કેનેડામાં વિઝા એક્સપાયર થયા પછી રોકાવું પડશે ભારે: ટ્રેકિંગ માટે શરૂ થયો નવો પાયલોટ પ્રોજેક્ટ
કેનેડા જવાનું સપનું જોતા અને ત્યાં અભ્યાસ કે કામ કરી રહેલા ભારતીયો સહિત લાખો કામચલાઉ રહેવાસીઓ માટે એક મહત્વના સમાચાર આવ્યા છે. કેનેડા સરકારે એવા લોકો પર નજર રાખવા માટે એક ખાસ ‘પાયલોટ પ્રોજેક્ટ’ શરૂ કર્યો છે જેમના વિઝાની સમયમર્યાદા પૂરી થઈ ગઈ છે. આ પ્રથમ વખત છે જ્યારે કેનેડા સરકાર ‘એન્ટ્રી-એક્ઝિટ’ સિસ્ટમ એટલે કે દેશમાં આવવા અને જવાની પ્રક્રિયા પર કડક દેખરેખ રાખવા જઈ રહી છે.
કોના પર રાખવામાં આવશે નજર?
આ નવો નિયમ માત્ર વિદ્યાર્થીઓ પૂરતો મર્યાદિત નથી. આમાં નીચેના કેટેગરીના લોકોનો સમાવેશ થાય છે:
આંતરરાષ્ટ્રીય વિદ્યાર્થીઓ: જેમના સ્ટડી પરમિટની મુદત પૂરી થઈ ગઈ છે.
કામચલાઉ કામદારો (Temporary Workers): જેઓ વર્ક વિઝા પર કેનેડામાં છે.
મુલાકાતીઓ (Visitors): જેઓ ટુરિસ્ટ વિઝા પર કેનેડા ગયા છે.
આ સિસ્ટમ દ્વારા સરકાર એ જાણવાનો પ્રયાસ કરશે કે વિઝા પૂરા થયા પછી કેટલા લોકો ખરેખર દેશ છોડીને ગયા છે અને કેટલા લોકો ગેરકાયદેસર રીતે ત્યાં રોકાઈ ગયા છે.
ઓડિટર જનરલના રિપોર્ટ બાદ કડક કાર્યવાહી
આ નિર્ણય લેવા પાછળનું મુખ્ય કારણ માર્ચ મહિનામાં ઓડિટર જનરલ દ્વારા રજૂ કરવામાં આવેલો એક ચોંકાવનારો રિપોર્ટ છે. આ રિપોર્ટમાં આંતરરાષ્ટ્રીય વિદ્યાર્થી કાર્યક્રમના સંચાલનમાં ગંભીર બેદરકારી હોવાની ટીકા કરવામાં આવી હતી. ઓડિટર જનરલ કેરેન હોગને જણાવ્યું હતું કે, વિભાગે સિસ્ટમની વિશ્વસનીયતા જાળવી રાખવા માટે તેની પાસે ઉપલબ્ધ માહિતી પર તાત્કાલિક પગલાં લેવાની જરૂર છે.
હાઉસ ઓફ કોમન્સની સ્થાયી સમિતિ સમક્ષ ઇમિગ્રેશન મંત્રી લીના મેટલેજ ડાયબે જણાવ્યું હતું કે, કેનેડિયન બોર્ડર સર્વિસીસ એજન્સી (CBSA) ના સહયોગથી આ નવી સિસ્ટમ આગામી અઠવાડિયામાં કાર્યરત થઈ જશે.
ગેરરીતિ કરનારાઓ સામે લાલ આંખ
કેનેડા સરકાર હવે છેતરપિંડી કે નકલી દસ્તાવેજોના આધારે વિઝા મેળવનારાઓ સામે ખૂબ જ કડક વલણ અપનાવી રહી છે.
રેકોર્ડમાં નોંધ: જો કોઈ વ્યક્તિએ ભૂતકાળમાં નકલી દસ્તાવેજો રજૂ કર્યા હશે, તો તેની ફાઈલ પર કાયમી ધોરણે એક નોંધ (Flag) મૂકવામાં આવશે. આનાથી ભવિષ્યમાં તેને કેનેડાના વિઝા મળવા અશક્ય બની જશે.
માસિક રિપોર્ટ: ઇમિગ્રેશન વિભાગે (IRCC) દર મહિનાની 15 તારીખ સુધીમાં છેતરપિંડી અને નિયમોના ઉલ્લંઘન અંગેનો રિપોર્ટ સંસદીય સમિતિને સુપરત કરવાનો રહેશે.
તપાસ: જે વિદ્યાર્થીઓની પરમિટ પૂરી થઈ ગઈ છે અને જેમણે નવી કોઈ અરજી કરી નથી, તેવા તમામ શંકાસ્પદ કેસોની આ વર્ષના અંત સુધીમાં તપાસ કરવામાં આવશે.
આંકડા શું કહે છે?
રિપોર્ટ અનુસાર, વર્ષ 2023 અને 2024 વચ્ચે લગભગ 1,53,000 એવા કેસ જોવા મળ્યા હતા જ્યાં સ્ટડી પરમિટ ધારકો પર શંકા હતી. જોકે, તપાસમાં જાણવા મળ્યું કે તેમાંથી 78% લોકો નિયમોનું પાલન કરી રહ્યા હતા. આ 78% માં એવા 14% લોકોનો પણ સમાવેશ થાય છે જેમણે શરણાર્થી (Asylum) તરીકે આશ્રય મેળવવા માટે અરજી કરી હતી.
ભારતીયો પર શું અસર પડશે?
કેનેડામાં આંતરરાષ્ટ્રીય વિદ્યાર્થીઓમાં ભારતીયોની સંખ્યા સૌથી વધુ છે. આ નવી સિસ્ટમ બાદ, જે વિદ્યાર્થીઓ અભ્યાસ પૂરો થયા પછી ગેરકાયદેસર રીતે રોકાઈ જવાનું વિચારતા હોય તેમના માટે મુશ્કેલી વધી શકે છે. હવે દરેક હિલચાલ પર સરકારની નજર રહેશે. જો કોઈ વિદ્યાર્થીના દસ્તાવેજોમાં નાની ભૂલ પણ હશે અથવા વિઝા એક્સપાયર થયા પછી એક દિવસ પણ વધુ રોકાશે, તો તેની અસર તેની ભવિષ્યની ઈમિગ્રેશન તકો પર પડશે.
