પેદા કરી શકે છે. આ ઉપરાંત, રસ્તા પર મળતા શેરડીના રસમાં ઘણીવાર સ્વચ્છતાનો અભાવ હોય છે. જો શેરડી બરાબર સાફ ન હોય અથવા જે મશીનમાં રસ કાઢવામાં આવે છે તે ગંદુ હોય, તો કમળો (Jaundice) કે ટાઈફોઈડ જેવા રોગો થવાનો ભય રહે છે.
